Luc 2

Obôtu aJésus

(Bono na Matt. 1:18–25)

1Gô ndéône yangô, môtômi atsenge César Auguste amatôma mbe: Gôngaba gétendanéô samina moma muetso gô tsengeye ditôma we asi Rome. 2Gétendanéô gegé samapanga gémeendô gô ndéône émabaka Quirinius môtômi aSyrie. 3Môma na môma amakea na gô môsenge edi gôétendu.

4Joseph amatimôga gô môsenge ôtetu mbe Nazareth, ôndé gô tsenge éaGalilée, gôékea na gô môsenge aDavid ôtetu mbe Bethléhem, ôndé gô Judée. Gôébégô angô amabaka môsi ébôta éaDavid. 5Joseph te amamana éteteda Marie mbe angamôbaa. Amakea gôétendu n’edi, Marie te andé n’emée. 6Vamabakahngô gô Bethléhem, ndéône émabuéa gôndé Marie gôébôta. 7Amabôta muanee akuua amômôgôô. Amamôdipa na mikanda na amamôyaméda gô gésô gévôni gémaaka nyamaye. Gôébégô gôndé ahngô gôsibaké tungu gô eba agenda.

Môsi g’ôba amatsiga gôndé akeneyi amandombo

8Gômabaka gô tsenge nene akeneyi amandombo. Ahmabaka gô kumune na pitsi gôékenea diôbua yaô. 9Vamabakahngô vane, môsi g’ôba amavigédu na Kumu Nzambé, amatsutsuga na vandé ahngô. Gévede gévôni saKumu gématana n’obébayi ôtubéda ôndômba aNzambé vandé ahngô. Ahmatsôpu na mangongo. 10Môsi g’ôba amabeenda ahngô mbe: Nômbiena gomo ta na pesu. Oôkôni me. Nanôtsuéa tsangô éamôsôba. Endé ti ébégô éagényônga gévôni éngatsôkéa oma muetso. 11Te deo noo, Mooboyi abôtiô gôndé anye gô môsenge aDavid. Angô te Christ, ône amatômu na Nzambé. Angô te Kumu. 12Bononi egé te gémbégéa mbe anye nôngamenya angô. Nôngadenga muana adipiô na mikanda andé yama gô gésô gévôni.

13Tsina na tsina gômaviga géômbé gévôni sasi g’ôba amavigédu na Nzambé gôédenga môkaô. Amakuméda Nzambé mbe:

14Kumédani Nzambé gô tungu yag’ôba na gô

Tsina gôbaké gétabé gôndé oma anyôngéô angô.

Akeneyi amandombo amakea na gô Bethléhem

15Vamanôtôga asi g’ôba vandé akeneyi gôénika na g’ôba, akeneyie ahmavovo anguene n’anguene mbe: Okani na gô Bethléhem. Tôkéena éne étsigi wangô, éne étômenyédiô na Kumu Nzambé. 16Ahmayavôga ékea na wangô. Ahmadenga Marie na Joseph na muanee andé yama gô gésô. 17Vameena akeneyie muanee, ahmanigôa mane mamuanee avembo mookiô ahngô n’asi g’ôba. 18Muetso ahmookôni ahmatsapéô gô mane mamavovo akeneyie. 19Ivô Marie ahmakenea mabégô mema gô môtémedi na amatanganéda mangô. 20Akeneyie ahmanika. Ahmaneegeda na ahmakuméda Nzambé gô mane mamookô ahngô na mane mameenahngô. Metso mamabaka gamabeendu ahngô na môsi g’ôba.

Jésus amoogu va mbene oma

21Vamabuéa pitsine éagénana, ndéône émabuéa gôégeeta muanee. Te ndéône émoogu angô va mbene oma mbe, Jésus. Ene te inee émabeendu Marie na môsi g’ôba amavigédu na Nzambé, Marie madeo asitsua émee.

Jésus amadeekedu na gôndé Nzambé

22Ndéône émabuéa gôndé Joseph na Marie gôégobeda gésôga segôgéda ôtôe gamatôma Moïse va mbeego. Amaviga na muanee na gô Jérusalem gôémôdeekeda na gôndé Kumu Nzambé. 23Gô mitôma miaNzambé gômatendu mbe: Muana muetso akuua amômôgôô, adeekedu na gôndé Nzambé gôéyanzéa angô. 24Joseph na Marie amadeekeda dôta ôgondoku ômatôma Kumu Nzambé mbe: Nôdeekeda mabembi mabaé, mômé na môgadi, kôndi nane ménga dibaé mômé na môgadi.

25Gô Jérusalem gômabaka mômôgôô atetu mbe Siméôn. Amabaka môma amôsôba. Amagobeda Nzambé na ameenéa gévigéô saMooboyine ana aIsraël. Gédidi SaNzambé gémabaka n’edi. 26Na sangô gémeevéda Siméon mbe: Ewe ôsangawa ta madeo ôsiena Mooboyi angakudégéa Kumu Nzambé anye. 27Nyovo, Gédidi SaNzambé gématôma Siméon gôékea na gô eba aNzambé. Nyoone te ômatsiga Joseph na Marie amaviga na Jésus, muanee waô avembo gôégobeda môtômee ômatômuku va mbeego. 28Siméon amadeeka Jésus gô mogo medi na amakuméda Nzambé mbe:

29Ah Kumu ami, neeni n’atsatsee éne émavangewe ébuéyi.

