Lukah 19

Hi Yehu ʄaka hi Hakeuh

1Hi Yehu tomananyaka ta koata Yeriko, ana halaku linoungu ta koata nou. 2Ta koata nou einya hatou na kapalang tagu karei hikatiku nama poati. Nama ngarang Hakeuh. 3Naparuhung kaku itaya gearaya hi Yehu nou awin, ʄiaɗinguka alli ɗanguɗa ɗa tou ʄaka hi Hakeuh napadak ʄiayak hi dana piaku pa itaya hi Yehu. 4Napalai ana mouluja ɗa tou ɗangu, hina haa ta pingi kapilit, kapiaku itagunya hi Yehu peala nama linoungu awina. 5Ana tomaka hi Yehu ta pingi ai nou, natangara manga hi wina, “Hakeuh puru pageahangǃ Ya laɗɗu, Nyouwa lodung gunya ta ummamu.”

6Hi Hakeuh puru pageahangnanyaka ʄaka duku egi atiya ana kaaya hi Yehu. 7Jiaɗinguka ngaladukaɗa ɗa tou ɗama itaya namaʄaʄi huka atiɗanyaka wiɗaka aɗa panewi, “Yeihǃ Halaku lipadou noungunanyak ta ummana natou doku-jalaǃ”

8Ta ummana hi Hakeuh, nadedi hiwina lahi Yehu, “Moiri, ɗahapoatigu kutiꞌaruh akɓariha, hawanguk kuwoaɗaja ɗama milla hawanguk taguguja, manga gearaha ɗapaɗeki palopahugu ngawuɗ kuhaɓali pareihiɗaja pabatuwudang waling ɗahaɗekigu!”

9Manga hi Yehu winanya, “Ta laɗɗu ya, ou ʄaka ɗa oali-ʄaʄimu ta rongu ummamu napamanumaramika hi Alla, kaɗang ou wallanagu hi Abraham. 10Na Ana Tourara aminya ana manyeranya ʄaka ana pamanumaraya natou jallur.”

Na lii-pangearangu riti omahu rara

(Mat. 25:14-30)

11Ta rahi nou aɗa tik hatomaka ta koata Yeruhalem, ɗa tou ɗangu ɗama keriya hi Yehu ʄaka ɗama ranguya ana panewi, ta pangaɗanguɗa hi Alla enga geahana ana papareaha ʄaʄi Raja ta pinu-tana, wiɗa. Jiayak hi Yehu hina lolukuya na lii-pangearang ya, winaja, 12“Einya na marabba nama halaku ta tana marou, kaɗeɗikunya ʄaʄi raja wiɗanya, mangak hina ɓali ana pareaha ta padoungu wikin. 13Adaɗi na halakuha na marabba na kamaikaja ɗama toum habuluha ɗa atana, manga hina woaja taguɗa hatou-hatou hangi riti omah rara.#19.13 Ta hilu Yunaniː nawoaja hatou-hatou hangi mina. Hangi mina mearana na kaheawa kerang hangahu laɗɗu. Wina bolluja, “Miɗaga waija ɗa riti ya, lapakung akɓali.” 14Jiaɗinguka ɗa tou ta padoungu nou ɗa hukanya ati ʄaka daɗa buhamanya. Ta linak na marabba ana halaku, ɗuɗa paleawa ʄellaɗanyaka tou heaka halaku dutu keriya ʄaka wiɗa, ‘Nyiama dama weakumangu, natou nei aʄiakayaka nama ʄaʄi rajama.’

