Luc 6

Jésus na mabégô manyee edunda

(Bono na Matt. 12:1–8, Marc 2:23–28)

1Nyee edunda Jésus n’aneengi edi ahmakitsangana tsaga apôtô.#6:1 G’ôgi asuada gômatetu mivo mibie. Aneengie aJésus ahmakea ahkudua aduka pôtô. Ahmookôa yangô na amaa. 2Apharisien ahmeevôa Jésus mbe: ?Aneengie woo eenda gô nyee edunda éne émakitsô môge mbe, gééndô nyee edunda nayee? 3Jésus amaabéa ahngô mbe: ?Anye madeo nôsitanga éne émeenda David, angô n’ane ahmabaka n’edi vamookô ahngô nzaa-a? 4David ameengéa na gô eba aNzambé gôébongo mipemba. Ameetsa akedi na ahmaa muetso mipemba miamôge misaaka oma muetso, buétsé te anguene adeekedi adigondoku. 5Menyani mbe: Me Muana Amôma te Kumu anyee adunda.

Gômabaka mômôgôô n’ogogo ômasombegani

(Bono na Matt. 12:9–14, Marc 3:1–6)

6Ovo enyaa edunda, Jésus ameengéa na gô eba agéwanyéô gôéékéda. Wangô amadenga mômôgôô andé n’ogogo ômôgôô ômasombegani. 7Anigôi amige miaNzambé n’Apharisien amamôsingégéda gôémôbono mbe mavooe angamôdôngéda nyee edunda. Ahmeenda nana te gôémôsoseda. 8Ivô Jésus asibômu matasa maô. Amatôma môsi ôgogoe mbe: Timôga. Tema môtie va miso momeaa muetso. Mômôgôô nône amatimôga va miso moma. 9Vane Jésus amavovo mbe: Me nanôévôa mbe: ?Nyee edunda na gôéyanza mamisôba na gôéyanza mabévani, éne éabuedi yééni? ?Na gôédôngéda môma na gôéyôha môma, éne éabuedi yééni? 10Jésus amabono muetso amadenganôni na amatôma mômôgôô nône mbe: Konyo ôgogoe woo. Vamakonyo angô ôgogoe, ômadônga. 11Ivô avo amakambôga na ameevôana anguene n’anguene mbe: ?Tôvangéa Jésus pangô ndé?

Jésus amasevôa aneengi edi nzima n’abaé

(Bono na Matt. 10:1–4, Marc 3:13–19)

12Gô ndéô nene, Jésus amabata gô ngongo amôkôdi gôévovo na Nzambé. Pitsi amôbongo asiebogé vio, amavovo na Nzambé. 13Vamaagiia nyee amabambéa aneengie edi amasevoa nzima n’abaé. Amateta angô mbe, ane amasevouni na amatômuni. 14Angô nzima n’abaé, miname maô te Simon. Jésus amoogaka angô mbe, Pierre. Na muanaya aPierre, André. Na dôta Jacques na Jean na Philippe na Barthélemy. 15Na Matthieu na Thomas na Jacques muana aAlphée, na épo Simon, (ône amabaka gétômbiatômbia gô mabégô matsengene). 16Na Judas dibaé. Epo te muana aJacques. Na épo te Judas Iscariote, ône amakoga môkabi aJésus.

Jésus ameekéda na amadôngéda oma

(Bono na Matt. 4:23–25)

17Jésus n’aneengi edi nzima n’abaé amasuma gô môkôdie gôébuéa na gô tungu éagéndamba. Gône amadengana n’avo aneengi ayekani. Vamabaka dôta na pingô yoma amaviga gô tsengene nyetso éaJudée na misenge miaJérusalem na Tyr na Sidon. 18Muetso amaviga gôéôkô gameekéda Jésus na gôédôngédu mabeeame maô. Na ane dôta amayungéduku n’edidi ébévani amadôngédu. 19Muetso amayôngéô ébanda Jésus gôébégô gôndé angô gômakusa ngudi yedôngéda muetso.

Mate na môkôkôu

(Bono na Matt. 5:1–12)

20Jésus amabono aneengie edi na amavovo n’ahngô mbe:

Ti gô gényônga géndé n’anye nôndé gébé na sôma.

Okumu aNzambé ôndé gôndé anye.

21Ti gô gényônga géndé n’anye nôôkô nzaa ndéô yedi.

Anye nôngaba nômangutéda na gébutédô môyakô.

Ti gô gényônga géndé n’anye nôdéani ndéô yedi.

Anye nôngaséka na gényônga.

22Ti gô gényônga géndé n’anye vadudanô anye n’oma gôébégô éami, me Muana Amôma. Tsôkéakani ôkô oma anôkina, na anôbuanya, na anôdeta mbe anye oma aJésus nôsanyepa. 23Tsôkéakani vabuéa mônongo amabégô. Tsédani gô mangô na gényônga gôébégô nôngadiia misenda g’ôba. Va mbeego anye madeo nôsibôtu, apandôédi amatasa maNzambé amakuanô te nane na téteye yane anôkuanani.

24Ti gô maguga mandé n’anye nôdônga g’ôkitie wanyô.

Gényôngage sanyô, nômani égéena.

25Ti gô maguga mandé n’anye nôsabuta sôma.

Anye nôngôôkô nzaa épôni.

Ti gô maguga mandé n’anye nôsékani pitsi yedi.

Anye nôngaba na mitéma miditani na nôngadéa miéngé.

26Ti gô maguga mandé n’anye nôkumédu n’akanyô.

