Lukah 18

Na lii-pangearang na mawinni ɓalu ʄaka na maɓotahu palakara

1Hi Yehu nalolukuya nama hangina na lii-pangearang ta ana pahakoala-Na kaɗa habaya pangalang ʄaka abi taloaʄaha awina. 2Hi Yehu napanewi, “Ta mahangin na koata einya hatou na maɓotahu palakara dama mangeꞌatunya hi Alla, ʄaka dama palling oali touna. 3Ta koata nou einya na mawinni ɓalu napabirra wudalengang ana halaku ta maɓotahu palakara, ana kareiya kana dediganya na palakaragu, awina. ‘Tuluga nahagagunya na geꞌagu,’ wina na mawinni ɓalu nou. 4Namadei lengaka na maɓotahu palakara adana weaku pagatanya na mawinni ɓalu. Jiaɗinguka na maɓotahu palakara pangaɗangnanyak, ‘Laka daku mangeꞌatuɗinya hi Alla ʄaka daku palliɗing oali tougu, 5Jiaɗinguka na mawinni ɓalu nei ami pangalanya lahi nyouwa, reihi kalunguya kutulukananya na palakarana. A da tonoukagunyaka, enga ami pangalanya ana pahadukawa.’ ”

6Jiayaka hi Moiri hiwina, “Mi pa atinya agananya nahatikina na maɓotahu palakara dama teꞌa balibapa nou! 7Japa na maɓotahu palakara dama teꞌa balibapa, ɗunna nadedinanya na palakarana na mawinni ɓalu, pareih-reihing hi Alla enga nagataja ɗa huhu-ana ɗa papedi-Na, ɗama pa oha pangalanya riɗung-laɗɗu. Hi Alla dana hilu pamadeimaja ana pagapiɗaja ɗa habayanguɗa. 8Wigugim: hi Alla nageaha dedija ɗa palakaraɗ! Jiaɗinguka a amikanyaka na Ana Tourara, eikaɗinguha patomana tou nama manni-Nya ta pinu-tana ya?”

Lii-pangearang hatou waling ta kaɓuangu Parihi ʄaka nama tagu karei hikatiku

9Natou nama peaka wikina mapaɗening ʄaka nama hawawa oalina, hi Yehu nalolukuya na lii-pangearang ya, wina, 10“Eija ɗama tou maɗuaha ɗama halaku ta ɓei Umma Pingi Pahabayangu tou Yahudi lipa habayang awiɗ. Hatou tou Parihiya ʄaka hatou ʄella matagu karei hikatikuya. 11Natou waling ta kaɓuangu Parihi nou nahika wikin ana dedi manga hina habayang, ‘Ou Alla, waikiwuka wigug, kaɗang nyouwa daku hamearamang ta tou hawanguk, nama awut, nama palaping, ʄaka nama jurak. Kupamalanguwu kaɗang nyouwa daku hamearamangu tama karei hikatiku noulau. 12Nyouwa kupaduangu hangi miggu daku angu daku inung, ʄaka kumanuatu-Gu hangi waling ta habulu waling ta ngaladuka ɗapakolligu.’ 13Jiaɗinguka nama tagu karei hikatiku nadedi marou oata ʄaka dana tara-banimangu ana tangara ta awang. Nahamuku ʄaka na taꞌa wikina ana habayang waingu milla ati hina panewi, ‘O Alla, millakiga ati nyouwa, tou doku-jalawa!’ ”

14Hi Yehu napanewi, “Miwaigah, ta ɗalu ɓaliɗa ta umma ta-taguɗ, nama karei hikatiku ʄiaya napakaana hi Alla da ʄiamaya natou waling ta kaɓuangu Parihi nuttu. Kaɗang natou nama paʄaga wikina enga hawawananya hi Alla; ʄaka natou nama hawawa wikina enga paʄagananya hi Alla.”

Hi Yehu napamariija ɗa lakeaɗa

(Mat.19:13-15;Mrk.10:13-16)

15Eija ɗa tou ɗamaraija ɗa lakeaɗa merrah lahi Yehu, kana tauya na limma-Na ta katikuɗa kapiku pamarii-malalanaja, awiɗ. Ɗa ana pahakoala-Na hi Yehu ɗa itahaka, ɗa gagutuha ɗa tou ɗangu. 16Jiaɗinguka hi Yehu nakamaikaja ɗa lakeaɗa hiwinaja ɗa ana pahakoala-Na, “Temakaɗija ɗa lakeaɗa ka amija lahi Nyouwa! Abi heiruɗija, kaɗang ɗa tou ɗama toungu ɗa lakeaɗa hei, ʄiahaka ɗamaʄaʄi huhu-anana hi Alla. 17Minamuya! Natou nama kaayah hi Alla anapareaha ta morikuna, toungu ɗa lakeaɗa ɗama manudu ta ina-amaɗ. Natou dama kaaya hi Alla dana piakumangu anaʄaʄi huhu-anana hi Alla.”

Larana natou poati

(Mat.19:16-30; Mrk.10:17-31)

18Hatou na kapalang tou Yahudi napatutur lahi Yehu, “Ama Gurr nama kalung, gananyah nahawolugu kapiku kolligunya na morik-malodung?”

