Marc 11

Jésus amakea na gô Jérusalem

(Bono na Matt. 21:1–11, Luc 19:28–40, Jean 12:12–19)

1Jésus n’aneengie ambuéa na gô mbôkaye yaBethphagé na Béthanie, te mbôkaye disitongonéké na Jérusalem. Ahmatsiga gô môkôdi ôtetu mbe Olivier. Jésus amoobégéda aneengi abaé. 2Jésus amatôma ahngô mbe: Kiakani na gô mbôkane éndé gô mbene anyô. Vangabanye nôka gô buéaga, nôngadenga môpaga anyamane étetu mbe ânon éndé ditéga. Yangô madeo ésitsua môma. Tsôbôani yangô. Nôviga na yangô. 3Okô môma anôévôi mbe: ?Nôénda ndé vane? Beendani angô mbe: Kumu asô andé n’eyanza na nyama nedué. Angaminikéda n’atsatsee.

4Ahmakea na ahmadenga nyamane gô môkii éndé ditéga va môvénga eba. Amamitsôbôa. 5Avo oma amadenganô vangô ameevôa ahngô mbe: ?Nôénda ndé vane? ?Anye nôtsôbôa nyamane éne nayee? 6Ahmabeenda ahngô gamavovo Jésus. Na omee ane ahsimigémbané. 7Ahmakea na nyamane na gôndé Jésus. Ahmatsakéga ngoyi yaô gô ngongo anyamane. Na Jésus amapeka gôédigaa gô yangô. 8Oma ayekani ahmayaa yaô gô nzéa, gôégobeda ône avigani. Avo dôta ahmayaa mitabé midôngani mimakitsangô gô tsaga yaô. 9Ane ahmakiaka va mbene aJésus na ane ahmaviga va ngima edi ahmadôngana na gényônga mbe: Tôkumédékéni Nzambé. Te mbe mate maNzambé mabaké gôndé môtômine môvôni na ôkumaka ôvigi n’edi. 10Te ôkumu aTétasô David. Asi g’ôba n’asi gô tsina muetso, tôkumédékéni Nzambé.

11Jésus amatsiga gô Jérusalem na ameengéa na gô eba aNzambé. Amabono na gésa na gésa na amakusa. Amakea na gô Béthanie n’aneengie edi gôébégô nyee ômabaka ôka gô édaaga.

Jésus amakokoo géététége

(Bono na Matt. 21:18–19)

12Ovo enya ône vamatimôga ahngô gô Béthanie, Jésus amookô nzaa. 13Ameena aviga gôdagôda géétété gétetu mbe ôfiguier. Géététége géne gémabaka na yabiye na tsaguma. Jésus amakea gôéseta mbe buétsé angadenga miônda. Vamabuéangô va sangô ameena te yabi ditévo gôébégô ndéô nene kaka éne ébôtaka sango. 14Vane Jésus amakokoo géététége mbe: Ewe ôsavidôyéô miônda na gô épénde akômbé.

Aneengie amookô.

Jésus amanyepeda eba aNzambé

(Bono na Matt. 21:12–17, Luc 19:45–48, Jean 2:13–22)

15Ahmabuéa gô Jérusalem. Jésus ameengéa na gô eba aNzambé. Amadenga ayôkô ahsômba na ahsômbéda gô eba aNzambé. Amapatsa ahngô. Amakuéséda tabudéye yapukanédi adode. Amakuéséda na dikôndiye yasômbédi amabembi. 16Na Jésus amadékéda ahngô mbe: Nômbioota gô eba aNzambé na yôma. 17Vane ameekéda ahngô mbe: Matendeo maNzambé matôbeenda mbe: Ebami ôngamenyanganô mbe, eba oma muetso gôévovo na Nzambé. Ivô anye nôkoyi eba ôdôô ôka gésoméô seesui.

18Tsesuye yakeekedi adigondoku, n’anigôi amige miaNzambé amookô ébégôe. Ahmabuta mônongo gôéyôha Jésus. Ivô ahmeena angô gomo gôébégô oma muetso ahmasôbasôbana gô mane mameekédaka Jésus.

19Vamaba nyee ôka gô édaaga, Jésus n’aneengi edi ahmanôtôga gô Jérusalem.

Jésus amadenga géététége gémagoso

(Bono na Matt. 21:20–22)

20Ovo enya ône n’ongôngôe wetso, vamootahngô gô nzéa ahmeena ôfiguier. Géététége gémawa setso, bandôa gô mitamba ngu na gô mitabé. 21Pierre amakôngéda éne ébuéikini. Amavovo na Jésus mbe: Môékédi, bonoko. Ofiguier ôkikoyi éwe ômani égoso. 22Vane Jésus amavovo n’aneengi edi mbe: Nônatsuma ngudi yaNzambé paga. Na gô pie nanôbeenda mbe 23nôongôa évovo na môkôdi ôdôô mbe: Môtôga vane, kea ôkekuyaméa gô mubu. Okô anye nôsiba na buétsé gô mitéma mianyô na nômenya na gô pie mbe éne évovi anye éngeenanô. Menyani mbe nôngeena éangô éngaba. 24T’ebandô me navovo n’anye mbe vadukanye Nzambé ébégô, itsani na mitéma mianyô mietso mbe nômani éédiia. Na angô anganôétsa. 25Okô mbe ôndé na ébégô na môkoo, ômbiasuméa évovo na Nzambé. Buedi mbe ôpanga émôsingéa kokoo. Vane Tétoo, ône andé g’ôba angagôsingéa dôta kokoo gô mabégô moo mabévani. [ 26Okô anye nôsisingéa akanyô kokoo, Tétanyô ône andé g’ôba asanganôsingéa dôta kokoo gô mabégô manyô mabévani.]

?Enyangee éndé na Jésus éviga gôni?

(Bono na Matt. 21:23–27, Luc 20:1–8)

27Ahmoomba énika na gô Jérusalem. Vamaseta Jésus eba aNzambé, te tsesuye yadeekedi adigondoku n’anigôi amige na peeye ahmaviga gôédenga angô. 28Ahmabambéa Jésus mbe: ?Enyangee éyanzewe mabégô mema, éviga gôni? ?One ameetsa éwe ôtômu gôéénda nane indaa? 29Jésus amaabéa ahngô mbe: Me dôta nanganôévôa yami nyivô. Okô anye nômiaabéyi, me nanganôbeenda dôta gésa géviga ényangee yami. 30?One amatôma Jean gôébatésa oma indaa? ?Te Nzambé‐a? ?Vo te oma? Beendani me. 31Ahmatsunda anguene n’anguene mbe: Okô tôvovo mbe te Nzambé amakudéga Jean. Angô angatôévôa mbe: ?Tambô ébégô ndé anye nôsisingé mabégô medi? 32Okô tôvovo mbe te oma amatôma Jean ?ébégô éngaba nayee? (Ahmeena oma gomo gôébégô muetso asibômuku mbe Jean te pidi môpandôédi amatasa maNzambé.) 33Vane ahngô ahmaabéa Jésus mbe: We tôsamenya. Na Jésus amanikéda ahngô mbe: Na me muetso, tsoongôa énôbeenda gésa géviga ényangee yami éyanza me.

Currently Selected:

Marc 11: TSV

Highlight

Copy