रोमियां 4
4
अब्राहम चा उदाहरण
1तां अम्ही का किहुं, कि अम्चे पुरखे अब्राहम नु ये धार्मिकता लारे का मिड़ले? 2कांकि अगर अब्राहम कामा लारे धर्मी ठहराला जाये हा, तां ओनु घमण्ड करने ची वजह हुवे हा, पर नरीकारा चे गोढु कोनी। 3#गला 3:6पवित्रशास्त्र का किहे? ईं कि, “अब्राहम ने नरीकारा चे उपर विश्वास करला, ते हा ओचे वास्ते धार्मिकता गिणला गेला।”
4काम करने आले ची मजदूरी ङेणे कुई दान कोनी, पर अधिकार समझला जाये। 5पर जको काम ना करी बल्कि नरीकारा उपर विश्वास राखे, जको पापी नु वी छोड़ती ङिये, तां ओचा विश्वास ओचे वास्ते धार्मिकता गिणली जई। 6जानु नरीकार बिना कर्मा चे धर्मी ठहरावे, ओनु दाऊद वी धन्न किहे कि,
7“धन्न छै ओ, जाये अधर्म माफ करले गेले,
ते जाये पाप ढकले गेले।
8धन्न छै ऊं इन्सान जानु प्रभु पापी ना ठहराओ।”
9तां ये धन्न वचन, का खतना आला चे वास्ते छै, जा बिना खतना आला चे वास्ते वी छै? अम्ही ईं किहुं पले, “अब्राहम ने विश्वास करला ते हा ओचे वास्ते धार्मिकता गिणला गेला।” 10तां ओ किवें गिणला गेला? का खतने कनु पेहले जा खतने कनु बाद? खतने चे बाद ना, पर खतने हुवणे कनु पेहले। 11ते ओणे खतने चा चैन्ह पाला, जको विश्वास चे जरिये धार्मिकता ची छाप छै, जको ओणे बिना खतने दशा मां गेहली हुती। ऐवास्ते ओ वां सब चा ब़ा ठहरला, जको बिना खतने ची दशा मां विश्वास राखी, ताकि वे वी धर्मी ठहरो। 12ते ओ वां खतना करले आला चा वी ब़ा छै, जको ना सेर्फ खतना करले आले छी, पर अम्चे ब़ा अब्राहम चे ओ विश्वास चे मार्ग़ उपर वी चली, जिसे उपर ओ बिना खतना करले चढ़ला हुता।
विश्वास ते नरीकारा चा वचन
13 #
गला 3:29
नरीकारा ने हा वायदा करला हुता कि अब्राहम संसारा चा वारिस हुवी, हा वायदा ओनु ते ओचे वंश नु व्यवस्था चे जरिये कोनी मिड़ला, पर विश्वास ची धार्मिकता चे जरिये मिड़ला हुता। 14#गला 3:18अगर व्यवस्था आले वारिस छी, तां विश्वास बेकार ते वायदा बेअसर ठहरला। 15कांकि व्यवस्था तां नरीकारा चा क्रोध पैदा करे। जिठे व्यवस्था कोनी ओठे विचा उलंघन वी कोनी।
16 #
गला 3:7
येही वजह कनु वायदा विश्वासा उपर टिकला आला छै, ते हा सेंत मेंत मां मिले, वां सारे वंशा वास्ते पक्के हो, ना कि सेर्फ ओचे वास्ते जको व्यवस्था आले छी, बल्कि वांचे वास्ते वी जको अब्राहम चे समान विश्वासा आले छी, ओही तां अम्चा सब चा ब़ा छै। 17जिसड़े कि पवित्रशास्त्र मां लिखले आले छै, “मैं तनु ब़ोहत सारीया जातिया चा ब़ा ठहराला।” नरीकारा चे सामणे अब्राहम अम्चा ब़ा छै, जेह्णे ओ नरीकारा उपर विश्वास करला, जको मरला आला नु जीते करे ते जको बाता छी ही कोनी, वांचे नां इसड़े गिहे, कि मनती गिहा कि वे छी। 18अब्राहम ने कुई आस ची जग़हा ना हुवणे उपर वी आपणे मना मां आस राखती कर विश्वास करला। ऐवास्ते वचन चे अनुसार ओ ब़ोहत सारीया जातिया चा ब़ा बणला। जिंवे कि पवित्रशास्त्र मां लिखले पले, “दुधा वंश इसड़ा हुवी।” 19ओ जको साऔ साला चा हुता, आपणे मरले आले शरीर ते सारा ची कोक्ख ची मरली आली दशा जाणती कर वी विश्वासा मां कमजोर कोनी हुला। 20ते ना ही अविश्वासी हुती कर नरीकारा चे वायदे उपर शक्क करला, पर विश्वासा मां मजबूत हुती कर नरीकारा ची महिमा करली, 21ते ओनु पूरा भरोसा हुता कि जिसी बाते चा वायदा नरीकारा ने करला, ओ ओनु पूरा करने मां वी सामर्थी छै। 22येही वजह हा ओचे वास्ते धार्मिकता गिणला गेला। 23पवित्रशास्त्र चा हा वचन छै, “विश्वास ओचे वास्ते धार्मिकता गिणला गेला,” ना सेर्फ ओचे वास्ते लिखले गेले। 24पर अम्चे वास्ते वी छै। नरीकार अम्हानु वी जको ओचे उपर विश्वास राखु धर्मी ठहरावी, ओणे अम्चे प्रभु ईशु नु मरले आला महु जिवाले। 25ईशु अम्चे अपराधा वास्ते पकड़वाला गेला, ते अम्चे धर्मी ठहरणे वास्ते मरले आला महु जिवाला वी गेला।
Currently Selected:
रोमियां 4: ODR
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
