Marc 2

Jésus amadôngéda môbeeyi amakata éeyo

(Bono na Matt. 9:1–8, Luc 5:17–26)

1Vamoota ôkana apitsi, Jésus amanika na gô Capernaüm. Gômookanô mbe Jésus andé te gô ebee égô. 2Pingô oma ahmabaka na mbanzambanza bandôa v’ombaa na gô mbadi. Jésus ameekéda ahngô tsangô éaNzambé. 3Avo oma ahmaviga na gôndé Jésus ahmatsua môbeeyi amakata éeyo. Môbeene ône amatsuaô n’oma anayi. 4Ahsiôngôé éwesea na gôndé Jésus, oma ayekani ahmabaka vangô. Ahmatuba môahnzee eba va tsimatsima na vandé Jésus. Gô épôdékée éne ahmasuméda môbeene andé yama gô gékakage. 5Jésus ameena mbe: Omeaa asatsuma ngudi yami paga. Na amavovo na môbeene mbe: Muanami, ébévee éoo ésingéiyô kokoo. 6Vangô vamabaka avo anigôi amige miaNzambé digaa. Ahmatasa gô tsina yamitéma miaô mbe: 7?Môma noo, avovo vita nane nayee? Eenza Nzambé. ?One oongôa ésingéa oma kokoo gébé amuene Nzambé, indaa? 8Jésus amamenya mabégô metso mamatasa ahngô gô tsina yamitéma miaô na amavovo mbe: ?Nôndé n’one mônongo amitéma nayee? 9?Gô mabégô mema mabaé, éne ésadaga évovoni yééni? Okô neenda mbe ébévee éoo ésingéiyô kokoo. Vo neenda mbe timôga, bongo gétava soo, kiaka na makôdô moo. ?Ene ésadaga évovoni yééni? 10Ivô nanyôngéô étubéda anye mbe me Muana Amôma va tsina éva nandé n’enyanga gôésingéa oma kokoo gô ébévee éaô.

Vane Jésus amavovo na môbeene mbe: 11Me natôma éwe mbe, timôga. Bongo gétava soo. Kiaka na gô eboo.

12Ogi yadingani môbeene amatimôga. Amabongo gétava sedi na amakusa, te muetso aboni nani. Na muetso ahmatsapéô na ahmakuméda Nzambé. Ahmavovo mbe: We madeo tôsiena nani.

Jésus amabambéa Lévi

(Bono na Matt. 9:9–13, Luc 5:27–32)

13Jésus amoomba ékea na gô kôbangô amubu. Géômbége setso gémaviga na gôndé angô. Na Jésus ameekéda ahngô. 14Vamoota Jésus oota nani, ameena Lévi muana aAlphée andé digaa gô tsongo ékôkégu dode yedepu. Amamôbeenda mbe: Oka nzéepo n’ami. Lévi amatimôga na amakea na Jésus géômbé gévo.

15Jésus amabaka va tabudé gô eba aLévi gôéaa môyakô. Gômabaka va tabudé n’edi abongi adepu ayekani, n’oma aminongo mibévani, n’aneengi edi. Ti ahngô ayekani ahmaanda Jésus nzéepo. 16Anigôi amige miaNzambé gô géômbé sApharisien ahmeena Jésus andé gôéaa va tabudé épo n’oma abévani n’abongi adepu. Apharisien ahmeevôa aneengi aJésus mbe: ?Jésus aa n’omeaa vavo nayee? 17Vamookô Jésus ahvovo nane, amaabéa mbe: Ane ahsabeeani ahsookô tsôvé éamôbôgani. Te abeeyi amôôkô tsôvé. Me tsivigé gôébambéa ane anyepani ivô namaviga gôébambéa abévie gôékoa mitéma miaô.

Gékinéô samôyakô gôévovo na Nzambé

(Bono na Matt. 9:14–17, Luc 5:33–39)

18Aneengi aJean n’Apharisien ahmakina môyakô gôévovo na Nzambé. Oma ahmaviga gôéévôa Jésus mbe: Aneengie aJean n’Apharisien ahkina môyakô gôévovo na Nzambé. ?Aneengi woo gékiné nayee? 19Jésus amaabéa ahngô gô kôgô mbe: ?Géômbé sasueti ayômba géngakina môyakô asueti amuene mômôgôô, kumu ayômbaye andé vangô‐a? Gésangakina. 20Gô ndéône ésangaba mômôgôô kumu ayômba v’angô, géômbé sedi géngakina môyakô te nyoone.

21Môkanda edôngé ôsananôkô gébambo gô épôdéké éangoyi émani ébooni. Gébamboge sedôngé gésusuga gôôvôu sangô na gékaka ngoyine ébooéni. N’epôdékée ébaki égegé te éka vembe na memba. 22Môma asoongôa éetéa maduku mamiduengi gô géeteô sedi sagégôbôkô sanyama gémagasani. Vatogo madukume, gégôbôkôge gémagasani gésavutuga. Sangô géatéga. Na géetéôge na madukume ébungana éetso. Buedi mbe môma eetéa maduku mamiduengi gô gégôbôkô gédeedani.

Jésus na mabégô manyee edunda

(Bono na Matt. 12:1–8, Luc 6:1–5)

23Nyee edunda Jésus n’aneengi edi ahmakea akitsangana gô tsaga éapôtô.#2:23 Tsaga nene, gô suada mbe blé. Aneengi aJésus ahmakea ahkudua aduka pôtô. 24Apharisien ahmeevôa Jésus mbe: Bonoko. ?Aneengie woo, nayee eenda gô nyee edunda éne émakitsô môge mbe, gééndô nyee edunda? 25Jésus amaabéa ahngô mbe: ?Anye madeo nôsitanga éne émeenda David, angô n’ane amabaka n’edi vamookô ahngô nzaa‐a? 26Gô ndéô émabaka Abiathar payi éadeekedi adigondoku, David ameengéa na gô eba aNzambé. Amabongo môpemba amôge, ône ôsaaka oma muetso, buétsé te adeekedi adigondoku anguene. David amaa na ameetsa ane ahmabaka n’edi. 27Jésus amabeenda Apharisien mbe: ?Na nyee edunda, na môma, ône atômani indaa? Te môma. 28Te me Muana Amôma nandé Kumu anyee edunda.

Currently Selected:

Marc 2: TSV

Highlight

Copy