Luc 5

Jésus amabambéa aneengie amapanga

(Bono na Matt. 4:18–22, Marc 1:16–20)

1Nyovo Jésus amabaka va kôbangô amubu ôéndô mbe: Génésareth. Géômbé gévôni soma gémabébana na gôndé angô gôéôkô ôgi aNzambé. 2Jésus ameena mbôngô dibaé v’ehbôngô. Kumu ayangô te agunyi ambusa amabaka mitie gô mubu gôéôvôa mbusa yaô. 3Jésus amapeka gô mbôngône éamômôgôô môvo, inedi Simon. Amatôma Simon mbe: Tenôa tôwesea pesu tôtsika tsényéne. Jésus amadigaa gô mbôngône na ameekéda géômbége.

4Vamamanangô eekéda amatôma Simon mbe: Weseda mbôngône na va ngenge gôtiba mebame. Vane éwe n’akoo, gunyani mbusaye nôngayôha nyama. 5Simon amanônigôa mbe: Kumu, menya mbe we tôyanzi pitsine nyetso géyôhé nyama ta n’epo. Ivô g’ôgie woo, nangeenda gatômi éwe.

6Vane Pierre n’akedi amagunya mbusane. Amapika pingô yanyama diyekani, na mbusane émabandôa ékakéga. 7Amasombeda akaô gôébambéa angô mbe: Vigani nôviwedéa we. Akaô amaviga. Mbôngôye yetso dibaé dimasugéa neditee éanyamaye dimakuyukuni dimabaka mbe ditôndôméa. 8Vameena Simon Pierre gômayeka nyamaye, amasiba mabongo medi va mbene aJésus na ameeséda amuene mbe: Ah Kumu, me te môma môbévani, nôtôga vandé me. 9Emabaka nane te gômatsôpu Simon n’akedi muetso na gomo gôébégô éanyama diyekani dimayôha ahngô na mbusa yaô. 10N’ane amayanza géngénza na Simon te mônongovo. Mina maô te Jacques na Jean, anee aZébédée. Jésus amavovo na Simon mbe: Ombiôkô gomo. Ewe ôvooto nyama na mbusane yoo, bandôa deo noo ôngavooto oma na gôndé Nzambé. 11Amatsegeda mbôngôye na va tsényé. Angô atatô ahmatsika éetso gôékea nzéepo na Jésus.

Jésus amadôngéda môsi ébeea éagega

(Bono na Matt. 8:1–4, Marc 1:40–45)

12Jésus amaba gô mbôka éndé môsi ébeea éagega. Vameenahngô Jésus amagudama na gô tsina gôégondo Jésus mbe: Kumu, ôkô ônyôngéô ôsadagéô édongéda me. 13Jésus amakonyo ôgogo edi na amamôbanda. Amamôaabéa mbe: Nanyôngéô égôdôngéda. Odôngi. Tsina na tsina ébeea éedi éagega émadônga. 14Na vane Jésus amamôdékéda mbe: Ombiabeenda ta na môma môvo. Na amamôtôma mbe: Kiaka ôketubéda ôtôe woo gôndé môdeekedi adigondoku. Oétsa ôgondoku ômatôma Moïse, buta mbe oma amenya mbe ôdôngi. 15Buéyé gamadékéda Jésus oma nane, kumane yedi ématsanzabana tsengene nyetso. Oma ayekani amakôvana gôéôkô gameekédangô na gôédôngédu omee waô amabeeani. 16Ivô Jésus amanôtôga vandé ahngô. Amakea na gô tunguye disidenganô oma, mbe avovo na Nzambé.

Jésus amadôngéda môbeeyi amakata éeyo

(Bono na Matt. 9:1–8, Marc 2:1–12)

