Lukas 23

Yesus ta aronai Pilatus

(Mat. 27:1-2, 11-14; Mrk. 15:1-5; Yoh. 18:28-38)

1Maɓegge ɗadede tangngaɗa ata kamakahha neɗo, maɗangidiy Yesus ta aronai Pilatus. 2Neɗo yiɗɗa kapuɗage ɓaɗa hajala-Yi. Maliɗage, “Nami koleni ɓana hajaloray ana-hareha. Nyi kalinadi ata tannam ila ɗabayarana walkatak tabaranai Kaisar, mono linage Nyiꞌna Kristus, ɓa wuy Raja.”

3Nyiɗawei Pilatus manakanuka-Yi, “Yau takkaꞌna Raja ata Yahudi?”

Nabalehawei Yesus, “Nyiꞌwe nahatakkim.”

4Malinagei Pilatus tabaraɗa raɗa kapala imam mono ata buta, “Nauwa waleg koleꞌman jalana naɗe ata tannam kahoku-Ni.”

5Tabolo yiɗɗa reihge ɓaɗa maɗuha, maliɗage, “Nyi na orahay raɗa ata ta tangngage tana Yudea gaɓɓage hareha Roma, waige hanuwa-Na. Nakapuge walta tana Galilea, mono ɓatauge naɗikɓe nehe ta kota Yerusalem.”

Yesus ta aronai Herodes

6Kolei Pilatus ɓana rangewe nahatakɗa tutnai Yesus, mana matutra, “Naɗe ata, ata Galilea takkaɗuyi?” 7Kole ɓaɗa taknage Pilatus naɗai Yesus ɓawalna ta hadau kaɗaana ta kab kawahanai Herodes, Pilatus nahangidini Yesus tabaranai Herodes, katangra ɗaa ʄalana ta kota Yerusalem. 8Herodes nadahhawe atena kole ha etayi Yesus, oro baɗa madiiwe rangewe tut-Na mono nakamaꞌge eta-Yi. Nyi namanege ɗaꞌwe etayi Yesus ɓana rayige kahekagaina. 9Nyiwe orogei Herodes mana butayi hakanukanani Yesus, tanyiɗuwei Yesus walna baleha hingmayi. 10Raɗa kapala imam mono raɗa gurr agama ata Yahudi kaɗaana neɗo ɗadede, mono reih ɓiꞌtahowe ɓaɗa hajalai Yesus. 11Herodes mono tangngaɗa tentarana ɗamalengo waini mono ɗapadday; ɗatauni kalabbe kamanadana maɓegge ɗangid haggay tabaranai Pilatus. 12Nuthona Herodes monoi Pilatus ɗahamuh wikhona, tabolo ta laɗo neɗo mema ɗaha ole atena.

Yesus ɓa pohtani houk mate

(Mat. 27:15-26; Mrk. 15:6-15; Yoh. 18:39--19:16)

13Pilatus nakahhayi raɗa kapala imam, raɗa ngora ata Yahudi, mono ana-hareha, 14malinage tabaraɗa, “Mi ngidmin naɗa ata tabaragu mono malimɗage ɓa nyi kahajaloray ata buta. Nna ɓatauge, nna ta aromi nauwa baɗa harehaguni, tabolo waleg koleꞌmanage wu ak japata pahawaumin tabara-Na. 15Tauɗa ʄalage hakolenai Herodes, nyiʄalawe oroge mana hangidi haggani Yesus tabarama. Naɗe ata laꞌma harayina wu ak karakana ɓa hokun waige houk mate. 16Oro ɓatauɗage nauwa enga palgu-Ni mono pahala-Yi.”

[17Nahiy laɗo rayarame Paskah, Pilatus napahala ɗaho wu ata walta gall tabaraɗa ana-hareha.] 18Tangngaɗa ata kamakahha neɗo ɗakawula, “Hamatey naɗo ata! Pahalai Barabas tut manami!” 19(Barabas matagalluy oro magaɓɓana tabara kahareha Roma kaɗaꞌ ta kota Yerusalem mono oro hamatena ata.)

20Pilatus nakab atege pahalai Yesus, nyiwe oroge mana hanewe piwal tabaraɗa ata buta. 21Tabolo yiɗɗa ɗakawula, “Kadailon Nyiyo! Kadailon Nyiyo!”

