प्रेरितां चे काम 28

माल्टा टापू मां पौलुस चा स्वागत

1जिसे बेले बचती निकड़ले, तां अम्हानु पता लाग़ला कि हा माल्टा टापू किहवावे। 2ते ऊठला बसन्दा ने अम्चे उपर बङी दया करली, लगातार बारशी चे वजह तापमान मां गिरावट आती गेली हुती, सर्दी ची वजह कनु वाणे अम्चा स्वागत करला ते जाखते ब़ालती कर अम्चा स्वागत करला। 3जिसे बेले पौलुस ने ईंधणा चा ग़ंढा भेला करती कर जाखते मां मेहला, तां हेक नाग़ सेका ची वजह निकड़ला ते ओचे हाथा मां लटकती गेला। 4जिसे बेले उठले बसन्दा ने ङेखले कि ओचे हाथा मां नाग़ लटकला पला ते आपस मां किहुं लाग़ले कि, “सच्‍चमां ईं बन्दे हत्यारे छै, अगर ईं इन्सान समुन्दरा कनु तां बचती निकड़ले, पर न्यां करने आला देवता ऐनू जीते नी रिहुं ङी।”

5पर ओणे नाग़ा नु जाखते मां छंडकती ङिले ते पौलुस चे कुई वी नुकसान कोनी हुला। 6वे सारे जणे हा इंतजार करु लाग़ले कि हा सूज़ती जई, जा ओ थोड़ी ब़ोहत देरी मां तले ढेती पड़ी। जिसे बेले वे घणी देरी तक पौलुस नु ङेखते रेहले, कि ओचे कहीं वी कोनी बिगड़ले, ऐवास्ते लौका चा नजरीया ही बदलती गेला ते वे किहुं लाग़ले कि “हा खौद्द कुई देवता छै।”

7वे जग़हा चे आस-पास टापू लारे पुबलियुस नांवा चे प्रधाना ची भोंये हुती। ओ अम्हानु आपणे घरे गेहती गेला ते तीन ङिहां तक अम्ची मेहमानी करता रेहला। 8पुबलियुस चा ब़ा तेज बुखार ते दस्ता मां बिमार पला हुता। ऐवास्ते पौलुस ने ओचे घरा मां जती कर ओचे पे हाथ मेहलती कर प्राथना करली ते ओनु ठीक करले। 9जिसे बेले इसड़े हुले तां ओ टापू चे बाकि बिमार लौक वी पौलुस कनु आले ते ओनु वानु वी ठीक करले।

10वाणे अम्चा ब़ोहत ज्यादा आदर सत्कार करला, ते जिसे बेले अम्ही टुरु लाग़ले, ते जको कोच्छ चीजा ची अम्हानु जरुरत हुती, ते वाणे वां चीजा नु जहाजा उपर मेहलती ङिलीया।

पौलुस चे रोम सनु जाणे

11तीन मेहना चे बाद अम्ही सिकन्दरिया चे हेक जहाजा उपर ब़ेसती रेहले, ते हा जहाज ओ टापू उपर सर्दी कटे भीलता, ते ओ जहाजा चे आग़ले हेंस्से मां जाड़ीये देवता चा चैन्ह दियुसकूरी हुता। 12सुरकूसा शहरा मां अम्ही लंगर नाखती कर तीन ङिहां तक टिकले रेहले। 13उठु कनु अम्ही घूमती कर रेगियुम शहरा मां आले, ते हेक ङिओ चे बाद दक्षिणी हवा चढ़ली, बल्ति ङुजे ङिओ पुतियुली शहरा मां आले। 14ओठे अम्हानु कोच्छ विश्‍वासी भऊ मिड़ले, ते वांचे केहणे लारे अम्ही ओठे सात ङिहें रेहले, ऐचे बाद अम्ही रोम सनु टुरती पले। 15जिसे बेले उठले भावां नु ये बाते चा पता लाग़ला कि वे आवी पले, ते अप्पियुस चे चौक ते तीन सराय नांवा ची जग़हा तक अम्हानु मिलणे चे वास्ते आती गेले, वानु ङेखती कर पौलुस ने नरीकारा चा धन्यवाद करला ते हिम्मत ब़ांधली।

पौलुस रोम मां

16जिसे बेले अम्ही रोम मां पुज़ले, तां ओठे पौलुस नु हेकले रेहणे ची छूट हुती पर हेक सिपाही ओची निगरानी करता रेहता।

