Marc 10
10
Meekédu maJésus gôébégô éeyôha yômba
(Bono na Matt. 19:1–12, Luc 16:18)
1Jésus amatimôga gômabakangô. Amakea na gô tsenge éaJudée. Amaabôga na gô dipo tsényé yaJourdain. Eômbé éyékani émaviga na vandé angô. Jésus ameekéda ahngô geekédangô na mbeego.
2Avo Apharisien ahmawesea na vandé Jésus gôémôtambéa pagô na nyivôye gôémôkubéda. Ahngô mbe: ?Gô mige mimakitsô mbe mômôgôô géyôhé yômba‐a? 3Jésus amaabéa ahngô gô nyivô mbe: ?Môge ndé ômookô anye na Moïse? 4Apharisien angô mbe: Moïse amatsikéa we mbe mômôgôô atenda gésangô seyôha yômba na apatsé môgayeda. 5Vane Jésus amaabéa mbe: Moïse amatsikéa anye ôgie ône te gô disôba yanyô. 6?Ivô v’ebandô éatsenge, Nzambé amavanga nayee? Matendeo maNzambé matôbeenda mbe: Nzambé amavanga mômôgôô na môgeto. 7Te gô ébégôe éne mômôgôô atsika tétedi na yeedi gôedigaa na môgayedi. 8Ahngô abaé aka te ôtô ôvo. Jésus amoomba mbe: T’ebandô ahngô asabadô abaé, aka te ôtô ôvô na koo. 9Tambô môma asatatôa éne émavambéda Nzambé.
10Vamabakahngô ahndé digaa gô eba, aneengie amoomba éévôa Jésus gô ébégôe éne. 11Jésus angô mbe: Okô mômôgôô akini môgayedi gôébongo muene môgeto akeyi te gésasô. Abévédi ône amapanga. 12Gôndé môgeto te mônongovo. Okô angô ayôha yômba akebaaô na muene mômôgôô, angô akeyi te gésasô.
Jésus ameetsa anéngé mate
(Bono na Matt. 19:13–15, Luc 18:15–17)
13Oma amakea n’anaô na gôndé Jésus mbe akebanda ahngô. N’aneengie ahmadékéda ahngô mbe: Nônakea n’ana na gôndé Jésus. 14Vamookô Jésus nane asiene buedi na amavovo n’aneengie mbe: Tsikani anee avigéké na gôndé me. Nômbioobma édékéda ahngô. Okumu aNzambé ôndéké gôndé muetso andé mônongo ône. 15Me nanôbeenda na gô pie mbe ône asasinga ôtômu aNzambé gasingéa ana angô, asangeengéa g’ôkumu aNzambé 16Vane Jésus amavata anee va mitanda miedi. Amaatsakéga mogo medi gôéétsa ahngô mate na mavovia medi.
Gékiti gémaviga na gôndé Jésus
(Bono na Matt. 19:16–30, Luc 18:18–30)
17Vamaba Jésus aka gô keaga gô nzéa, mômôgôô amaviga pita na gôndé angô. Amasiba mabongome va mbene aJésus. Angô mbe: Ewe môékédi ôndé ti môékédi amôsoba, aabéa me. ?Gôéba na monyo amôbô na môbô nangeenda nayee? 18Jésus amamônikéda mbe: ?Oteta me mbe môma amôsoba nayee? Gôsaba môma amôsôba buétsé te Nzambé amuene. 19Ewe ôsabômu mitôma na mige miaNzambé mbe: Ombiayôa. Ombiakea gésasô. Ombieesua. Ombiapatéa môma noo. Ombiabôméda akoo. Gobeda tétoo na yoo. 20Mômôgôô nône amaabéa Jésus mbe: Môékédi, me bandôa g’ôanéngé ami, nakenea mige miemi mietso. 21Jésus amamôbono na gényônga. Angô mbe: Gôndé éwe gôsanéyi ébégô évo. Kiaka sômbédé éetso éndé n’ewe. Bonge dodeye ôkekabanéa misuga. N’ewe ôngaba n’okiti g’ôba. Na vane ôviga. Oka nzéepo n’ami. 22Vamookô mômôgôô ôgie ône, gédimô sedi gémadita. Na amakea na mônyongo. Môtémedi ômeena panda gôébégô amabaka n’okiti edi ôvôni.
23Jésus amabono aneegie andé va kôbangô edi. Angô mbe: Endé ti édagani gôndé ékiti gôéasugéa anguene gôéengéa g’ôkumu aNzambé. 24Aneengie amatsapéô gô mavovia mema. Na Jésus amapandôéda mbe: Anami, éndé ti édagani gôndé môma eetsa môtémedi g’ôkitie gôéengéa g’ôkumu aNzambé. 25Amaguna tsava mbe: Te édagani nyama épôni ééndô mbe chameau gôédugu gô épôdéké éatsôngi. Amatimbôanéda mbe: Eôtéa ti édagani gékiti gôéengéa g’ôkumu aNzambé. 26Aneengie amasôbasôbana g’ôgie ône. Ameevôana anguene n’anguene mbe: ?Akasô gôngaba môma angoobogoni‐a? 27Jésus amabono ahngô. Amavovo n’ahngô mbe: Gô ngudi yamôma amuene gôédiia géobogeo, géndégégé. Buétsé te gô ndugi yaNzambé. Amuene Nzambé asadagéô ta n’ebégô évo.
