Marc 3

Gômabaka mômôgôô n’ogogo ômasombegani

(Bono na Matt. 12:9–14, Luc 6:6–11)

1Jésus amoomba éengéa gô eba agéwanyéô. Amadenga wangô môma andé n’ogogo ômasombegani. 2Muetso ahmabaka wangô ahmasingégéda Jésus gôémôbono mbe mavooe angadôngéda môma nyee edunda. Ahmeenda nane te gôémôsoseda. 3Jésus amovovo na gékonzoge géne mbe: Timôga va mbene omeaa muetso. 4Jésus ameevôa géômbége mbe: ?Nyee edunda, na gôéyanza mamisôba, na gôéyanza mabévani éne éabuedi yééni? ?Na gôédôngéda môma, na gôéyôha môma, éne éabuedi yééni? Muetso ahsibubué. 5Te vane Jésus amabono ahngô n’opisa. Ameena panda gô disôba yamitéma miaô. Amavovo na gékonzoge mbe: Konyoko ôgogoe woo. Amookonyo na ômadônga. 6Apharisien amakusa gô eba agéwanyéô gôédigaa gétungu na géômbé saHérode mbe ahvanga gépangô gôéyôha Jésus.

Pingô yeômbé émaviga na gôndé Jésus

7Jésus n’aneengi edi ahmanôtôga vangô. Ahmakea gô môgogu amubu. Géômbéômbé soma gémaanda angô. Gématsiga gô matumbame metso bandôa gô Galilée, na gô Judée, 8na gô Jérusalem wetso, na gô Idumée, na gô dipo tsényé yaJourdain na gô kôbangô aTyr na gô Sidon. Pingô yoma ahmookô mane mamayanzaka Jésus na ahmakea na gôndé angô. 9Jésus amatôma aneengi edi mbe: Vigani na mbôngône napeka kabaga oma abéba me. 10Vamookô oma mbe Jésus adôngéda oma ayekani ahmagagana nzéane gôémôgônga gôébuta édôngédu. 11Edidi ébévani émasibaka mabongo maô ôkô émamôena na émaadôngana mbe: Ewe te Muana ANzambé. 12Ivô Jésus amadékéda éangô mbe: Nômbiayeega ébeenda oma mbe Odôô te Muana ANzambé.

Jésus amasevoa aneengi edi nzima n’abaé

(Bono na Matt. 10:1–4, Luc 6:12–16)

13Jésus amabata na gô ngongo amôkôdie. Na amabambéa ane ahmasevoangô. Ane ahmabambéôkôni te ane ahmakea na gôndé angô. 14Jésus amasevoa nzima n’oma abaé. Amanyôngéô mbe ahdigaa n’edi, na mbe atôma ahngô gôétsua tsangône éedi. 15Jésus ameetsa ahngô ényanga gôékuséda édidi ébévani gôndé oma. 16Ane ahmasevoaka Jésus nzima n’oma abaé, mina maô môvo te Simon. (Jésus amoogaka angô mbe Pierre.) 17Avo aneengie te Jacques na môdimi edi Jean, anamôgôô aZébédée. (Jésus amooga ahngô mbe Boanergès, événdégéô mbe oma andé ga môdumu.) 18Avo mina maô te André, Philippe, Barthélemy, Matthieu, Thomas, Jacques muana aAlphée, Thaddée, Simon amoogu mbe Zélote, te ône amabaka gétômbiatômbia gô mabégô matsenge. 19Na Judas Iscariote, ône angakaba Jésus.

Kinde éaJésus ahmaviga gôébongo angô

20Ahngô ahmakea na gô eba. Géômbége gémoomba ékôkangana. Vane Jésus n’aneengi edi ahsiôngôé ta na éaa môyakôe waô. 21Vamookô kinde éaJésus éne émabuéa gôndé angô, ahmaviga gôébongo Jésus. Ahmavovo mbe: ?Andé nayee? ?Avétsi môkambô mani?

Jésus amaabéa atsumi apaga

(Bono na Matt. 12:22–32, Luc 11:14–23, 12:10)

22Anigôi amige miaNzambé ahmaviga na gô Jérusalem. Ahmavovo mbe: Jésus ôdôô atômu na Béelzébul. Te yabédé amuene andé gôndé angô. Avo ahmavovo mbe: Ii, te na gô pie. Akuséda édidi ébévani te gô ngudi yakumu éayangô. 23Jésus amabambéa oma na gôndé angô. Ameevôa ahngô mônongovo ga tsava mbe: ?Satan kumu éedidi ébévani angapatsa amuene nayee? 24Okô asi tsenge épo asaba n’evambevo, tsengene ésangadinga n’ebudangana. 25Na eba te nane. Okô asi ebovo asaganédana eembe na mbumune étatôani. 26Okô Satan akambôgi mane maamuene eembe amani éatôa pingô yamivôva, n’okumu edi ôsangadôôkanô.

27Eba agengaa ôseesuégéaka amuene aboni nani buétsé nôpanga émôkata gésengo. Vane nôeesuaka.

28Me nanôevéda ébégô édué éapie mbe oma muetso ahngasingéô kokoo gô mabégô maô metso mabévani madienza yamavovia maô. 29Ivô Nzambé asasinga kokoo gôndé ône eenza Gédidi Samuene Nzambé. Gô ébévee éne, môma angatsundédu na gô môbô na môbô. 30Ebandô émeevéda Jésus nane, te gômavovo oma mbe: Akayiô na gédidi gébévani.

Iyee n’adimi aJésus ahmamôbuta

(Bono na Matt. 12:46–50, Luc 8:19–21)

31Yeedi n’adimi edi amôgôô ahmaviga na v’ombaa na ahmavovo mbe: Bambéani we angô vane. 32Géômbé gévôni soma gémabaka digaa gô kôbangô aJésus. Môvo amabeenda Jésus mbe: Oôkiô, yoo n’anayoo ahndé v’ombaa. Abambéa éwe. 33Jésus amaabéa mbe: ?Iya indaa? ?Aneya yandaa? 34Vamavova angô nane, amabono oma ahmabaka digaa va kôbangô edi. N’angô mbe: Iya n’aneya te adua. 35Me nanôbeenda mbe aneya na iya te ahngô eenda éne ényôngéô Nzambé.

Currently Selected:

Marc 3: TSV

Highlight

Copy