Mayanzame 28

Paul amabaka gô néngé aMalte

1Vamamana we éoboogo gô mubu, tômookô mbe néngé nedué te Malte. 2Mbuuane émabandôa ényogo na sodi gévôni. Asi néngé nene ahmakenea we na géneega. Ahmadumua gésotosoto na amakôkanganéda we va kôbangô asangô gôéôkô épiô. 3Gôékidéa sotoge, Paul amadingôa gékatage satsakida gôégébéka. Tambô gô gékatage gômabaka ôgôsa. Gômookô angô épiô ômakusa na ômambata Paul g’ôgogoe. 4Vameena asi néngé nyogone éviômba émambata g’ôgogo aPaul amavovo anguene n’anguene mbe: Na gô pie mômôgôô nône asanyepa. Te môsi môkôbé. Bononi, buéyé gabusugi angô ôwa agô mubu, môtsundédine oma muetso asangamôsinga aba na monyo. 5Paul amaduméda nyogone émaaga na gô soto. Angô asiôkô ta na pievia. 6Ane amadenganôni amabono mbe buétsé ôgogoe ôngaahnda, na buétsé Paul angaaga na va tsina gôéwa. Ameenéa gôéena éne éngabuéani. Ahmadinga éenéa na asiene ébégôe. Ahmakoa matasame maô na ahmavovo mbe: Tambô mômôgôô nône andé ti ga Nzambé.

7Vabambani na tungu nene vamabaka tsaga na eba amôtômine anéngé. Angô môma okumaka, inedi Publius. Amasambanéa na we na gényônga na amakenea we pitsi ditatô. 8Tétene éaPublius amabaka yama v’ekoko na beeagane. Amabeea nzonzozo na môvanzô anzina. Paul amakea gôémôena. Amavovo na Nzambé gôndé angô na amamôtsakéga mogome. Amadônga. 9Na vane abeeyie muetso amabaka gô néngéne amaviga na amadôngédu. 10Asi néngéne amatubéda we géneega gô minongo mietso. Nyee ômapeka we gô mbôngône gôékea ameetsa we éôma éetso mbe tôsangabuta sôma gô môtôôe ômakea we.

Paul amatsiga gô Rome

11Vamoota ngonde ditatô te vamapeka we gô mbôngône émaviga gô Alexandrie. Ina ambôngône te Nzambé Dibaé Vamavasa. Mbôngô nene émaviga gô néngéye gômadingédu yangô na ndéô éasodi. 12Tômasikama gô môsenge aSyracuse. Gône tômadigaa pitsi ditatô. 13Tômatenôa gône gôégônga tsényéne gôébuéa na gô Reggio. N’ongôngôe ône ôpunga ômaviga gésa gédongu gôévumbéa we pitsi dibaé na gô Pouzzoles. 14Gô Pouzzoles, tômeenana na ana aTétee asi mbumu éaNzambé. Ahngô amasikéga we tsono épo. Na vane tômabuéa na gô Rome. 15Ana aTétee n’asô go Rome amookô tsangône éasô te madeo tôsitsiga na amaviga gôéwanyéda we gô tungu éekasa éAppius na gô yeba yagenda dindô mbe Trois Auberges. Vameenana Paul n’ana aTétee n’edi agô mbumu éaNzambé, amakasôga na amakuméda Nzambé. 16Vamatsiga we gô Rome, Paul amatubédu eba ôngadigaangô amuene na môgode ôngamôkeneani.

Paul ameekéda gô Rome

17Vamoota pitsi ditatô, Paul amabambéa atômi aAjuif adigaa gô Rome. Vamakôkangana ahngô, Paul amavovo mbe: Ana aTétee n’ami. Menyani mbe me tsiindé ébégô gôébévéda omasô n’anyô Ajuif. Me tsikékôé ésima ématsikéô wa n’anyô na peeye yasô n’anyô Ajuif. Namatsôpu gô Jérusalem. Namadeekedu na gô mogo masi Rome. 18Asi Rome amatsundéda me na asidenge ta n’oési ôvo mbe neesédu gôéwa. Amanyôngéô énzeegeda me. 19Ivô Ajuif asinyôngéô mbe nanzeegedu. T’ebandô namaduka pene agô Rome gôékônza ébégôe. Natsuéyi ébégôe n’egô, ivô kaka mbe nasunda éongo éami. 20Nôeni ébégôe ééndi me mbe vigani nôviôkô éne éndé n’ami. Wa n’anyô ana aIsraël tôténdéda ône angavigani. Esengo ékatô me te gôndé angô. 21Ajuif amabika mbe: We égô gô Rome, tôsidiié ta na gésangô gévo géviga gô Judée génigôa we ébégôe éoo. We dôta tôseena ta na muana aTétee môvo aviga gône gôénigôa we éne ébévani émayanza éwe. 22Ivô tônyôngéô ti pepe éôkô matasa moo. Tôsabômu mbe gô tungu yetso dimeekédu nzéa ékea éwe éne, oma eenda pégôani na meekédu manzéa nene.

23Amasevoa inya gôévovo na Paul. Nyoone amaviga ti ayekani na gô eba ômadigaa Paul. Bandôa vamaagiia nyee ngu na vameedangô, te andé wangô. Paul amasupua ahngô mabégôme mokumu aNzambé gômanigôa angô ômbanza aJésus. Amatanga mane mamatenda Moïse na mane mamatenda apandôédi amatasa maNzambé va mbeego gôénigôa mane maJésus. Paul amanyôngéô ékoa ahngô matasame mbe asinga Jésus. 24Avo amookô na amakoa matasame. Avo dôta amamôtsumaka te paga. 25Ajuif amatimôga gôénika na gô yeba yaô andé gôétsumana paga. Paul amavovo n’ahngô mbe: Tambô na gô pie Gédidi SaNzambé gémabaka na mitayi vamavovo sangô na peeye yasô n’anyô go mônya aEsaïe môpandôédi amatasa maNzambé mbe: 26Kiaka na gôndé omeaa.

Beenda ahngô mbe:

Nôngookô na woo, ivô nôsangamanigôgéô.

Nôngeena na vede, ivô nôsangamaanéa.

27Gôébégô mitéma miomeaa mindé na ndiba.

Amani ékugéga matô maô.

Amani eema miso maô.

Kabaga misome maô meenéa

Na kabaga matôme maô mookô

Na kabaga mitéma miaô misinga

Na kabaga agéngôga na gôndé me mbe naadôngéda.

One avovoni te memuene Nzambé.

28Paul amoomba énigôa mbe: Tambô menyani mbe meekédu magéobogeo gémakônza Nzambé gôndé wa n’anyô mangeekédu ane asaba Ajuif. N’ahngô angamookô. [ 29Vamavovo Paul nane, Ajuif amakea asaganédana anguene gô éne émavovo Paul.]

30Paul amadigaa mipuma mibaé gô eba ômasombo angô. Amamogo na muetso amaviga gôémôena. 31Ameekéda na bôkédé ôvôni mabégô mokumu aNzambé. Amanigôa Tsangô éaKumu Jésus-Christ gédékédu na môma.

Currently Selected:

Mayanzame 28: TSV

Highlight

Copy