Lukas 20

Ngora ata Yahudi kanukawe kawahanai Yesus

(Mat. 21:23-27; Mrk. 11:27-33)

1Ɗaage ɗiha laɗo Yesus nahanuwad ata kaɗaana lar ta Ummanai Mori, mono natalarage Lii-Dahha tabaraɗa. Neɗa mema ʄala ammidi raɗa kapala imam mono raɗa gurr agama ata Yahudi, oledi ngora ata Yahudi. 2Maliɗage tabaranai Yesus, “Takmage tabarama aga kawahawe hawaimu ɓam rayid raɗa tangngad, mono iyay kayiiguge nna kawaha tabara-Mu?”

3Balehanagei Yesus, “Nauwa enga kanuka ʄalagim, takgage tabara-Gu, 4Yohanis ɓana hariha ata iya kawahanage? Kawahanai Alla waleka kawaha ata?”

5Halegeɗage ɓaɗa woroge, “Yitta ɓada takkawe, ‘Kawaha waltai Alla,’ Nyi enga linada, ‘Nyiɓatauɗage, ahha mi aim hatenaɗam tabara-Na?’ 6Tabolo ɓalida ɗalkage, ‘Kawaha walta atawe,’ tangngaɗa ata enga tukɗada watu, oronage yiɗɗa ɓaɗa hatenai Yohanis ɓa ɗiha wui lede-liinai Alla.” 7Huphadage ɗabalehawe, “Nam walema tadaꞌmawe ɓa iyai kayiin kawahai Yohanis ɓana hariha ata.”

8Nyiwe malinagei Yesus tabaraɗa, “Nyiɓatauɗage, Nauwa waleg tak ʄalaꞌmawe tabarami iyanage kawaha ɓag rayid tangngad raɗe.”

Lii-hatuʄa raɗe ata ka ullana ta oma anggur

(Mat. 21:33-46; Mrk. 12:1-12)

9Yesus dulkanan naɗe lii-hatuʄa tabaraɗa ata buta, “Ɗaan wu ata kahamulawe bat oma anggurna. Nyi nakahewawe nna omana tabaraɗa ata ka ullana ta oma, maɓegge kakonage ta tana ata mono namoʄana bal. 10Ɓaɗikge rah kopiy wu anggur, mor oma nahalewai wu ata pahalewana tabara ka ullanage omana, mai hibay tagna. Tabolo raɗa ata ka ullanage omana ɗapaluyi naɗa ata pahalewana mono ɗahaleway hagga luyo. 11Naɗa mor oma nahalewa piwal wu ata, tabolo naɗa ata pahalewana ɗapal ʄalay mono ɗahamakkeyi, lohho ɗahaleway hagga luyo. 12Ɓewal naɗa mor oma nahalewa piwal ata hatauɗaway. Tabolo naɗa ata pahalewa ɗapal ʄalahoy kahha ɓana pota mono ɗaɓaitan ta bal oma. 13Huphadage naɗa mor oma nahanewe lar ta atena, ‘Nauwa agaɗaho harayigu? Nauwa halewaɗahoyi ana ɗaugu hamanawaragu. Enga ɗaha-akagani!’ 14Tabolo raɗa ata ka ullage nna oma ɓaɗa etai naɗa anana kaɗauge nna oma, liɗaɗage ɓaɗa hanewe ɗiha-ɗiha, ‘Naɗe nyiꞌna nim kaɗauge nne oma. Mai kada hamateyi kada ɗaunage nne omana.’ 15Maɗa werakani ta bal oma, mono ɗahamateyi.”

Nyiwe Yesus manakanukayi raɗa ata buta kaɗaana neɗo, “Ɓatauge, agana harayina naɗa mor oma anggur tabaraɗa raɗa ata ka ullanage omana? 16Nyi enga namai mono nahamateyi raɗa ata ka ullanage omana, maɓegge nayiiwe nna oma tabara ata heka kaɗa ullanage omana.”

Kole ɓaɗa rangewe, liɗaɗage raɗa ata tabarai Yesus, “Walna ɗaꞌmawe nna hatakkim!”

17Yesus nahamataradi, malinage, “Nyiɓatauɗage, agawe ngihge nne wu mata Jurata Ɓiha kalinanaː

Wat haɓaitaɓeɗa tukang, naɗaꞌɓe wat kahadda ɓanning.’#Mazmur 118:22

18Tangngaɗa ata kamoun neꞌ ta wat enga ɗamauha, mono naɗa wat ɓana mounka, iyayi haɓirana enga namuꞌka mono naɗaꞌ kabka.”

Tut yii walkatak

(Mat. 22:15-22; Mrk. 12:13-17)

19Raɗa gurr agama ata Yahudi mono raɗa kapala imam ɗatadawe naɗa lii-hatuʄa ɓa tabaraɗa hadau aronagei Yesus. Oro ɓatauɗage maɗa kamaꞌge yappayi Yesus neɗo mema ʄala, tabolo ɗamadauta tabara ata buta. 20Nyiwe maɗa mayegana mahiggo kadahha. Ɗabayarana ata kamera kanogo ata lurha, kaɗa lekoi Yesus ledege matutraɗa tannam kapik kolen jalana, maɓegge ɗaharakani ta kab harehanai gubernur. 21Nyiwe raɗa ata habayaraɓe liɗage tabaranai Yesus, “Ama Gurr, nami matadawe tangkahage hatakkim mono hanuwam nna tenawe. Ama, nami matadaʄalawe ɓam hanuwawe tutge hakab atenai Alla tabara kaɗaꞌ ata, katautakkanage, oronage aimpedena ata. 22Oro ɓaɗaag Ama, kaɓahoge kam takkiwe tabarama, ɗoukge uk-pata agamada, ɗaꞌkaɗuwe yii walkatak tabarai Kaisar kapalage kahareha Roma, nyiɓa wale?”