Anye madeo nôsibôtu eekédi adiboe amakumédu te nane.

Nyôngéôni adudeoe wanyô

(Bono na Matt. 5:38–48, 7:12a)

27Jésus angô mbe: Me navovo te n’anye nôôkôni mbe: Nyôngéôni adudeoe wanyô. Indani mamisôba gôndé ane anôduduni. 28Istani mate gôndé ane anôkokooni. Vovoni na Nzambé mamisôba gôndé ane anôkuanani. 29Okô môma agôbômôyi gô ébaku évo, itsa angô agôbômôa dôta gô évo. Okô môma anyôngéô ébongo ngoyine yoo épôni, kôndéga angô na gényônga buéyé na kapane nyetso. 30Gôndé ône agôduka sôma, buedi gôémôétsa sangô. Okô môma abongi sômage soo, ômbiamôwata sangô. 31Indéakani akanyô ngu na éne ényôngéô anye mbe akanyô anôéndéa.

32Okô anye nônyôngéô ane anônyôngéôni ?nômenya mbe Nzambé anganôkuméda-a? Asanganôkuméda. Buéyé n’oma abévani asadagéô ényôngéô ane avamba n’ahngô. 33Okô anye nôénda mamisôba gôndé ane anôéndéa mamisôba ?nômenya mbe Nzambé anganôkuméda-a? Asanganôkuméda. Buéyé n’oma abévani eenda te nane. 34Okô nôsombeda te gôndé ane anganikédéa anye tsômbine nyetso, gésombede gôndé ane asanganônikédéani ?nômenya mbe Nzambé anganôkuméda-a? Asanganôkuméda. Buéyé oma abévani asombeda gôndé oma n’aô abévani ane anganikédéa tsômbine nyetso. 35Géé anye, nyôngéôni ane anôduduni. Indani ahngô mamisôba. Sombedani ahngô gébé n’etasa mbe nôngavanéô. Vane nôngeetsô na Nzambé môsenda ôvôni na nôngamenyanganô mbe ana aNzambé ône andé Kumu angudi yetso. Gôébégô amuene Nzambé eenda mamisôba gôndé ane abévani na asamôkumédani. 36Bakani na ngeba gandé Tétanyô angô kumu angeba.

Nômbiatsuava akanyô

(Bono na Matt. 7:1–5)

37Nômbiatsuava akanyô kabaga anye nôtsundédu na Nzambé. Nômbieeséda akanyô, kabaga Nzambé anôeséda. Singéani akanyô kokoo, na Nzambé anganôsingéa dôta kokoo. 38Itsani akanyô, na Nzambé anganôétsa. Gôngeetéô gô gébémbége soo gévôni, ôkabô ôvôni. Gébémbége soo géngayôa na géngatsukédu mbe géômba éyuésédu na nzôngô. G’ôkanee ôkanéga anye gôéétsa akanyô, Nzambé anganôkanégéa mane medi mobiia te mônongovo.

39Jésus amagunya ahngô tsava gô nyivo mbe: ?Môsi pogu anoongôa étévéda môkedi nzéa-ma? Aé, asangoongôa kabaga angô muetso abaé akuyaméa gô éduku. 40One eekéduni asangootéa môékédine wedi. Ivô ane eekédiôni ôkô amenya ti v’ekôdéô éamenyaga angaba ga môékédine waô.

41Ewe ôena tsengesengene éndé gô éso éamôkoo na ?ôseena éengôe éndé gô ésoe yoo nayee? 42Ewe ôseena éengô éndé gô ésoe yoo ?nayee ôongôa évovo na môkoo mbe: Wee ami, singéa me nagônôtôa tsengesengene éndé gô ésoe yoo? Ewe te môma enyepa éamônya, panga énôtôa éengôe éndé gô ésoe yoo. Vane ôngeena na vede gôénôtôa tsengesengene éndé gô éso éamôkoo.

Géétété na miônda mibôta sangô

(Bono na Matt. 7:16–20, 12:33–35)

43Géétété samôsôba gésoongôa ébôta miônda mibévani na géétété gébévani gésoongôa ébôta miônda miamisôba. 44Eétété éetso émenyanganô te gô miôndamie mibôtangô. ?Môma aneenga masagu gô mônzembe-a? ?Môma aduka pivi gô kavanga-a? 45Môma amôsôba akuséda mane mamisôba g’ôkitie ômasuégangô gô môtéma. Môma môbévani akuséda mane mabévani g’ôkitie ômasuégangô gô môtéma. Menyani mbe éne éndé gô môtéma ékusa te gô mônya.

Tsava éasaayi ayeba

(Bono na Matt. 7:24–27)

46?Anye nayee nôénda me mbe: Kumu, Kumu, na anye nôsagobeda me gô mane matôma me? 47Nanganônigôa gandé anye oma. Muetso ahviga na gôndé me na ahngô ookô mane mavovo me na ahkenea mangô nanôbeenda éne égono n’ahngô. 48Ahndé ga môma amasaa eba. Amasiga ngu na gô totene éamataé gôékônza ôbôgee. Géningôge gémaviga na mebame mamaguua totone. Na eba ôsipupé gômasaaô angô gô ngongo obobo. 49Na ône ookô mavovia mami na asakenea mangô agono na môvo môma amasaa ebedi va ngongo atoto gésigé ôbôgee. Géningôge gémaviga na gémaguua eba. Ebee ômakuéa. Eetso émabungana.

Currently Selected:

Luc 6: TSV

Highlight

Copy