22Ɓegge nna hadalwuda waige Pilatus nakanuka tabaraɗa, “Tabolo agawe hajalana? Nauwa walaꞌma wu ak jala hakole tabara-Na karakana ɓa hokun wain houk mate! Nauwa enga palgu-Ni mono pahala-Yi.”

23Tanyiɗuwe ɗakawula hakitana waige kulhaɗa, naɗai Yesus kadailo ɗahoni. Mono haddage kawulaɗa naɗaꞌwe ɓakadailoni Yesus. 24Nyiwei Pilatus mana pohtawe houk mate tabarai Yesus ɗoukge hakab ateɗa raɗa ata. 25Mono napahalai tabaraɗa naɗa ata haraiɗa. Naɗa ata hataman ta gall oro magaɓɓana tabara kahareha Roma mono ɓana hamate ata. Maɓeggei Yesus naharakani tabaraɗa tannam kaɗa rayige ɗoukge hakab ateɗa.

Yesus kadailoni

(Mat. 27:32-44; Mrk. 15:21-32; Yoh. 19:17-27)

26Maɓegge tentara Roma ɗangidiyi Yesus ta bal kota Yerusalem. Ta til lara, yiɗɗa ɗataɓokay wu ata kangaranai Simon, kawalta kota Kirene, katangra tama ta kota Yerusalem. Yiɗɗa ɗapakhay ɗitai naɗa yay kadailo mono naɗokuni Yesus walta lira.

27Buta ata kahaɗouk ta liranai Yesus. Ta jongaɗa ɗaa ʄaladi kapirrana lawai. Raɗa lawai ɗahooni mono ɗakaɗehani Yesus. 28Taboloi Yesus nagilaka tabaraɗa mono linage, “Mi lawai Yerusalem! Ilam hooɗaga Nauwa. Hooɗage tau ɗaum mono raɗa anami. 29Oro enga amge rah mayilla aika anahingna tomage ata maliɗage, ‘Hadda maringna raɗa lawai aika kalwe hatii, aika kalwe ha ana mono aika kalwe pahuh-anana!’ 30Mono ɗaa ʄalad kalina tabara raɗa letena, ‘Ɓirakagama nami!’ Mono tabara analetena, ‘Ɓonyigama nami!’ 31Ɓaɗa baꞌ rayi tauɗaɗage ata nne tabara-Gu ai kajala, yiɗɗa enga atwiꞌhoge ɓaɗa rayige kajapata tabaram ata jala. Nauwa meragun yay kamoroho aika dukana ɓana mutt ta latti, tabolo mi meramin yay mate kadukana ɓana mutt ta latti.”

32Ɗaa ʄaladi ɗuɗa ata japata, hangidɗa tannam kahouk mate ole ɗangani Yesus. 33Kole ɓaɗa ɗik ta hadau kangarana ‘Hadau koɓaa tak’, yiɗɗa ɗakadailoni Yesus mono raɗa ɗuɗa ata japata. Wu ata tabbara kawanana mono wu wal tabbara kaliinai Yesus. 34Ɓeggei Yesus nahabayang, “Ama, hawalkad yiɗɗa! Yiɗɗa walɗa tadaꞌmawe agawe harayiɗa.”

Kalabbenai Yesus ɗaɓawe-ɓawei neɗo ta jongaɗa waina mowala. 35Tangraɗa raɗa ata kadede neɗo eta kahhawe nna kaɗaꞌ, ngora ata Yahudi ɗaterekai Yesus, liɗage, “Nyi nahatoulkaɓeyi ata heka; kamahoge ɓatauge kanahatoulka wikɗauna, ɓa Nyi takkaꞌna Raja kahatoulka-manemara hapedenai Alla!”

36Raɗa tentara ɗatereka ʄala-Yi. Yiɗɗa ɗamai mono ɗayiin anggur mayege tabara-Na. 37Maliɗage, “Nyi ɓa Yauka raja ata Yahudi, hatoulka wikim!”

38Tabbara ɗete yayu kadailonai Yesus, namatulhawe nne hanewe: “Nyiꞌna naɗe Raja ata Yahudi.”

39Naɗa wu ata japata hadailo neɗo napaddai Yesus. Malinage, “Ɓa Yau takkaꞌna Raja kahatoulka-manemara, ɓatauge hatoulkawe tau-Mu mono nami!”

