यूहन्‍ना 19

1ऐचे उपर पिलातुसा ने ईशु नु कोड़े मरवाले। 2ते सिपाहीया ने कांटा चा मुग़ट ग़ूंथती कर ओचे ठोङा उपर मेहला, ते ओनु बैंजनी रंगा चा चोला घलाला, 3ते ओचे गोढु आती कर किहुं लाग़ले, “हे यहूदिया चा राजा, नमस्कार!” ते ओनु थप्पड़ वी मारले।

4पिलातुस हेक वारी बल्ति ब़ाहरु आला ते लौका नु केहले, “ङेखा, मैं तम्चे गोढु ओनु बल्ति ब़ाहरु गेहली आवे ताकि तम्ही जाणती गिहा कि मैं ओचे मां कुई दोष कोनी सोहला।” 5बल्ति ईशु ब़ाहरु आला ओ कांटा चा मुग़ट ते बादशाही बैंजनी रंगा चा घग्गा घाला आला हुता, बल्ति पिलातुस ने केहले, “हा छै ओ मर्द!”

6जब प्रधान याजका ते पाहरेदारा ने ओनु ङेखले, तां रौला मचाती कर केहले, “ओनु क्रूसा उपर चढ़ा, क्रूसा उपर।”

पिलातुस ने वानु केहले, “तम्ही ही ओनु जती कर क्रूसा उपर चढ़ावा, कांकि मैं ऐचे मां कुई दोष कोनी ङेखला।”

7यहूदी लौका ने ओनु केहले, “कि अम्ची वी व्यवस्था छै ते वे व्यवस्था चे अनुसार हा मारती नाखणे चे लायक छै, कांकि ऐणे नरीकारा चा पूत हुवणे चा दावा करला।”

8जिसे बेले पिलातुस ने वानु ईं केहते सुणले, तां ओ ब़ोहत ज्यादा ङरती गेला। 9ते बल्ति किले चे भीतर गेला ते ईशु नु केहले, “तु किठला छी?”

पर ईशु ने ओनु कुई उत्तर कोनी ङिला। 10बल्ति पिलातुस ने ईशु नु केहले, “का तु माये लारे बात करने ना चाहवी? का तु ना जाणी कि मैं तनु छोड़ने चा अधिकार वी राखे ते तनु क्रूसा उपर चढ़ाणे चा वी अधिकार राखे?”

11ईशु ने पिलातुस नु केहले, “अगर उपरु अधिकार ना ङिला जईया तां दुधा माये उपर कुई अधिकार ना हुवीया। ऐवास्ते जेह्णे मनु दुधे हाथे पकड़वाले, ओणे ब़ोहत ज्यादा पाप करला।”

12ईं सुणती कर पिलातुस ने ओनु छोड़ने चा कुई तरीका सोधणे ची कोशिस करु लाग़ला, पर यहूदी नेता रौल मचाऊं लाग़ले, “अगर तु ऐनू छोड़ती ङिये, तां तु कैसर राजे चा दोस्त कोनी। कुई वी जको आपणे आप नु राजा हुवणे चा दावा करे ऊं कैसर राजे चे विरोधी छै।”

13जिसे बेले पिलातुस ने ये बाता सुणलीया, ते ओ ईशु नु ब़ाहरु वे जग़हा उपर गेहती गेला जको “पत्थर चा चबूतरा” किहवाता। ये जग़हा नु इब्रानी भाषा मां “गब्बता” केहले गेले। ते ओठे न्यां आसण उपर ब़ेहला। 14हा फसह ची तियारी चा ङिओ हुता, ते छेवें घण्टे चे लगभग हुता।

तब ओणे यहूदिया नु केहले, “ङेखा तम्चा राजा।”

15पर वे रौल मचाऊं लाग़ती गेले, “गेहली जा! गेहली जा! ओनु क्रूसा उपर चढ़ा!”

पिलातुस ने वानु केहले, “का मैं तम्चे राजे नु क्रूसा उपर चढ़ावे?”

प्रधान याजका ने उत्तर ङिला, “कैसर नु छोड़ती कर अम्चा कुई नेरा राजा कोनी।”

16तब पिलातुस ने ईशु नु वांचे हाथा मां सोंपती ङिले ताकि ओ क्रूसा उपर चढ़ाला जाओ।

क्रूसा उपर चढ़ाले जाणे

(मत्ती 27:32–44; मरकुस 15:21–32; लूका 23:26–43)

17बल्ति वे ईशु नु गेहती गेले, ते ओ आपणा क्रूस चती कर, वे जग़हा तक ब़ाहर गेला, जको “खोपड़ी ची जग़हा” किहवावे ते इब्रानी मां जको “गुलगुता किही।” 18ओठे वाणे ओनु ते ओचे लारे नेरे ङोन शक्सा नु क्रूसा उपर चढ़ाले, हेक इंगे ते ङुजा ऊंगे ते बीच मां ईशु नु।

19पिलातुस ने दोष-पत्र लिखती कर क्रूसा उपर लाती ङिला, ते ओचे मां ईं लिखले पलते, “ईशु नासरी, यहूदिया चा राजा छै।” 20घणे सारे यहूदिया ने ओ दोष-पत्र नु पढ़ले, कांकि जिठे ईशु नु क्रूसा उपर चढ़ाले हुते वा जग़हा शहरा चे गोढु ही हुती, ते ओ दोष-पत्र इब्रानी, यूनानी ते लातीनी भाषा मां लिखला गेलता। 21बल्ति यहूदी प्रधान याजका ने पिलातुस नु किहुं लाग़ले, “यहूदिया चा राजा ना लिखा, पर ईं कि ओणे केहले, ‘मैं यहूदिया चा राजा छै।’ ”