19Hi Yehu natuturuya, “Gahi wimuliga Kukalung? Da eimangu makalung, ʄiapaya hi Alla. 20Ou mupeajaka ɗa lii-pareahana hi Alla: ‘Abi jurakɗing, abi hamatiɗing, abi keaɗuɗing, abi pahaki pakituɗing, ʄaka mupa akaja ɗa amam ɗa inam.’ ”

21Nagapiya natou nou, “Ngaladuka ɗa lii-pareaha hou kupahalaku bolluhaka waling ak ɓuang.”

22Naranguyaka nou, hi Yehu winanyaka, “Ei ʄellapanyah nama hangina kaum pahalakuya: Muɗaga bolluja ɗa tagumu, ɗa hiiɗa muwoaɗaja ta tou milla, ʄaka ou enga kollimunya napoati ta hurga. Mengaka nou amiguya kaum keri-Wa.” 23Ana ranguyaka napatikina hi Yehu, natou nou hadukananyaka na atin kaɗang na poati majakurung.

24Hi Yehu napeanya ana haduka na atina, hiwinanya, “Naharuwi mema natou poati anaʄaʄi huhu-anan hi Alla! 25Naharuwi na unta ana tama linoung ta taboanga padeitu, ʄiaɗinguka reihi haruwilyah natou poati anaʄaʄi huhu-anan hi Alla.”

26Natou ɗangu nama ranguya hi Yehu awina noungu, ɗapatutur, “Atonoukanaka gearakayak nama kolling manumara?”

27Hi Yehu napagapija, “Gananya dama mapiakung ta tourara, na mapiakung lahi Alla!”

28Manga hi Petruh napanewi, “Ama, nyiama maɗuʄakjak ɗa ummama ama keri-Wu.”

29Winaja hi Yehu, “Manninguhǃ Natou nama ɗuʄakunya na ummana, na arweina, ɗa anguwuana ɗa anawinin, ɗa aman ɗa inan, a da ɗa anan, kaɗang ana pahalakuya na lii-pareahana hi Alla, 30natou nou enga ʄiaya ana kolli paɗangu ta dalar ya, ʄaka ta dalar nama aminya enga kollinanya na morik-malodung.”

Hi Yehu padilwuda wainanyak ana napanewinya nalara mati-Na

(Mat.20:17-19;Mrk.10:32-34)

31Hi Yehu napakaɓua meahaja ɗama toum habulu maɗuaha ɗa ana pahakoala-Na, hiwinaja, “Mirangu! Ya iata hagangdanya ta koata Yeruhalem. Noulau, ngaladukaɗa ɗapatuliɗa ɗa nabi nalarana na Ana Tourara enga naʄaʄi. 32Enga ɗaharaka-Nya ta tou dama Yahudi, ɗayeki-Ya, ɗapamakii-Ya, manga hiɗa padouni-Ya. 33Ɗa pamawilla-Ya lapakung hiɗa hamati-Ya, ʄiaɗinguka ta laɗɗu katiluna, enga morik ɓali-Na.”

34Ngaladukana nahatikin hi Yehu daɗa peamanya ɗa ana pahakoalan. Na ihi patikina nakaɓuninguh lahi ɗuɗa. Daɗa peamanya gananya nahawuku-Na.

Yehu napateggahuya natou milla nama kaboala

(Mat. 20 :29-34; Mrk.10 :45-52)

35Hi Yehu ʄaka ɗama keriya ɗa tik hatomaka ta koata Yeriko, einya hatou natou kaboala nama ngoɗu ana karei-rei ta wiwi larangi. 36Ana ranguyaka natou ɗangu nama linoungu, patuturunanyaka, “Gananya nuttu?”

37“Hi Yehu, natou Naharet, liyangunanya ya,” wiɗanya

38Jiaya natou kaboala nou hina patiwung, “Yehu, anana hi Daut!#18.38 Anan hi Daut ʄiayaka nahawiɗang heaka tagun na Mehiah, na ‘Raja nama Pamanumara’. Millakiga ati nyouwa!”

39Natou ɗangu ɗama moulu, ɗagagutuya ʄaka ɗapaleawaya kawannar. Jiaɗinguka napatiwung reihi hawading oatayaka, “Anana hi Daut! Millakiga ati nyouwa!”

40Hi Yehu dedinanyaka ʄaka napaleawaha ɗa tou, “Marainya nim,” awin. Natomaka natou kaboala nou, hi Yehu tuturnanyaka, 41“Gananya nahawukumu kaku wolugunya?”

Natou kaboala nou, wina, “Moiri, nyouwa kaku ita wigu.”

42Manga hi Yehu winanya, “Mu itayay! Muteggah kaɗang na manningumu.”

43Ta rahi nou ʄella ailolu itananyaka, ʄiayaka hina keriya hi Yehu ʄaka hina pamalanguya hi Alla. Aɗa itayaka namaʄaʄi ɗa tou ɗangu wuatu-hali bolluɗanyaka hi Alla.

Currently Selected:

Lukah 18: wnk

Highlight

Copy