यूहन्‍ना 20

ईशु ची कब्र खाली

(मत्ती 28:1–8; मरकुस 16:1–8; लूका 24:1–12)

1हफ्ते चे पेहले ङिओ, मरियम मगदलीनी पुरा फुटले अन्धारे चे समय कब्री उपर आलीया, ते पत्थरा नु कब्री कनु हटला आला ङेखला। 2तब वा द्रोड़ली ते शमौन पतरस ते ओ ङुजे चैले चे गोढु जको लाङका किहवाता, आती कर केहले, “वे प्रभु नु कब्री कनु काढ़ती कर चती गेले, ते अम्ही ना जाणु कि ओनु किठे मेहलती ङिले!”

3बल्ति पतरस ते ओ ङुजा चैला ङेखणे चे वास्ते कब्री सनु टुरती पले। 4वे ङोनी लारे-लारे द्रोड़ी पलते, पर ङुजा चैला पतरस कनु आग़ु निकलती कर कब्री उपर पेहले पुज़ला, 5ते झुकती कर ओढ़णी पली ङेखली, तांवी ओ भीतर कोनी गेला। 6ओही बेले शमौन पतरस वी जको ओचे भांसु आवे पलता आती पुज़ला ते कब्री चे भीतर चाह्‍ला गेला। ते ओणे ङेखले कि खफना ची ओढ़णी पली ली, 7ते ऊं रुमाल जको ओनु कब्री मां मेहलणे चे समय उपर ओचे ठोङा उपर हुते, खफना चे ओढ़णा लारे कोनी हुते, पर ऊं रुमाल सोंटती कर अलग़ जग़हा उपर मेहले आले हुते। 8बल्ति ङुजा चैला वी, जको पेहले पुज़ला हुता, भीतर गेला ते ओणे ङेखले तां विश्‍वास करला। 9वे हमा वी पवित्रशास्त्र चे ऐ वचना नु कोनी समझले हुते, कि ईशु चे मरले आला महु जीते हुवणे पक्‍के हुते। 10बल्ति वे चैले आपणे घरा सनु पुठे चाह्‍ले गेले।

मरियम मगदलीनी नु ईशु ने दर्शन ङिले

(मत्ती 28:9,10; मरकुस 16:9–11)

11मरियम रोती पिट्टती कब्री चे ब़ाहरु भिलती ली। रोते-पिट्टते वा कब्री चे भीतर ङेखणे चे वास्ते तले झुकती कर, 12जिठे ईशु ची लाश मेहली गेलती ली, ओठे विणे चिट्टी ओढ़णा आलीकर ङोन स्वर्ग़दूत ङेखले, हेक तां ठोङा आले पासु ते ङुजा पग़्ग़ा आले पासु ब़ेहले ङेखले।

13वाणे मरियम कनु पूछले, “हे असतरी, तु कां रोवी पली?”

विणे उत्तर ङिला, “वे माये प्रभु नु चती गेले, ते मनु पता कोनी वाणे ओनु किठे मेहले।”

14इतने केहती कर वा पुठी जिंवे मुड़ली ते विणे ङेखले कि ओठे ईशु भीलता ला, पर वा ओनु पिछाण कोनी सग़ली कि हा ईशु छै।

15ईशु ने विनु केहले, “हे असतरी, तु कां रोवी पली? तु कानु सोधी फिरी?”

विणे ईं सोचले कि हा माली छै, विणे ओनु केहले, “हे महाराज़, अगर तु ओनु चले, तां मनु बावड़ तु ओनु किठे मेहले, मैं ओनु चली जई।”

16ईशु ने विनु केहले, “मरियम।”

विणे ईशु सनु मुड़ती कर इब्रानी भाषा मां केहले, “रब्बूनी,” जाया मतलब “गुरु।”

17ईशु ने विनु केहले, “मनु हाथ ना ला, कांकि मैं हालि तक ब़ा नरीकारा सनु उपर कोनी गेला। पर माये भावां कनु जती कर वानु केहती ङे कि, ‘मैं आपणे ब़ा ते तम्चे ब़ा, आपणे नरीकार ते तम्चे नरीकारा चे गोढु उपर जाये पला।’ ”

18मरियम मगदलीनी ने जती कर चैला नु बावड़ले, “मैं प्रभु नु ङेखले, ते ओणे मनु ये बाता केहलीया।”

ईशु ने चैला नु दर्शन ङिला

(मत्ती 28:16–20; मरकुस 16:14–18; लूका 24:36–49)

19ओही ङिओ जको हफ्ते चा पेहला ङिओ हुता,आथण चे बेले जब उठली दरवाजी जिठे चैले हुते, यहूदिया चे ङरा कनु बन्द हुती, तब ईशु आला ते वांचे आधे मां भिले रेहती कर वानु केहले, “तम्हानु शान्ति मिलो!” 20ते ईं केहती कर ईशु ने आपणे हाथ ते पंजर वानु ङिखाणले। तब चैले प्रभु नु ङेखती कर मगन हुले। 21ईशु ने बल्ति वानु केहले, “तम्हानु शान्ति मिलो! यूंही जिंवे ब़ा नरीकारा ने मनु भेज़ले, मैं वी तम्हानु यूंही भेज़े पला।” 22ईं केहती कर ईशु ने वांचे उपर फूका ङिला ते केहले, “पवित्र आत्मा गिहा। 23#मत्ती 16:19; 18:18जाये पाप तम्ही माफ करा, वानु माफी मिली, ते जानु तम्ही माफ नी करा, वानु माफी नी मिली।”

ईशु ने थोमे नु दर्शन ङिला

24थोमा यानि जको दिदुमुस किहवावे ब़ारहा चैला महु हेक हुता, जिसे बेले ईशु आलता ला ओ बेले ओ बाकि चैला चे लारे कोनी हुता।

25ङुजे चैले ओनु किहुं लाग़ले, “अम्ही तां प्रभु नु ङेखले!”

पर ओणे वानु केहले कि, “जब तक मैं ओचे हाथा मां कीला चे निशान ना ङेखती गिही ते वांचे मां आपणीया आंगलीया ना घिराती ङिही, ते ओचे पासे मां आपणा हाथ ना घिराती ङिये, तब तक मनु विश्‍वास नी हुवी।”

26आठ ङिहां चे बाद ईशु चे चैले घरा चे भीतर हुते, ते थोमा वांचे लारे हुता ते दरवाजे बन्द हुते। बल्ति वी ईशु आला वांचे बीच मां भिला रेहती कर वानु केहले, “तम्हानु शान्ति मिलो।” 27बल्ति ईशु ने थोमे नु केहले, “आ आपणी आंगली नाख, ते माये हाथा नु ङेख। आपणा हाथ आणती कर माये पासे मां घाल। वहम करना छोड़ पर विश्‍वास कर।”

28उत्तर ङिते हुले थोमा ब़ोला, “हे माया प्रभु, हे माया नरीकार।”

29ईशु ने थोमे नु केहले, “तु तां मनु ङेखती कर विश्‍वास करला, पर धन्‍न छी वे जको बिना ङेखले आले विश्‍वास करी।”

ये किताबे चा मकसद

30ईशु ने नेरे वी अचम्भे कामा चे चैन्ह आपणे चैला चे सामणे ङिखाणले, जको ये किताबे मां कोनी लिखले गेले। 31पर ईं ऐवास्ते लिखले गेले कि तम्ही विश्‍वास करा कि ईशु ही नरीकारा चा पूत मसीह छै, ते विश्‍वास करती ओचे नांवा लारे जीवन गिहा।

Currently Selected:

यूहन्‍ना 20: ODR

Highlight

Copy