Luc 3

Mane mameekéda Jean-Baptiste

(Bono na Matt. 3:1–12, Marc 1:1–8, Jean 1:19–28)

1Môtômine môvôni, Tibère amamana étôma tsengene nyetso gô nzima amipuma na mipuma mitayi. Gô tsina otômue wedi tsengene émakabô n’avo atômie. Ponce Pilate te môtômine agô Judée. Gô tsina otômue aPonce Pilate dôta te Hérode amatôma tsengene éaGalilée. Muanee ayeedi, Philippe amatôma tungu dibaé, Iturée na Trachonite. Môtômi agésa saAbilène te Lysanias. 2Gô mabégô maNzambé, Anne na Caïphe amabaka tsesu yadeekedi adigondoku. Gô ndéô nene, Gédidi SaNzambé gémeengéa na gôndé Jean muana aZacharie, gômadigaa angô gô tsenge émagasani. 3Jean amaseta tsengene nyetso ébambana na mbéne étetu mbe Jourdain. Ameekéda oma mbe: Koani mitéma mianyô gôéba wene mônongo. Diiani bateme gôétubéda gasingéyiô anye kokoo na Nzambé gô ébévee éanyô. 4Vane te vameenanô mane mamatenda Esaïe, môpandôédi amatasa maNzambé gô gésangôge sedi mbe:

Te ôgi ône ômaadôngana gô tsenge émagasani mbe:

Baani nzéa éaKumu.

Tsimamédani buedi nzéa yedi.

5Nyunduye yetso dingayuésédu gôéwanyédu.

Mikôdimie mietso na mivôni na migemige, mingaba éndamba.

Mamongome manzéaye mangakonyogo.

Madukume manzéaye mangeebédu.

6Na oma muetso angeena gayanza Nzambé gôéoboo omedi.

7Oma ayekani amaviga na gôndé Jean gôébatésu n’edi. Amasemba ahngô mbe: Anye nôgono na mbigé. ?Nômenya mbe nôngabusuga ôpisa aNzambé ôvigani-a? ?Nôékédu nane na ndaa? 8Gabôta géétété samôsôba miônda miedi miamisôba anye tubédani ésima éamisôba gôémenyanganô mbe nômakoa mitéma gôéba wene mônongo oma. Anye nôanyepeda anyene mbe we te ana aAbraham. Nônatasa gô éne. Okô Nzambé anyôngéyiô éyekeda ana aAbraham, andé na ngudi yekoa mataé mema maka ana aAbraham. 9N’atsatsee géwangéô géka va mitamba mieétété. Eétété éetso ésabôta miônda miamisôba éngawangô na éngagunyu gô soto.

10Géômbége gémeevôa Jean mbe: ?Tôngeenda nayee? 11Amaabéa ahngô mbe: One andé na ngoyi dibaé, akea akeétsa épo ône asabani. One andé na môyakô, akabéé. 12Abongi adepu amaviga na gôndé Jean gôébatésu. Ameevôa Jean mbe: ?Môékédi, we tôénda nayee? 13Jean amaabéa ahngô mbe: Nôbongo gôndé môma te éne ématômuni. Nômbiakôndéga. 14Na migode ameevôa Jean dôta mbe: ?Na we, tôénda nayee? Amongô ahngô mbe: Nômbiabanda dode yamôma gô ngudi yanyene na buembee wanyô na mônongoe wanyô apataga. Bakani n’ene évanéôkô anye n’atômie.

15Oma muetso amavôtanganô na gényônga gôéôkô mane mangoomba Jean évovo. Amamenyo mbe mavooe Jean te Christ, ône angatômu na Nzambé. 16Vane Jean amanigôa ahngô mbe: Me nanôbatésa na meba. Ivô va ngimami gôngaviga muene na ngudi yedi diôtéa dine yami. Me te gétôkôtôkô. Angô te môtsé. Gétôkôtôkô ôgoeyee géôté môtsé.#3:16 G’ôgi aGrec Jean amagunya tsava éapondu. Ivô tsaba pengo gétôkôtôkô. Nandé ti gô tsina asangô. Anganôbatésa na Gédidi SaNzambé na soto. 17Angô te mônongovo ga môma ookôa pôtô#3:17 G’ôgi aGrec Jésus amateta mivo mibie na étutue éaô. anganôtôa étutu na angakétéga pôtôye gô magobo. Ivô angatumba étutue gô soto géseemakani.