Tambô singa me nawa na gétabé gegé.

30Gôébégô miso mami meeni Mooboyine akudégi éwe.

31Angô te géobogeo gémakônzéa éwe oma muetso.

32Angô te gévede gévôni géngatanéda éwe gôndé asi tsengeye yetso.

Gôndé angô omee woo, ana aIsraël angakumédu.

Siméon amapandôéda matasa maNzambé

33Joseph na Marie amatsapéô gô mane mamavovo Siméon gôébégô éaJésus. 34Siméon ameetsa ahngô mate na mavovia medi. Amanigôa Marie, yeene aJésus mbe: Nzambé amasevôa muanee ôdôô gôékubéda avo ana aIsraël ayekani, na gôétômba avo ana aIsraël ayekani. Angô te gémbégéa gémeetsa Nzambé géngakinô n’avo oma. 35Matasa mamasuégu gô mitéma mioma ayekani mangatsutsua te muanee ôdôô. Na éwe, yeene amuanee, ébaga éapievia engatuma éwe gô môtémee.

Môpandôédi amatasa maNzambé Anne amabaka gô eba aNzambé

36Gômabaka dôta gô Jérusalem môgeto, môpandôédi amatasa maNzambé. Inedi Anne, muana aPhanuel, môsi ébôta éAsser. Amabaka amadômbéa pepe. G’ôtômbôe wedi amadigaa mipuma tsambué na mômôgôône amabaaka angô. Te mômôgôône wakaga. 37Anne amadigaa môkué gébaaô ngu na vamadômbéa angô aka nzima génana na mipuma minayi. Asinôtôgé gô eba aNzambé. Amayanzéa Nzambé na pitsi n’omanda. Amakina môyakô gôévovo na Nzambé. 38Anne amatsiga gô eba aNzambé na amadenga Siméon na Joseph na Marie andé wangô. Anne amakuméda Nzambé. Vane gôndé muetso ameenéa Mooboyine angatômu na Nzambé gôéoboo Jérusalem, Anne amanigôa gameenangô muanee, Jésus mbe atsigi.

Môtôô agô Nazareth

39Joseph na Marie amadugéda mitôma miaKumu Nzambé gôndé muanee. Na vane amanika na Jésus na gô mbôkane yaô éaNazareth gô tsenge étetu mbe Galilée. 40Muanee amoongôga na amoodo. Amabaka na môtéma agémôma. Eodo na mate maNzambé mamabaka gôndé angô.

Vamaba Jésus aka mônzambu amabuéa gô eba aNzambé

41Mipuma mietso Joseph na Marie amakiaka na gô Jérusalem gô ndéô éneegedu sueti éaPâque. 42Vamabaka Jésus aka nzima na mipuma mibaé amakea te muetso gamabaka gésima saô. 43Vamagôga suetine, Joseph na Marie amanika na gô mbôkaô. Ivô muanaô Jésus amasanéa gô Jérusalem. Yeedi na tétedi asimenye. 44Amamenya mbe Jésus andéké n’avo ana akaô amakiaka géômbé gô nzéa. Nyee amapanga amôtôôe ômeeda, amakea abuta muanee gôndé kindaô na wee yaô. 45Ivô asimôene. Amanika na gô Jérusalem akea amôbuta nzéane nyetso. 46Pitsine éamôtatô amamôdenga andé digaa gô eba aNzambé. Amabaka va gatse anigôi amige miaNzambé, gôéôkô gasupuangô na gôéévôa ahngô nyivôye. 47Muetso amookôni amatsapéô gô éodoe émabaka n’edi na gô mônongoe ômaabéa angô nyivôye yaô. 48Vameenanô Jésus na yeedi na tétedi, ahmatsapéô. Yeedi amamôsemba mbe: ?Ah muanami nayee ôéndi we nane? Wa na tétoo tôkebanganiki éwe. Tôbuti éwe ti butaga. 49Jésus amaabéa ahngô mbe: ?Anye nôbuti me gôndé? ?Anye nôsamenya mbe gésooge sami géndé te gô eba aTéta égô-a? 50Ivô ahngô asinigôgéô éne émavovo muanaô Jésus.

51Vane Jésus amanika n’ahngô na gô Nazareth. Amagobeda tétedi na yeedi. Yeedi Marie amakenea mabégôme mane gô môtémedi na amamatanganéda. 52Otô aJésus ômavunda na ômoongôga. Môtémedi dôta na matasa medi mamakôndama te kôndama. Amadigaa kuanakue va mbene aNzambé na va mbene oma.

Currently Selected:

Luc 2: TSV

Highlight

Copy