15Na marabba nou langa ɗeɗikɗanyak ana ʄaʄi raja, manga ɓalinanyaka ta padoungu pingi hawalina. Nakamaikaja ɗa atana ɗapa langa woana riti aɗa haganya, kaku peaja pirra ʄellakaɗiɗaka ɗama taba ɗapakoliɗa, awina. 16Na atan nama moulu aminya wina, ‘Marabba, nama hangi na riti omah rara nahawoamuga, kupahalakuyaka na ʄaʄi ʄellaka habulu riti.’ 17Na marabba nou winanya, ‘Na deha nahawolumu, ou ʄiawu na atagu nama kalung! Kaɗang ta laran nama merrah ou pamanninguwu, ʄiayak hikuɗeɗikugu kaum pareahaha ɗama habuluɗa ɗa koata.’ 18Na atana napatouma ɗuawaiha aminya, hiwina, ‘Marabba, nama hangina na riti, kupahalakuyaka na ʄaʄika lima riti ʄella.’ 19Manga na marabba hiwinanya na atan, ‘Ou kuɗeɗikugu kaum pareahaha ɗama limaɗa ɗa koata.’ 20Na atana napatouma tilluwaih aminya manga hiwinanya, ‘Marabba, nei na ritimu; kaborugunya ta kajirak kaba. 21Kumangeꞌatug marabba, ou tou wajalu raawu. Ou mudekiha dapa tagum, ʄaka mumaruhiha dapa rawimu.’ 22Na raja nou winanya na atana, ‘Ou ata nama irrak! Keriya napatikimu ou kuhukugu. Mupeaga nyouwa atou wajalu: nyouwa kudekiha dapa tagugu, ʄaka kumaruhiha dapa rawigu. 23Atounoukaɗina ou gahi damu woakah ɗa riti omah rara ta tou kana pahalakuha, toma akɓali ka eingu tabaɗ?’ 24Manga na raja nou hiwinaja ɗa tou ɗama dedi houng, ‘Ɗekiya na riti waling lahi ɗunna woananya na ata nama kolling habulu riti.’ 25Jiaɗinguka ɗa tou wiɗanya, ‘Marabba ɗunna langa kollinak habulu riti waling nama hangin.’ 26Na raja napagapija, ‘Namuya: natou nama langa eingun, enga woaɗanya mareihi ɗangu. Jiaɗinguka natou dama einguna, enga deki ɓali ʄellanaja gananya nama eingu lahi ɗunna. 27Jaka ɗa geꞌagu dama buhaga ak ʄaʄi rajaɗa, mimaraija himi. Hamati bolluha ta hagaguǃ’ ”

Hi Yehu natama ta koata Yeruhalem toungu raja

(Mat. 21:1-11; Mrk. 11:1-11; Yoh. 12:12-19)

28Na mengaka hi Yehu papanewinya ngaladukan, pangalananyak na halakuna ana moulu hagang ta koata Yeruhalem. 29Na tomaka ta lihi praing Betfage ʄaka ta Betania ta paledi Haitun, paleawanajaka ɗama touma ɗuaha ɗa ana pahakoalan halaku moulu. 30Hi Yehu winaja, “Halakumi ta paraingu nou habali ta hagami, ami tomakaka nou, enga mi itaya na ana kaledai#19.30 Na Keledai ʄiayak na maɗaga napakaleti, nama reihi merrah na ihina waling ta jara. nahapiingu. Na keledai nou daɗi pakaleti toumayah. Miɓukaruya na keledai nou ʄaka mi idiya nimi. 31A eikanguka tou nama tuturumi, ‘Gahimi ɓukaruya na kaledai nei awinakagimika?’ Wiminya, ‘Hi Moiri nama wukunya.’ ”

32Ɗama touma ɗuaha ɗa ana pahakoalan ɗahalaku, ʄaka ngaladukana nahawinangu mapatuꞌanguya. 33Tangir ɓukarɗanya na ana kaledai nou, na moirina napatutur, “Gahimi ɓukaruya na kaledai nei?”

34Ɗapagaping, “Hi Moiri nama wukunya.” 35Manga idiɗanyak na ana kaledai lahi Yehu, ɗakoapiɗa ɗapli healaja ta pinu keledai hiɗa gatanya hi Yehu ana ɗeatang. 36Tangir linoungun ana kaletiya na kaledai nou, ɗa tou ɗapalekaruha ɗakoapi ɓakuluɗ ta larangi.