18Gô mene meekédu mayekani Jean amanigôa oma Tsangô Eamôsôba. 19Buéyé gameekéda Jean nane amasemba Hérode, môtômine atsenge gômabongo angô môgaya amôdimi edi. Môgetone te Hérodiade. Na Jean amamôsemba dôta gô mavo mabégô mabévani mamayanza Hérode. 20Vane Hérode amakôndéga yene ébégô ébévani, ameengéda Jean na gô eba atsôgôô.

Jean amabatésa Jésus

(Bono na Matt. 3:13–17, Marc 1:9–11)

21Jean amabatésa muetso amadenganôni. Na Jésus muetso, amabatésu n’edi. Vamabakangô gôévovo na Nzambé, ôbee ômakukuga. 22Gédidi SaNzambé gémasuma na gôndé Jésus gô gégoni saménga. Ogi ômookanô ômavovo g’ôba mbe: Ewe te muanami amôtôma amiso. Me nagônyôngéô ti na nzoo na gô môtéma.

Bôkudu aJésus

(Bono na Matt. 1:1–17)

23Jésus amabaka aka nzima ditatô yamipuma vamabandôa angô gésooge sedi. Gô matasa moma amamenyaka mbe, Jésus te muana aJoseph. Joseph dôta amabôtu na Héli. 24Héli amabôtu na Matthat. Matthat amabôtu na Lévi. Lévi amabôtu na Melchi. Melchi amabôtu na Jannaï. Jannaï amabôtu na Joseph. 25Joseph amabôtu na Matthatias. Matthatias amabôtu na Amos. Amos amabôtu na Nahum. Nahum amabôtu na Esli. Esli amabôtu na Naggaï. 26Naggaï amabôtu na Maath. Maath amabôtu na Matthatias. Matthatias amabôtu na Sémeïn. Sémeïn amabôtu na Josech. Josech amabôtu na Joda. 27Joda amabôtu na Joanan. Joanan amabôtu na Rhésa. Rhésa amabôtu na Zorobabel. Zorobabel amabôtu na Salathiel. Salathiel amabôtu na Néri. 28Néri amabôtu na Melchi. Melchi amabôtu na Addi. Addi amabôtu na Kosam. Kosam amabôtu na Elmadam. Elmadam amabôtu na Er. 29Er amabôtu na Jésus. Jésus amabôtu na Eliézer. Eliézer amabôtu na Jorim. Jorim amabôtu na Matthat. Matthat amabôtu na Lévi. 30Lévi amabôtu na Siméon. Siméon amabôtu na Juda. Juda amabôtu na Joseph. Joseph amabôtu na Jonam. Jonam amabôtu na Eliakim. 31Eliakim amabôtu na Méléa. Méléa amabôtu na Menna. Menna amabôtu na Matthata. Matthata amabôtu na Nathan. Nathan amabôtu na David. 32David amabôtu na Isaï. Isaï amabôtu na Jobed. Jobed amabôtu na Booz. Booz amabôtu na Sala. Sala amabôtu na Naasson. 33Naasson amabôtu na Aminadab. Aminadab amabôtu na Admin. Admin amabôtu na Arni. Arni amabôtu na Esrom. Esrom amabôtu na Pharès. Pharès amabôtu na Juda. 34Juda amabôtu na Jacob. Jacob amabôtu na Isaac. Isaac amabôtu na Abraham. Abraham amabôtu na Thara. Thara amabôtu na Nachor. 35Nachor amabôtu na Seruch. Seruch amabôtu na Ragau. Ragau amabôtu na Phalek. Phalek amabôtu na Eber. Eber amabôtu na Sala. 36Sala amabôtu na Kaïnam. Kaïnam amabôtu na Arphaxad. Arphaxad amabôtu na Sem. Sem amabôtu na Noé. Noé amabôtu na Lamech. 37Lamech amabôtu na Mathusala. Mathusala amabôtu na Enoch. Enoch amabôtu na Jared. Jared amabôtu na Maléléel. Maléléel amabôtu na Kaïnan. 38Kaïnan amabôtu na Enos. Enos amabôtu na Seth. Seth amabôtu na Adam. Adam amavangô na Nzambé.

Currently Selected:

Luc 3: TSV

Highlight

Copy