17Nyovo Jésus amabaka gôéékéda. Apharisien na évovie amaviga gô mbôkaye yetso yagô tsenge ditetu mbe Galilée na Judée, buéyé na dine yagô Jérusalem amadenganô digaa va kôbangô aJésus. Ngudi yaNzambé dimabaka na Jésus gôédôngéda ane amabeeani. 18Avo oma ahmaviga atsua gô gékaka gékonzo gémakata éeyo. Amanyôngéô éengéa n’edi na gô eba gôémôsuméda va mbene aJésus. 19Ivô gômabaka omee ayekani na asiene nzéane gôéôta. Amabata gô ngongo eba na amatuba môahnzee. Gô épôdékée éne amasuméda môbeene andé yama gô gékakage na va mbene aJésus va gatse oma muetso. 20Jésus ameena mbe: Omeaa asatsuma ngudi yami paga. Na amavovo na môbeene mbe: Mômôgôô noo, ébévee éoo ésingéyiô kokoo. 21Anigôi amige miaNzambé na Apharisien amatasa gô mitéma miaô mbe: ?Oô mônongo amôma andé nayee? Angô eenza Nzambé. ?One asingéa ébéva éamôma kokoo indaa? Gôsaba muene, buétsé te amuene Nzambé. 22Jésus amamenya mabégô metso mamatasa ahngô gô tsina yamitéma miaô na ameevôa ahngô mbe: ?Nôndé n’one mônongo amitéma nayee? 23?Gô mabégô mema mabaé, éne ésadaga évovoni yeeni? Okô neenda mbe: Ebévee éoo ésingéyiô kokoo, vo neenda mbe: Timôga kiaka na makôdô moo. 24Ivô nanyôngéô étubéda anye mbe me Muana Amôma nandé n’enyanga gô tsina éva gôésingéa oma kokoo gô ébévee éaô. Vane Jésus amavovo na môbeene mbe: Me natôma éwe mbe: Timôga, bongo gétava soo. Kiaka na gô eboo. 25Tsina na tsina môbeene amatimôga va miso moma muetso. Amavutéga gétavage gémayamangô na amanika na gô ebedi, akuméda Nzambé. 26Muetso ahmatsapéô. Amasôbasôbana na gomo gôékuméda Nzambé mbe: Ti deo noo tôeni mabégô mavôni masienanô na mbeego.

Jésus amabambéa Lévi

(Bono na Matt. 9:9–13, Marc 2:13–17)

27Vamoota ébégôe éne, Jésus amakea gô nzéa. Ameena Lévi, môbongi adepu andé digaa gô tsongo émavanô dode yadepu. Amamôtôma mbe: Oka nzéepo n’ami. 28Lévi amatimôga. Amatsika éedi éetso na amakea géômbé gévo na Jésus.

29Vane Lévi amaambéa Jésus môambô gô ebedi. Abongi ayekani adepu n’avo oma amaa tabudé épo n’edi. 30Apharisien na géômbé sanigôi amige miaNzambé asinyôngéô gômeenahngô Jésus aa na omee ane vavo. Ameevôa aneengie aJésus mbe: ?Anye nôaa na nônyua vavo n’abongi adepu na oma amookanô mbe, abévani, nayee? 31Jésus amaabéa ahngô gô tsava mbe: Ane ahsabeeani ahsookô tsôvé éamôbôgani, te abeeyi ookô môbôgani tsôvé. 32Me tsiviga gôébambéa ane anyepani. Navigi gôébambéa abévie mbe ahkoa mitéma miaô.

Gékinéô samôyakô gôévovo na Nzambé

(Bono na Matt. 9:14–17, Marc 2:18–22)

33Avo oma amavovo na Jésus mbe: Aneengi aJean akina môyakô kuka yetso gôévovo na Nzambé. Na aneengie aApharisien te mônongovo. Géé aneengie woo aa na anyua gékiné. 34Jésus amanigôa ahngô gô tsava mbe: Gô suetine éayômba ?nôngoongôa ékinéda ane akôviôni môyakô amuene kumu ayômbaye andé vangôa? Aé, nôsangakinéda. 35Gô ndéône ésangaba mômôgôône, kumu ayômbaye vangô, géômbé sedi géngakina môyakôe te nyoone. 36Jésus amagunya ahngô tsava mbe: Môma asakaka ngoyi éamanza gôébongo gébambo gôénana sangô gô épôdéké éangoyine ébooini. Okô eendi nane abunzi te ngoyine éamôsôba na dôta éne ébooini ésanyepedu na gébamboge sedôngé. 37Môma asoongôa éétéa maduku mamiduengi gô géetéô sedi sagégôbôkô sanyama gémagasani. Vatogo madukume, gégôbôkôge gémagasani gésavutuga. Sangô géatéga. 38Môma aseenda nane. One amenyani angeetéa maduku mamiduengi gô gégôbôkô gédeedani. 39Okô môma amani éngutu na madukume medangi, asangadônyôngéô ényua mane mamiduengi. Angeenda mbe: Mane manyepani te mane medangi.

Currently Selected:

Luc 5: TSV

Highlight

Copy