Lukas 24

Morha hagganai Yesus

(Mat. 28:1-10; Mrk. 16:1-8; Yoh. 20:1-10)

1Ta laɗo Miggu, kokoka gaula, raɗa lawai kakoɗage ta rate ngidiyi karanu kaɓauburata paha inyakaɓeɗa. 2Kole ɓaɗa ɗikge neɗo rate, ɗaɗikkin wat hatonwai rate nama kogolaɓe. 3Maɓegge ɗatama lar ta rate, tabolo walɗa etaꞌmawe karogonai Mori Yesus. 4Tangraɗa ɓaɗa dede neɗo mono ɗaɓangara hangaɗage nna kaɗaꞌ, ɗaa hayaɗad ɗuɗa ata kawaina kalabbe kaka ɓiɓana ɗadede ta tabaraɗa. 5Yiɗɗa ɗamadauta takka, maɗa kawoʄo kahha ɗik ta tana, raɗa kaɗuɗana ata liɗage tabaraɗa, “Ahha mi mam mayegan ata morha ta jonga ata mate? 6Nyi walaꞌman nne. Nyi namorha haggaɓe! Apewela agawe hatakɓena tabaram ɓa neɗohoyi ta tana Galilea, 7‘Ana-Na Kaɗaꞌ Ata harakaɗahon tabaraɗa ata doku-jala, lohho ɗakadailoni, mono ta laɗo hatauɗawai, Nyi enga morha haggana.’ ”

8Nyiwe maɗa naamwe raɗa lawai tut hanewenai Yesus. 9Kole ɓaɗa hagga walta neɗo rate, yiɗɗa ɗahalarawe tangngage kaɗaꞌ neɗo tabaraɗa kabul ɗihana ana pahalewanai Yesus, mono tangngaɗa ata waɗeka kaɗokuni. 10Raɗa lawai kahalarawe, yiɗɗaꞌnaː Maria Magdalena, Yohana monoi Maria inyanai Yakobus, lohho raɗa lawai waɗeka ka oledi yiɗɗa. 11Tanyiɗuwe raɗa ana pahalewanai Yesus walɗa hatenaꞌmawe pahalaraɗa raɗa lawai. Oroge halaraɗa raɗa lawai aika tamai ta pahangaɗaɗa. 12Tanyiɗuwei Petrus nakaɗe mono nakako malai ta rate. Nyi nanyoko mono na elowe lar, ɓegge na etawe dukahege kaba kaka kanuɗaha. Naɓangara takka mono nahagga waina buta matutra lar ta atena tut agawe kabaɗa ɗaꞌ.

Yesus nahatingo wikna ta lara ka aro ta Emaus

(Mrk. 16:12-13)

13Ta laɗo nna mema ʄala, ɗuɗa ata kaɗokuni Yesus ɗakako ta ɗiha wu harona kangarana Emaus, ɓakatutkawe marauge kabulɗiha kilo meterage walta kota Yerusalem. 14Tangraɗa kako, raɗa kaɗuɗana ata hagapege dulkawe tutge tangngage nna kaɗaꞌ. 15Kole tangraɗa dulkawe mono hanonekana hangaɗa, Yesus mainage ɗahekayi lohho kako ole ɗangadi. 16Yiɗɗa ɗa etai Yesus, tanyiɗuwe ɗaage kahatodana ta mataɗa, nyiɗawe mawalɗa tadaꞌmayi ɓa Nyi. 17Malinagei Yesus tabaraɗa, “Agawe hadulkam ɓatangram kako ta til lara?”

Raɗa kaɗuɗana ata ɗangahu mono ɗatadoul oro milla ateɗa. 18Wu ata walta yiɗɗa kangaranai Kleopas malinage tabara-Na, “Magara yau ɗahe ata ɗiha hadau, aika tadawe nna kaɗaꞌ ta kota Yerusalem.”

19Malinagei Yesus, “Tut agawe?”

Maliɗa ɗummoge tabara-Na, “Agawe kaɗaꞌ tutnai Yesus ata Nasaret, Nyi wuyi Lede-liinai Alla. Hanewe-Na mono harayi-Na nabanud ɓiꞌta-pareha, ta aronai Alla mono ta arona tangngana ata. 20Tanyiɗuwe raɗa kapala imam mono raɗa ngora ata Yahudi, ɗaharakaɓen tannam kahouk mateni, maɓegge ɗakadailo-Ni! 21Ɗoukɗage ulge nam mamannen, Nyiꞌnala kahahoilayi ata Israel! Nehe laɗo, hatauɗa laɗowai ɓana mate. 22Kokana, kapirrana lawai walta jongama ɗahadadakama. Kokoka gaula yiɗɗa kakoɗage ta rate, 23tanyiɗuwe yiɗɗa walɗa ɗikkiꞌmage karogonai Yesus neꞌ bal. Lohho yiɗɗa ɗahagga mono ɗatakwe ɓaɗa etaɓeyi malaikat ɓaɗa haɗedala wikna, mono ɗatakwe ɓana morha haggaɓei Yesus. 24Kapirrana olema kako ʄalaɗage ta rate tanyiɗuwe walɗa etaꞌmawe karogonai Yesus, mono tenawe katauna hatakɗa raɗa lawai.”

25Maɓegge linagei Yesus tabaraɗa, “Mi hadda kabangamǃ Ahha mi mana ɓiꞌtahingwe ɓam hatenawe tangngage hatakɓeɗa lede-liinai Alla? 26Naɗa Raja Kahatoulka-manemara namayilla ulɗaho, ubna ɗikge manada-Naǃ” 27Lodogei Yesus nahalarawe tangngage kamatulha lar ta Jurata Ɓiha tut tau-Na, walta juratanai Musa kahha ta jurataɗa lede-liinai Alla.