40Tabolo naɗa wu wal ata japata napaɗekai naɗa olena, linage, “Ahha yau walem madautani Alla? Yau mono Nyi mera hibawe houk mate, 41tabolo houkda yitta kaɗuɗana natuɓawe harayida. Tanyiɗuwe Nyi walna jala hingmana!” 42Malinage tabarai Yesus, “Apekiwa nauwa, nim ɓam mai ɓa Rajawu!”

43Malinagei Yesus tabarana, “Hatenawela, nehe laɗo yau enga olemu-Ga ta Firdaus.”#23.43 Firdaus halinawe nyiꞌwe sorga, hadauɗa ana-huhnai Alla kole ɓaɗa mate.

Matenai Yesus

(Mat. 27:45-56; Mrk. 15:33-41; Yoh. 19:28-30)

44Neꞌna matalaɗo walna magakahaꞌmana, mono ngaradukage loɗa nakapagta hingge, ɓakatutkawe walta didara laɗo kahha ɓana peil matalaɗo. 45Neɗa mema ʄala kaba kalla kahapawe koro teingna lar ta Ummanai Mori, namajirraka hameragige. 46Maɓeggei Yesus nawadge kawulana, “Ama! Lar ta limma-Mu yii-Guge ngahug!” Ɓewe hanewe tauɗana, Nyi matenage.

47Kole kapala tentara etawe agawe kabaɗa ɗaꞌ, nyi naɗaikayi Alla. Malinage, “Tautakkage, Nyi walna jalaꞌma!”

48Tangngaɗa ata buta kamai neɗo tut torrowe, kole ɓaɗa etawe agawe kaɗaꞌ, yiɗɗa tangngaɗa hagga waina maropo ate. 49Mono tangngaɗa olenai Yesus, yapgaudi raɗa lawai kaɗoku-Ni walta tana Galilea, ɗadede dikorau maɗa etawe tangngage nna kaɗaꞌ.

Yesus ɓa taanin

(Mat. 27:57-61; Mrk. 15:42-47; Yoh. 19:38-42)

50-51Ɗaan wu ata kangaranai Yusup, kawalta kota Arimatea ta tana Yudea. Nyi ata dahhay paha akaɗa ata, mono tangra remanage rahnai Alla ɓana halegewe hareha ɗaꞌ Raja. Loko nyi wui ata wal tabaraɗa ɓai ata Yahudi kahadda madehta, nyi walna hibaꞌmawe agawe hapohtaɗa mono harayiɗa olena. 52Naɗei Yusup nakako aroni Pilatus mono nakaraiwe karogonai Yesus. 53Maɓegge nahaburge karogonai Yesus walta yay hadailo, lohho na wuꞌhayi wain kaba kaka kanuɗaha. Ɓe neɗoge nyi nataanin lar ta rate naharayina ta lete wat. Nna rate wale kal waiꞌ mahoge. 54Naɗa laɗo, laɗo Limanan;#23.54 Laɗo Sabat ɓayapuni wal ɓana tama matalaɗo ta laɗo Limana, kahha ɓana tama matalaɗo ta laɗo Anna. mono paha inya waiɗage ɓaɗa aroge laɗo ngah mono habayangɗa ata Yahudi.#23.54 Karogonai Yesus gehaɗage taanin, toma aina tamaho matalaɗo oroge naɗa laɗo, laɗo Limanan. Kakaldamma ata Yahudi paha inya waiɗage tangngage, ai ɗikhon laɗo Sabat. Oroge raɗa ata Yahudi ɗangahɗaho rayi ulla, ta Laɗo Sabat ɗoukge houk agama ata Yahudi.

55Raɗa lawai kamai marangani Yesus walta tana Galilea ɗaɗokuni Yusup mono ɗa etawe neɗo rate. Yiɗɗa ɗa eta ʄalawe aganaɗawe karogonai Yesus ɓa taanin lar ta rate. 56Maɓegge yiɗɗa haggaɗage lohho ɗaha inyakawe karanu kaɓauburata mono minya ɓau burata tannam ka kuꞌhanage karogonai Yesus.

Ta laɗo ngah mono habayangɗa ata Yahudi, raɗa lawai ɗangah walta tangngadi harayi ullaɗa, tadanage ɓaɗa ɗoukge houk agama ata Yahudi.

Currently Selected:

Lukas 23: lmy

Highlight

Copy