28Pierre amavovo n’edi mbe: Aanaka Kumu, we tômatsika éetso, ti we adua. Na tôndé ti gôékea nzéepo n’ewe. 29Jésus amaabéa ahngô mbe: Nanôbeenda na gô pie mbe ône atsika ebedi na anayeedi na yeedi na tétedi, n’anedi, na tsaga yedi, atsika éangô gô inami na gô Tsangône Eamôsôba édué, 30angô angootéa édiia gô pitsi yedi. Vamatsikangô eba ôvo, angaba na môkama ayeba. Amatsika muanayeedi môvo, angaba na môkama aneyee. Na iyee te mônongovo. N’anee te mônongovo. Na tsagaye, te nane. Angadiia dôta gékuanô. Gô pitsiye yagô mbene angaba na monyo amôbô na môbô. 31Ayekani andé gô mbene angaba gô ngima. Na vane gémbene amootu na géngima.
Jésus amoomba ébeenda éne éamôtatô ôwedi na gékundugéô sedi
(Bono na Matt. 20:17–19, Luc 18:31–34)
32Jésus n’ane amabaka n’edi ahmakea gô nzéa étsiga na gô Jérusalem. Jésus amoota gô mbene. N’aneengi edi ahmakebanganakani ahmaviga gô ngima. N’avo ahmabaka va ngima aô ahmookô gomo asinyôngéô émôévôa nivyô. Jésus amoomba éweseda aneengi edi nzima n’abaé gôévovo n’ahngô mane mangabuéa gôndé amuene Jésus. 33Angô mbe: Oôkôni édué. Wa n’anyô tôkea na gô Jérusalem. Te gône gôngakabô me Muana Amôma, na gôndé tsesu yadeekedi adigondoku n’anigôi amige miaNzambé. Nangeesédu gôéyôhu. Nangadeekedu na gôndé oma ahsavamba na Nzambé. 34Ahngô ahngadeta me. Ahngatuéa me mate. Ahngabita me na mibitô mievongo. Ahngayôha me. Va mbene apitsi dibaé, éne éamôtatô nangakunduga.
Môduke aJacques na Jean
(Bono na Matt. 20:20–28)
35Vane Jacques na Jean anee abaé aZébédée, ahmaviga na vandé Jésus. Ahngô mbe: Tônyôngéô mbe éwe ôéndéa we éne éduka we. 36Jésus amabambéa ahngô mbe: ?Nônyôngéô nanôénda nayee? 37Ahngô mbe: Vangaba éwe gô ényangee okumaka, ôbongo we tôngaba va kôbangô oô. Môvo gésa gémôgôô. Môvo gésa gégeto. 38Jésus angô mbe: Anye nôsamenya éne éduka anye. ?Gébunguge gétubéda magugame mangeena me, anye nôngoonôa ényua sangô‐a? ?Batemene étubéda panda éngeenôô me, anye nôngoongôa éenaméa yangô‐a? 39N’ahngô ahmaabéa mbe: We tôngoongôa. Jésus angô mbe: Na gô pie anye nônganyua gébunguge génganyua me. Na nôngeenôô batemene éngeenôô me. 40Gôndé me gôénôsevôéa édigaa, vo géeyo gégeto vo géeyo gémôgôô, ésaba gôndé me. Tunguye dindé yaane amakônzéô yangô na Nzambé.
41Vamookô avo nzima aneengi mavoviame mane ahmakambôgéa Jacques na Jean. 42Jésus amabaméa ahngô muetso gôébeenda ahngô mbe: Anye nôsabômu mbe ane akumédu gô tsengene mbe: tsesu, te ahngô atôma omee waô gandé avéga. N’oma avôni atubéda ngudi yaô gô mane matômahngô. 43Géé gôndé anye ésaba nane. Okô môvo va gatse anyô anyôngéô éba môma môvôni, abaké môyanzi aakedi. 44Gôndé anye, ône anyôngéô étubéda ényangee éedi abaké môvéga aakedi muetso. 45Béyé me Muana Amôma, vamaviga me tsivutéé mogo mami gôétôma oma, ivô namatôma namabanda na mogo mami. Nameetsa memuene monyo ami ngu na g’ôwa, te môvano gôeoboo oma ayekani.
Jésus amadôngéda Bartimée, môsi pogu
(Bono na Matt. 20:29–34, Luc 18:35–43)
46Jésus n’aneengi edi na géômbé gévôni ahmatsiga gô Jéricho. Vamootahngô mbôkane ahmadenga gékonzo, môsi pogu na miduke, andé digaa va kôbangô anzéa. Inedi te Bartimée, muanee aTimée. 47Vamookô Bartimée mbe ône ootini te Jésus môsi Nazareth, amamôbambéa mbe: Ewe Jésus, Muana aDavid eena me ngeba. 48Ayekani ahmamôsemba na ahmamôdékéda mbe: Kôda. Ivô Bartimée amoomba éadôngana na gô ngongo mbe: Ewe Muana aDavid eena me ngeba. 49Jésus amasikama na amavovo mbe: Bambéani angô. Ahngô ahmabambéa môsi pogu mbe: Suméda môtémee. Timôgaka. Jésus agôbambéa. 50Vane amagunya ngoyine yedi épôni na amayavôga étimôga. Amakea na vandé Jésus. 51Jésus ameevôa angô mbe: ?Onyôngéô mbe nagôénda nayee? Môsi pogu angô mbe: Kumu ami. Nanyôngéô mbe ôpoeda me miso mema. 52Jésus amamôbeenda mbe: Kiaka. Odôngédiô te gôsitsumewe ngudi yami paga.
Tsina na tsina miso medi mamapoga. Na amakea na Jésus nzéepo.
Currently Selected:
Marc 10: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
