Romains 1

Ditimôgi

1O te me Paul môyanzine aJésus-Christ. Nzambé amasevoa me na amakudéga me. Namatômu na Jésus gôéékéda Tsangô éedi Eamôsoba.

2Matendeo MaNzambé matônigôa mane mamavovo apandôédi amatasa maNzambé mbe: Nzambé amavanga mbeego mbe angatôkudégéa Tsangô éedi Eamôsôba. 3Tsangône te éne éaMuana ANzambé, kumu asô n’anyô Jésus-Christ. Bôkudue wedi gôndé oma tétedi te David, môtômi môvôni atsenge. 4Ivô gôndé Gédidi SaNzambé, tétedi te Nzambé. Vamakundugangô va gatse ane amawani, ngudi yaTétedi dimatubéda mbe Jésus te Muana ANzambé. 5Nzambé amasingéa me mbe nasevou na nakudégu na Jésus gômbe angô anganeegedu. Gésooge sami te gôéweseda na gôndé Nzambé oma ahndé gô tsengeye yetso mbe eetsé Jésus mitéma miaô gémôtsumé paga, na agobédé angô. 6Anye dôta asi môsenge aRome nôndé g’ôkabôé ane aweseda me na gôndé Nzambé. Nzambé amanôbambéa gôéba môvo na Jésus-Christ.

7Nanôtendéa anye asi Rome nôbambéô na Nzambé mbe vagébakanye va tsina nôngaba môvo n’edi. Na mbe nôngatetu mbe asi mbumu éedi. Te mbe Nzambé, Tétee éasô n’anyô, na Jésus-Christ Kumu asô n’anyô anôétsa mate medi na gétabé sedi.

Paul amatasa gôékea na gô Rome gôéenana na ane ameetsa Jésus mitéma

8Ebégôe éamapanga, nakuméda Nzambé gô ina aJésus-Christ gôndé anye muetso. Kumane éanyô gameetsanye mitémamie na gôndé Nzambé gébé na paga, éôkanô tsengeye yetso. 9Ene évovo me tsapata. Gémonige sami te Nzambé, ône ayanzéa me na môtémami wetso gôétsua Tsangô Eamôsôba éaMuanedi Jésus-Christ. Angô asabômu gateta me miname manyô 10kuka yetso vavovo me n’edi g’ôsambô. Me naduka Nzambé ôkô amuene anyôngéyiô mbe avigéda me na gôndé anye. 11Me nookô tsôvé gôéena anye gômbe nanganôtsuéa môgôô ômeetsa Gédidi SaNzambé gôénôodeda na angô. 12Na va ngongone vane nookô tsôvé gôédigaa n’anyô gômbe mane mameetsa wa n’anyô mitémamie gématsumé paga, mangatôkasôgéda wa n’anyôene na wa n’anyôene.

13Ana aTéta agô mbumu éaNzambé, nanyôngéô mbe nômenya édué. Kuka diyekani namavanga môtôô na gôndé anye. Ivô ngu na deo noo tsiôngôé étimôga. Nanyôngéô mbe éyanzee yami va gatse anyô éba na tsoongo gandé éangô na tsoongo gô mavo mongo gô dipo tsenge. 14Nameetsô éyanza, ta madeo ésigôga édita gô môtéma ga égumba. Eyanzee te gôébuéda Tsangô nedué na gôndé oma muetso. Nabuéda éangô na gôndé éongo ékuma na éodo, na gôndé éongo ésaba n’eodo, na gôndé asi géneenga gévôni na gôndé ane asaba na géneenga. 15T’ebandô nookô tsôvé gôébuéda Tsangône Eamôsôba éaJésus-Christ na gôndé anye dôta asi Rome.

Ngudi dipôni dindé gô Tsangô Eamôsôba

16Me tsookô tsoyi gôénigôa Tsangône Eamôsôba éaJésus-Christ. Tsangô nedué étômenyeda ngudi yaNzambé dioboo muetso eetsa angô mitéma miaô. Mapangame te Ajuif. Buéyé n’ane asaba Ajuif. 17Endé te nane. Tsangône Eamôsôba édué étônigôa gatsimaméda Nzambé wa n’anyô oma va mbene edi. Atôtsimaméda vatôétsa angô mitémamie gémôtsumé paga bandôa nyee amapanga ngu na nyee amôyusumédu. Te gatôbeendu gô Matendeo MaNzambé mbe: One asaba n’oési va miso maNzambé te mômane asamôtsuma paga na amamôétsa môtémee wetso. Angô andé na monyo.

