Marc 1

Mane mameekéda Jean‐Baptiste

(Bono na Matt. 3:1–12, Luc 3:1–18, Jean 1:19–28)

1Edué te Tsangône Eamôsôba éaJésus‐Christ Mauna ANzambé ébandôa mbe, 2te gamatenda Esaïe môpandôédi amatasa maNzambé, amatenda gô gésangô sedi mbe:

Oôkôni éne évovo Nzambé. Angô mbe:

Me Nzambé napanga ékudéga peegi éami

Te ône angakônza nzéane yoo.

3Ogi amôma ôngadôngana gô tsenge émagasani mbe:

Tsimamédani buedi nzéa yedi.

4Gamatenda Esaïe gô gésangô sedi te gamatsiga Jean gô tsenge émagasani. Jean amabatésa oma. Na ameekéda mbe: Koani mitéma mianyô mbe nôngaba wene mônongo. Diiani bateme gôétubéda gasingéyiô anye kokoo na Nzambé gô ébévee éanyô. 5Asi Judée muetso n’asi Jérusalem muetso ahmakiaka na gôndé Jean. Gô ébévee éaô môma na môma ameeséda amuene va pingô oma na amadiia bateme gô mbéne étetu mbe Jourdain.

6Jean amaataka madégô mamagomu na miyo mianyama étetu mbe chameau. Amaataka v’oninge édata éagégôbôkô. Amaaka te tônda na ômbo. 7Jean ameekéda mbe: Gô ngimami gôviga muene ootéa me. Me te gétôkôtôkô. Angô te môtsé. Gétôkôtôkô ôgoeyee géôté môtsé.#1:7 G’ôgi aGrec Jean amagunya tsava éapondu. Ivô tsaba pengo gétôkôtôkô. Nandé ti gô tsina asangô. 8Me nanôbatésa na meba, ivô angô anganôbatésa na Gédidi SaNzambé.

Jésus amabatésu na Jean na amakanégu na yabédé

(Bono na Matt. 3:13—4:11, Luc 3:21–22, 4:1–13)

9Gô ndéô nene Jésus amaviga gô Nazareth, gô tsenge étetu mbe Galilée. Amabatésu na Jean gô Jourdain. 10Vameenôga Jésus gô mbéyi, oma ameena ôbee ôtatôga, na Gédidi SaNzambé gémasuma ga ménga na vande Jésus. 11Ogi ômookanô ôvovo g’ôba mbe: Ewe te Muanami amôtôma amisô. Me nagônyôngéô na nzoo na gô môtéma.

12Tsina na tsina Gédidi SaNzambé gémakeda Jésus na gô tsenge émagasani. 13Jésus amadigaa wangô nzima dinayi yapitsi. Amakanégu na Satan. Jésus amaba va gatse anyama yagô pindi. Asi g’ôba amavigédu na Nzambé gôémôodeda.

Jésus amabambéa agunyi ambusa

(Bono na Matt. 4:12–22, Luc 4:14–15, 5:1–11)

14Jean ameengédu gô eba atsôgôô. Jésus amakea na gô Galilée gôéékéda Tsangô Eamôsôba émaviga gôndé Nzambé. 15Amavovo mbe: Ndéône ébuéyi. Okumu aNzambé ôka gôpégôpé gôénôoboo. Koani mitéma mianyô gôéba wene mônongo oma. Itsani mitéma mianyô gô Tsangône Eamôsôba édué.

16Jésus amakea gô nzéa éamogogu amubu ôndé gô Galilée. Ameena agunyi ambusa abaé. Te Simon na muanayeedi André ahmagunya mbusa yaô gô mubu. 17Jésus amabambéa ahngô mbe: Vigani. Okani nzéepo n’ami. Anye agunyi ambusa, gavootanye nyama, me nanganôkoa avooti oma na gôndé me. 18Tsina na tsina ahngô ahmatsika mbusa yaô na ahmakea géômbé gévo n’edi.

19Jésus amoomba ékea éva n’eva, ameena Jacques muana aZébédée. Angô na muanayeedi Jean ahndé gô mbôngône gôétata mbusa yaô. 20Vane Jésus amabambéa ahngô. Ahmatsika Zébédée, tétaô n’ayanzie gô mbôngône, na ahmakea na Jésus.