23Taboloi Yesus natadawe matipɗa. Oro ɓatauɗage, Nyi malinage, 24“Kaɓahoge hatingogan tabara-Gu wu amaha kaka. Haɗa mono iya ngaranage nne?”

Balehaɗa, ‘‘Kaisar!’’

25Malinagei Yesus tabaraɗa, “Ɓatauɗage, yiinadi Kaisar agayi haɗauna, mono tabarai Alla, agayi haɗau-Na.”

26Ta aroɗa ata buta yiɗɗa walena ɗaꞌmawe ɓaɗa kolen wu ak jalanai Yesus. Yiɗɗa ɗaɓangara rangeyi baleha-Na mono kaɗanna heɗage.

Tut mourha hagga walta mate

(Mat. 22:23-33; Mrk. 12:18-27)

27Ɗaadi ata walta kalibbo Saduki kamai tabarai Yesus. (Yiɗɗa wui kalibbo katakwe raɗa ata kamateɓe walena hil morha haggaꞌma). Yiɗɗa ɗakanukai Yesus, 28“Ama Gurr, Musa ɓana tulhayi naɗe uk-pareha tabarada: Wu kaɓaan kamate mono ailaka anana, nyiwe anguwuna naha-umma ɗangaɗahon naɗa lawai ɓal tannam kanayiin wallana tabara naɗa ata kamateɓe. 29Ɗaadi pit kaha oleɓaina. Naɗa ana ɓodi ha ummana, maɓegge namate laꞌma anana. 30Tabalge alna haɗuɗawai naha-umma ɗangani lawai ɓal, tabolo nyi namate wale la ʄalaꞌma anana. 31Kahamera naɗaꞌ ʄalawe ta angwuna hatauɗawai mono kahha hapitwai. 32Ɗajalage naɗa lawai namate ʄala. 33Nim ta laɗo rahge ɓahamourha haggayi ata mate, iyaɗayi laina naɗe lawai? Oroge kapitna kaha oleɓaina ɗaha-umma ɗangaɓeni.”

34Balehanagei Yesus, “Ata kamourha ɓatauge ɗaha-ummana, 35tabolo raɗa ata kamarakka ɓahamourha haggayi kole hamate mono mourha nim ka amna, yiɗɗa waleɗa ha-ummaꞌmana. 36Yiɗɗa walɗa hil mateꞌma ɗatuʄaɗai malaikat. Yiɗɗaꞌna ana-huhnai Alla oroge yiɗɗa nahamourha haggaɓeyi walta mate. 37Nyiɗawei Musa natakwe kahira, raɗa ata kamateɓe engana hamourha haggaɗahoy. Nna lar hatulhana tut tarawari karewo aika mut kaɗaꞌ ta lete Sinai, nyi natakkiyi Mori, ɓa Nyiː ‘Allai Abraham, Allai Isak, mono Allai Yakub.’ 38Naɗai Alla wale Alla ata mateꞌmayi! Nyi Allanani tangngaɗa ata kamourha! Oroge ta aronai Alla, tangngaɗa ata ɗamourha.”

39Kapirrana gurr agama ata Yahudi maliɗage, “Balehamu Ama Gurr nna dahha takkawe.” 40Kole neꞌge ata walta kalibbo Saduki mono ata walta kalibbo Farisi wale hil laꞌma laraɗa ɓaɗa kanukai Yesus.

Tut Raja Kahatolka manemara

(Mat. 22:41-46; Mrk. 12:35-37)

41Yesus nakanukayi ata buta kaɗaana neɗo, “Agalinaꞌkawe ɓatakwe naɗa Raja Kahatoulka manemara ɓawalla-wunani raja Daud? 42Raja Daud ɗauyo linage lar ta jurata lawitna,

‘Mori Alla linaɓege ta Morigu:

Ngoɗowu tabbara kawana-Gu,

43kahha Nauwa ɓagrayigudi muhu-Mu ɗakawoʄo tabara-Mu.’#Mazmur 110ː1

44Raja Daud ɗau ‘Mori!’ linani naɗa Raja Kahatoulka manemarai, aganaꞌkawe Nyi ɓawalla-wunani raja Daud?”

Yesus naha apeyi ata kaɗoku-Ni tannam ilaɗa koɓo ate katauna raɗa gurr agama ata Yahudi

(Mat. 23:1-36; Mrk. 12:38-40)

45Tangraɗa ata buta ɓaɗa rangeyi Yesus ɓana hanewe, Nyi malinage tabaraɗa kaɗoku-Ni, 46“Ha ategela tabaraɗa gurr agama ata Yahudi. Yiɗɗa ɗabaige kako mamai waidi kalabbe madakkaɗa kamalau, mono ɗabaige ɓaha akadi ta pahara. Yiɗɗa ɗabaige ta hadau paha aka nna lar ta umma hadau kangoteɗa mono ta woleka. 47Yiɗɗa ɗamatip ta lawai ɓalu mono karamaɗadi ummaɗa. Mono ɗatoniy japataɗa waige habayangɗa kamalau. Nna ɓiꞌtawe houkɗa nimlage!”

Currently Selected:

Lukas 20: lmy

Highlight

Copy