37Ana tik hatomaka hi Yehu ta koata Yeruhalem, ta larangi nama kaburrung waling ta paledi Haitun, ɗa tou ɗangu ɗama keriya ɗakawulang aɗa wuatu-haliya hi Alla, waiwuka awiɗanya kaɗang ngaladukana na tada napakaɓarraɗengang napalanga itaɗa. 38Ɗa kawulang, “Wuatu-haliya na Raja nama aming ta ɗalu ngarana hi Moiri. Hi Alla napamarii-malala-Nya. Ya atouna, napiakuk na tourara ana moili ati ɗenganya hi Alla ta hurga. Wuatu-haliya hi Alla ta padoungu nama reihi ʄaga!”

39Ɗama touma pirraha ɗa tou waling ta kaɓuangu Parihi, ta joanga tou ɗangu, ɗapatuturu lahi Yehu, “Gurr paleawaha ɗama keriwu kaɗa kawannar.”

40Hi Yehu napagaping, “Wigugimǃ Aɗa kawannarkaka, ɗa watu hei ɗakawulang.”

Hi Yehu nahounya na koata Yeruhalem

41Hi Yehu namaraninyaka na koata Yeruhalem, na itayaka na koata nou, hounanyaka. 42Manga hiwina, “Oha awamika nyiami tou Yeruhalem, ami peapanya ya laɗɗu nama aminya aʄiawa nama idiya na moili atina hi Alla, ʄiaɗinguka na laran nou nakaɓuninguha lahi nyiami. 43Enga toma ɗiɗanya na rahin, ɗa geꞌami hou amija aɗa kapoangi giminya na koatami. Ɗuɗa ɗahowunya tana aɗa kalagileihunya na kangali ta koatami, kapiku piakuma ama paʄuʄang tama ʄaka ɗa ɗahikum nyiami waling bayayak.#19.43 Hanaɗuga ta tana Ihrael einya na kangali watu nama kullih ʄaka nama ʄaga nakalagileihunya na koata. Apataukak ɗa geꞌa ɗahowunya tana ɗawolu larangi hiɗa piaku patama ta koata. 44Ɗahamatim ʄaka ɗapamimiʄa pamaraigim ngaladukaɗa ɗa koatami, ʄaka dahilu hangimah watu kangali nama eingu ta padoungun, kaɗang nyiami dami pa atimanya ta rahi aminya hi Alla ana pamanumarami!”

Hi Yehu na tama ta ɓei Umma Pingi Pahabayangu tou Yahudi

(Mat. 21:12-17; Mrk. 11:15-19; Yoh. 2:13-22)

45Hi Yehu tamananyaka ta ɓei Umma Pingi Pahabayangu tou Yahudi, ʄaka walinouna ana wurutuja ɗama ɗagang houlau. 46Manga hiwinaja, “Einya nama matulihung ta Hurat Ɓakul, hi Alla winaː ‘Na umma-Gu, umma pingi pahabayanguya.’ Jiaɗinguka mi woluya padoungu pingi pakaɓuanguɗ ɗamakeaɗu.”#Yesaya 56:7; Yeremia 7:11

47Wehang-wehang hi Yehu napapeaka-panungang ta tou ɗangu ta ɓei Umma Pingi Pahabayangu tou Yahudi. Ɗa kapalang imam,#19.47 Imam ʄiayak natou nama ta paɗuana hi Alla ʄaka na tourara. ɗa gurr agama tou Yahudi ʄaka ɗa ɓei tou Yahudi, ɗakabu atinya pahamatiya, 48ʄiaɗinguka da eimang larangi aɗa pahalakuya, kaɗang ngaladukaɗ ɗa tou ɗakahilu pangalaya ʄaka ɗabuhang parangunanya napatiki-Na.

Currently Selected:

Lukah 19: wnk

Highlight

Copy