Môma amayungédu n’edidi ébévani

(Bono na Luc 4:31–37)

21Ahmakea na gô môsenge ôéndô mbe Capernaüm. Gô nyee edunda Jésus asidingé ékea na gô eba agéwanyéô sAjuif. Gômeengéa angô, ameekéda. 22Ane ahmookôni ahmatsapéô gô meekédu mamisôba maJésus. Meekédu medi gébômu mbe môma andé n’enyanga. Asiikédé gameekéda anigôi amige miaNzambé.

23Tsina na tsina gô eba agéwanyéô gômeengéa mômôgôô andé na gédidi gébévani. Amaadôngana mbe: 24?Jésus môsi Nazareth ôbé nayee n’asô? ?Omaviga gôédimbanéda we‐a? Me tsabômu mbe éwe te Muana Amatsimamani ômakudégu na Nzambé. 25Jésus amadékéda sangô mbe: Kôda vane. Kusa gôndé môma nône. 26Sangô gémaginya môma nône ga môma abeea tsiiga. Gédidige gémaamugana môndônga na gémakusa. 27Oma muetso ahmasôbasôbana na ahmeevôana mbe: ?Eyéni‐éé? ?Odôô te wene mônongo ameekédu‐a? Atômaka ti n’edidi ébévani n’enyanga évôni na éangô dôta émôgobeda. Weniô. 28Tsina na tsina tsangô éenyangedi ématsanzabana gô Galilée nyetso.

Jésus amadôngéda pingô yabeeyi

(Bono na Matt. 8:14–17, Luc 4:38–41)

29Jésus na Jean na Jacques ahmakusa gô eba agéwanyéô sAjuif. Ahmeengéa gô eba aSimon na André. 30Jésus amabeendu mbe: Ogoyi aSimon ogeto te angône andé yama na beeagane, ookô nzônzônzô. 31Vamawesea Jésus na vandé angô amamôtsôpa g’ôgogoe. Amamôtimôa. Tsina na tsina môgeto nône amadônga na amaambéa ahngô.

32Na dikoo kômbéne émapénda, abeeyie muetso n’oma ahmatômu na édidi ébévani ahmatsuaô na gôndé Jésus. 33N’asi môsengee muetso ahmatandama v’ombaa eba ômabakangô. 34Jésus amadôngéda abeeyi ayekani ahmabaka na mabeea maminongo minongo. Ahmakuséda édidi ébévani gôndé oma. Asisingé éangô évovo mbe: Tôsabômu ôdôô te Jésus.

Jésus amaseta tsengene nyetso éaGalilée

(Bono na Luc 4:42–44)

35N’ongôngôe wetso, gôgébaka na vimavima, Jésus amatimôga. Amakusa. Amakea na gô tungu ésaba oma gôévovo na Nzambé. 36Simon na muetso ahmabaka n’edi ahmakea gôémôbuta. 37Na vameenahngô Jésus ahmamôbeenda mbe: Ewe te ôbutuni. 38Jésus amaabéa mbe: Okani na gô sene gésa gô tôvo tômbôka. Nakiaka neekéda wangô. Me navigi te gôéékda. 39Amakea éékéda gô yebaye yewanyéô éAjuif gô Galilée wetso na amakuséda édidi ébévani gôndé oma.

Jésus amadôngéda môsi ébeea éagega

(Bono na Matt. 8:1–4, Luc 5:12–16)

40Môsi ébeea éagega amaviga na gôndé Jésus. Amasiba mabongo medi va mbene aJésus na amamôgondo mbe: Kokooye éwe, ôkô mbe ônyôngéô, ôsadagéô édôngéda me. 41Jésus amamôena ngeba. Amakonyo ôgogo edi gôémôbanda. Na amavovo mbe: Me nanyôngéô. Odôngi. 42Tsina na tsina ébeea éagega émadimbana g’ôtôe wedi na amaba na tsôgô. 43Jésus amamôkangéa mbe: Kiaka. 44Owema ônabeenda môma. Kiaka ôketubéda môdeekedi adigondoku ôtôe woo gadôngédiô éwe. Oétsa te ôgondokue ône ômavovo Moïse mbe: Okô môma adôngédiô eetsa te nane. Ogondukue te gémbégéa mbe adôngédiô. 45Ivô vamakea angô amasuméa te tubaga mbe mônayi yedi môkodi. T’ebandô Jésus asiôngôé éenanô mbe atsigi gô misenge na misenge. Angô amatongonéa na môsenge gô tungu disaba oma ayekani. Ivô oma ahmakobonoko na gôndé Jésus.

Currently Selected:

Marc 1: TSV

Highlight

Copy