22पिलातुस ने उत्तर ङिला, “मैं जको लिखती ङिले, सो लिखती ङिले।”

23जिसे बेले सिपाही ईशु नु क्रूसा उपर चढ़ाती चुकले, तां वाणे ओची ओढ़णी चली, ते चऊं हेंस्सा मां बांटती गेली, हर हेंस्सा हेक सिपाहीया चे वास्ते। वाणे चोला वी चला। कांकि ओ चोला बिना सिलाई चे उपरु लाती कर तले तक बुणला आला हुता।

24ऐवास्ते वाणे आपस मां केहले, “ऐनू फाड़ा ना, ङेखु ऐनू कूण गिही आवा ऐचे वास्ते पर्चीया नाखु।” ताकि पवित्रशास्त्र मां लिखला आला हा वचन पूरा हुला, “वाणे माई ओढ़णी आपस मां बांटती गेली ते वाणे माये ओढ़णा वास्ते पर्चीया नाखलीया।” ऐवास्ते सिपाहीया ने इसड़े ही करले।

25ईशु चे क्रूसा गोढु ओची आई, ते ओची माछी, क्लोपास ची घराआली मरियम, ते मरियम मगदलीनी भिलीया हुतीया। 26ईशु ने जिसे बेले आपणी आई ते जको लाङका किहवाता चैले नु गोढु भिले आले ङेखले, ते आपणी आई नु केहले, “हे नारी, हा छै दुधा पूत।” 27बल्ति ईशु ने ओ चैले नु केहले, “हा छै दुधी आई।” ते ओही बेले ओ चैला विनु आपणे घरे गेहली गेला।

ईशु ची मौत

(मत्ती 27:45–56; मरकुस 15:33–41; लूका 23:44–49)

28ऐचे बाद, ईशु ने ईं जाणती कर कि हमा सब कोच्छ पुरे हुती चुकले, ऐवास्ते कि पवित्रशास्त्र मां जको केहले गेलते ऊं पुरे हो, केहले, “मैं तरसेला छै।”

29ओठे सिरके लारे भरले आले हेक ठां पले हुते, तां वाणे सिरके भेला आला ब़ुड़े नु कान्‍नै उपर मेहलती कर ओचे मुँहा नु लाला।

30जब ईशु ने ओ सिरका गेहला, तां केहले, “पुरे हुले” ते ठोङ झुकाती कर जेन्द छोड़ती ङिली।

बरछे लारे सुराख

31ऐवास्ते कि ओ तियारी चा ङिओ हुता, यहूदिया ने पिलातुस कनु बिनती करली कि वांचीया टांका भान्ती ङिलीया जाओ ते वे उतारले जाओ कि सब्त चे ङिओ वे क्रूसा उपर ना रिहो, कांकि आग़ले ङिओ सब्त चा ङिओ, बङा ङिओ हुता।

32तां सिपाहीया ने आती कर पेहले आले ङाकुवा चा टांका भांलीया, ते बल्ति ङुजे चा जको ईशु चे लारे क्रूसा उपर चढ़ाले गेलते। 33पर जिसे बेले ईशु चे गोढु आती कर ङेखले कि ओ मरती चुकला, तां ओचीया टांका कोनी भांलीया। 34पर वांचे महु हेक सिपाहीया ने बरछे लारे ओचे पासे मां सुराख करले, ते ओचे महु लुहीं ते पाणी निकड़ले। 35जेह्णे ईं ङेखले ओणे ही ग़वाही ङिली, ते ओची ग़वाही सच्‍ची छै। ते ओ जाणे कि सच्‍च किहे पला, ते ग़वाही उपर तम्ही वी विश्‍वास करा। 36ये बाता ऐवास्ते हुलीया कि पवित्रशास्त्र चीया ये बाता पुरीया हो कि, “ओची कुई हङी भांली नी जई,” 37#प्र.वा 1:7बल्ति हेक नेरी जग़हा मां पवित्रशास्त्र मां ईं लिखले पले, “जानु वाणे बरछा मारला, ओचे उपर ओ नजर राखी।”

ईशु चे दफनाले जाणे

(मत्ती 27:57–61; मरकुस 15:42–47; लूका 23:50–56)

38यां बाता चे बाद, अरिमतिया चे यूसुफ ने, जको ईशु चा चैला हुता, पर यहूदिया चे ङरा कनु ये बाते नु लुकाती राखता, पिलातुस कनु बिनती करली कि का ओ ईशु ची लाश चती जा सग़े? पिलातुस ने ओची बिनती सुणली। ते ओ आती कर ओची लाश चती गेला। 39#यूह 3:1,2निकुदेमुस वी जको पेहले ईशु चे गोढु राती नु गेला हुता, त्रीस किलो चे लगभग मिड़ला आला गंधरस ते एलवा चती आला। 40बल्ति वाणे ईशु ची लाश चली, ते यहूदिया ची दफनाणे ची रीति चे अनुसार विनु खुश्बुदार चीजा लारे खफना मां बलेठले। 41वे जग़हा उपर जिठे ईशु क्रूसा उपर चढ़ाला गेलता, हेक बगीचा हुता, ते ओ बगीचे मां हेक नवीं कब्र हुती जाये मां कङी कुई कोनी मेहले गेलते। 42ऐवास्ते यहूदिया ची तियारी चे ङिओ ची वजह कनु वाणे ईशु नु उठी मेहले, कांकि वा कब्र गोढु हुती।

Currently Selected:

यूहन्‍ना 19: ODR

Highlight

Copy