28Kole ɓaɗa ɗahekawe harona Emaus, Yesus narayige mera hakitanage kako. 29Tanyiɗuwe yiɗɗa ɗaha ohai Yesus, maliɗage, “Ama, lihabbo tou ta hadauma oroge matalaɗo manar tamanage mono manar gaꞌnage.” Nyiwei Yesus mana ngooge tama maranga ɗangadi ta ummaɗa. 30Kolei Yesus ɓana ngoɗo yaa ole ɗangadi, nangalayi kababa mono wai linage tabarai Alla. Nyi na hiɓiyi kababa waid limmana, lohho nayiid tabaraɗa. 31Maɓegge mataɗa namaɓugerayi mono ɗatadayi Yesus. Tabolo nabunga hayaɗa walta jongaɗa. 32Maliɗage ɗiha-ɗiha, “Moꞌha ateda mana lagahara hingwe ɓana hanewe ɗangada yitta ta til lara, mono ɓana halaradage ngihge Jurata Ɓiha tabaradaǃ”

33Nna mema ʄala kaɗeɗage mono ɗakako hagga ta kota Yerusalem. Yiɗɗa ɗataɓokayi kabulɗiha ana hakodo halolenai Yesus tangraɗa makahha, mono ata waɗeka kaɗoku-Ni ɗaa ole ʄaladi. 34Raɗa ana hakodo halolenai Yesus liɗage tabaraɗa kaɗuɗana ata, “Tauɗa takkage, Mori Yesus morha haggaɓe! Nyi nahaɗedala wikɓena tabarai Simon!”

35Raɗa kaɗuɗana ata kaɗoku-Ni ɗahalara ʄalawe agawe kaɗaꞌ ta til lara, mono agalinawe ɓaɗa tadayi Yesus kole ɓana hiɓiyi kababa.

Yesus nahaɗedala wik-Na tabaraɗa ata kaɗoku-Ni

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36Tangraɗa raɗa ata kaɗoku-Ni ɓaɗa halarawe kaɗaꞌ, hayaɗawei Yesus nadede ta jongaɗa mono linage tabaraɗa, “Hoila-manemaram.”

37Yiɗɗa ɗakadadaka mono ɗamadauta oroge ɗahawauge ɓa etaɗage kareihwolo. 38Tanyiɗuwe malinagei Yesus tabaraɗa, “Ahha miyo mam madautami mono dudalwe atemi? 39Torrogad limma-Gu mono leɗu-Gu. Nauwaꞌna nne! Naro-Ga mono kam hamatara-Ga oroge kareihwolo ai ɗaamo riina mono kanaana katauna ha etam ɓatauge tabara-Gu.”

40Tangrage ɓalinai Yesus, Nyi nahatingodi limma-Na mono leꞌ-Na tabaraɗa. 41Ɓatangrahoɗa ai ɗahatenawe oroge al eged ateɗa mono hangatara, Yesus nakanukayi tabaraɗa, “Mi ɗaakaꞌna ha yaam nehe?” 42Yiɗɗa ɗayiin tabara-Na kadibka kaboko hatuun. 43Yesus nangalai naɗa kaboko mono nayaan ta aroɗa.

44Maɓegge, malinagei Yesus tabaraɗa, “Raɗe yiɗayla hatakɓe-Gu tabaram ɓag olehogimː agawe kamatulha tutug Nauwa raɗa lar ta Juratanai Musa, ta Jurataɗa Lede-liinai Alla mono ta Jurata Lawitnai Daud naɗaꞌ ɗahoyi.”

45Maɓeggei Yesus naɓugeraɗage pahangaɗaɗa kaɗa yappawe halarana Jurata Ɓiha. 46Malinage tabaraɗa, “Neɗo lar ta Jurata Ɓiha, ɗaage kamatulha naɗa Raja Kahatoulka-manemara, namayilla ɗaho, namate mono namorha hagga hatauɗa laɗowai. 47Tauɗa ɗummoge waige ngaranai Yesus Raja Kahatoulka-manemara, hatodo-talara ɗahowe tabara tangngana ata kaɗa ʄarra ɗaho, monoi Alla nahawalidi doku-jalaɗa. Mono nna lii, ɓa hatalarahowe walta kota Yerusalem kahha ta hup tana. 48Miꞌnalage ka eta ɗauwe mono kam talaraɗahoge tangngage nna ta ata heka. 49Mono Nauwa enga hangiidgimin Wad Ɓiha-madnai Alla, katauna hajajɓenai Alla Ama tabarami. Tabolo mi engaɗahom harema ta kota Yerusalem, kahha ɓa ɗaage ɓiꞌta-pareha waltai Alla tabarami.”

Yesus namakeketa ta sorga

(Mrk. 16:19-20; Kis. 1:9-11)

50Ɓe neꞌge, Yesus nangidiyi yiɗɗa huuna ta bal kota kahha ta harona Betania. Neꞌ bal Nyi nakeketayi limma-Na, manahamaringi yiɗɗa. 51Tangranai Yesus ɓana rayige nna, Nyi makeketanage ta sorga napahewa ɗangadi. 52Kole ɓaɗa etawe nna kaɗaꞌ, ɗakawoʄo-kataba tabarai Yesus. Ɓegge haggaɗage ta kota Yerusalem waige ate kalagahara takka. 53Ɗiha laɗo-ɗiha laɗo ɗamakahha ta Ummanai Mori mono ɗa ɗaikayi Alla.

Currently Selected:

Lukas 24: lmy

Highlight

Copy