Oma muetso andéké n’oési

18Endé te nane. Nzambé atubéda ôpisedi ôviga g’ôba. Nzambé eena ôpisee gô ébéva éamôma na gô mabégô metso mabévani mayanza oma. Mayansa maô mabévani meebakanéda mabégô mapie mbe kabaga meenanô. 19Nzambé asiséda oma gôébégô amuene Nzambé asisomé. Na mane medi metso mangoongôa môma émenya mandé v’ekanga, asisomédé mangô. Te amuene Nzambé amatubéda oma na vede mônongoe wedi. 20Menyani mbe ngudi yaNzambé, dine disaba n’ebandô na disaba n’ekôdéô, na étsimama éedi éetso ésienanô va mbeego. Ivô bandôa vamakana Nzambé tsinane, ngudiye n’etsimamee éedi émeenanô gô mane mamayanza angô. Te gô éne mbe oma angoongôa émenya angô. Nzambé Kana. T’ebandô môma asaba na mitayi gôévovo mbe: ?Nzambé andé gôni? Me tsamôena. 21Menyani mbe oma ahsabômu Nzambé. Ivô ahngô ahsamôneegeda na ahsamôkuméda ganyôngéô amuene Nzambé. Géé nane, matasa moma maka gébé n’eodo, na mitéma miaô mika ga mimavétsa môkambô na mimakukégu n’evitsi. 22Oma anyemôga mbe andé n’eodo, tambô asamenya ébégô. Andé ti égiô. 23Nzambé amanyôngéô mbe oma aneegeda te amuene Kumu ondômbee wetso ôsakoani. Géé oma, ahneegeda te égoni ésadingani ékônzahngô. Egonie égono ga môma na ga nyoyi na ga nyama, na éne ékea migoge.

24T’ebandô Nzambé amatsika oma gémôanza gôéyanza metso mabévani mamanyima mitéma miaô. Ayanza mabégô mabévani matsoyi na yôtô yaô anguene n’anguene. 25Oma apukanéda mane mapie maNzambé na mane madiboe. Ahneegeda éne émavangôni na émakanôni na akina éneegeda amuene Môvangi na Môkani andé ngu gôéneegedu môbo na môbô. Amen.

26T’ebandô Nzambé amatsika oma gémôanza gô tsôvé yaô yagébé na tsoyi. Gô mabégô mageto na amôgôô, ageto amatsika éne émavanga Nzambé na ayanza anguene ageto n’ageto. 27N’amôgôô te mônongovo. Atsika éne émavanga Nzambé gôndé mômôgôô na môgeto na anyimana anguene amôgôô n’amôgôô gôéyanza anguene amôgôô. Eenda mabégô mane matsoyi na adiia tsôgôô gô yôtô yaô. Tsôgôô nene ésapengana na éne émeendahngô.

28Oma amagônga Nzambé gô disôba yaô mbe: Tôsamenya ône. Na Nzambé amanzeegeda ahngô na matasa maô magô évitsi, n’esima éaô éasagô, ésanyôngéô Nzambé. 29Mitéma mioma mimayôa na mabégô metso masanyepani, na ébéva na ngusu na ôbagaa. Anyima mane maakaô, na eenda mikôbé, na masanganéda. Abôméda akaô na apatéa na atokono. 30Na atsuavana. Andéké adudeo aNzambé. Andé na dienza na nyemo na bôpeeo. Oma avaka waô mônongo gôéyanza mane maô mabévani. Asookéô tétee yaô n’eyee yaô. 31Mitéma miaô misaba na gomo gôéénda mane mabévani. Divangaye yaô te yenyepa éamiônya. Andé na mapéé gébé na ngeba. 32Asabômu mbe gôndé môtsundu owa va mbene aNzambé gô mabégô mayanzahngô mabévani. Buéyé nane, oomba te éénda mayanzame maô masagô. Na va ngongone vane atsôkéa vadiiangô môma gôéyanza mane mabévani meendahngô anguene.

Currently Selected:

Romains 1: TSV

Highlight

Copy