17तीन ङिहां चे बाद पौलुस ने यहूदी प्रधाना ची हेक सभा हकरवाली, जिसे बेले वे भेले हुले तां वानु केहले कि, “हे माये भऊ, मैं आपणे लौका चे विरोध मां, जा पुरखा कनु चढ़ली आवे रीति रिवाज चे विरोध मां कोच्छ वी कोनी करले, फेर वी मैं कैदी बणाती कर यरुशलेम कनु रोमियां चे हाथा मां सोंपला गेला। 18माई जांच-पड़ताल करने चे बाद वे मनु छोड़ने वास्ते तियार हुते, कांकि मैं इसड़े कुई काम ही कोनी करले हुते जको मनु मौत ची सजा मिलेहा। 19#प्रेरि 25:11पर जिसे बेले यहूदी लौका ने विरोध करला तां मैं मजबूर हुती कैसर कनु अपील करनी पली। पर सच्‍चमां मैं आपणे लौका उपर कुई दोष ना लावी। 20ऐवास्ते मैं तम्हानु हकरवाले, कि तम्चे लारे मिले, ते बातचीत करे, कांकि इस्राएल ची आस चे वास्ते मैं यां संगला लारे जकड़ला पला।”

21वाणे पौलुस नु केहले कि, “ना ते अम्हानु दुधे बारे मां कुई चिठ्ठी मिड़ली, ते ना ही यहूदी प्रधाना महु इठे आती कर दुधे बारे मां कोच्छ बावड़ले, ते ना ही दुधी कुई बुराई करली। 22पर हमा बावड़ दुधा का विचार छै? वाहो बात अम्ही दुधे कनु सुणने चाहु, कांकि अम्ही जाणु, कि हर जग़हा मसीह पंथ चे विरोध मां सारे लौक बाता करे पले।”

23बल्ति वाणे पौलुस चे वास्ते हेक ङिओ तय करला, ते जिसे घरा मां ओ हुता घणी तदात मां लौक ओठे भेले हुती गेले। ते ओ नरीकारा चे राज़ ची ग़वाही ङिता हुला, ते मूसा ची व्यवस्था ते भविष्यवक्‍ता चा किताबा महु ईशु मसीह चे बारे मां सवेले कनु लाती कर आथणे तक साफ रीति लारे वानु समझाता रेहला। 24बल्ति वांचे महु कोच्छ लौक ने वे बाता मनती गेलीया पर कोच्छ लौका ने विश्‍वास कोनी करला। 25जिसे बेले वे आपस मां हेके-ङुजे लारे सहमत कोनी हुले, ते पौलुस ची हा आखरी बात सुणती कर वे उठु चाह्‍ले गेले कि, “पवित्र आत्मा ने यशायाह भविष्यवक्‍ता चे जरिये तम्चे ङाङा-ब़ा नु ठीक ही केहले हुते कि,

26“ ‘यां लौका नु जती कर किहा,

“तम्ही लौक सुणते तां रिहा,

पर समझा नी,

तम्ही लौक ङेखते वी रिहा, पर पिछाण नी सग़ा।”

27कांकि यां लौका चे मन मोटे हुती गेले,

ते वांचे कान भारी हुती गेले,

ते वाणे आपणीया आँख नु बन्द तां करती नाखलीया,

कि कङी वे आँखीया लारे ङेखती ना गिहो,

ते काना कनु सुणती ना गिहो,

ते आपणे मना लारे समझती कर,

पुठे बल्ति आवे,

ते मैं नरीकार वानु आत्मिक तन्दरुस्ती ते चंगाई ङी।’

28“ऐवास्ते ईं सही छै कि तम्हानु पता लाग़ती जाओ कि नरीकारा चा हा उद्धार हमा नेरीया जातिया चे वास्ते वी मौजुद छै, वे वी ऐनू मने।”

29जिसे बेले पौलुस ने हा बात केहली तां यहूदी आपस मां बहस-बाजी करते हुले उठु चाह्‍ले गेले।

30ते पौलुस ओठे ङुंहु साला तक किराये चे घरा मां रेहला ते जको लौक ओचे गोढु आते, वां सारा लारे बङे प्यारा लारे मिलता रेहला। 31ते बिना रोक-टोक बङी हिम्मती लारे नरीकारा चे राज़ चा प्रचार करता रेहला ते प्रभु ईशु मसीह चीया बाता सिखाता रेहला।

Currently Selected:

प्रेरितां चे काम 28: ODR

Highlight

Copy