Mayanzame 25

Paul amabuéda ébégôe éedi na gôndé pene andé gô Rome

1Môtômine atsatsee inedi Festus, amatsiga gô tsengene éaCésarée éngatômangô. Ameeboga pitsi dibaé. Ene éamôtatô amakea na gô Jérusalem. 2Gô Jérusalem pene éadeekedi adigondoku n’Ajuif avôni amakea na gôndé Festus gôésunda Paul. 3Na amamôduka mbe: Singa we tôtsua Paul avitsundédu gô Jérusalem égô. Tambô kaka gôémôtsundéda. Te gô gépangô saô gémavangahngô mbe angamôyôha gô nzéa. 4Ivô Festus amakékôa mbe: Paul andé gôékeneo gô eba atsôgôô gô Césarée. Memuene dôta nanganika n’atsatsee na wangô. 5Angô mbe: Buedi mbe avo vandé anye atômie aAjuif nôkea n’ami na gô Césarée gôétsundéda mômôgôô none ôkô mbe andé n’oési.

6Festus amamana gô Jérusalem ôkana apitsi ditenadinayi na amanika na gô Césarée. N’ongôngôe ône amadigaa gô eba amisoso na amatôma migode gôéviga na Paul. 7Vamatsiga Paul gô eba amisoso, Ajuife, ane amaviga gô Jérusalem amamôseta. Amamôsunda mabégô mayekani mootéa ébévani. Ivô ahsibé na ngudi yetubéda mbe na gô pie Paul ameenda mangô. 8Paul amanigôa mane medi mbe: Me tsaba n’oési. Tsikékôé mige miAjuif. Tsienze eba aNzambé. Tsidete pene atsenge andé gô Rome. 9Festus amanyôngéô évamba n’Ajuif t’ebandô ameevôa Paul mbe ?Ewe ônyôngéô énika na gô Jérusalem mbe ébégôe éoo évovo me nandé vangô-a? 10Paul amasiia n’edi mbe: Me nandé éva môtie gô eba amisoso ôtôma pene éagô Rome. Ebégôe éami évovu te éva. Me tsaba n’ebégô n’Ajuif. Omuene ôsabômu. 11Okô mbe nandé n’oési, na ôkô mbe nandé n’ebégô éngeesédu me gôéwa, me tsakina éwa. Ivô ôkô mbe misundamie mitsuéa ahngô me mindé miapataga, me tsangeesédu gô miangô. Nangatsua dôta ébégôe na gôndé pene andé go Rome, buta mbe égôga. 12Vane Festus amadigaa gô kundu gôévanga éna éngeendôni. Na amavovo na Paul mbe: Ewe ônyôngéô étsua ébégôe na gôndé pene gô Rome. Tambô éngaba te nane. Ongakea te na gône.

Paul amanigôa Agrippa na Bérénice ébégôe éedi

13Vamoota dipo pitsi, môtômi môvo môvôni eendô mbe Agrippa na kayedi Bérénice amasikama gô Césarée gôékômbôana na Festus. 14Gômadigaahngô na Festus pitsi diyekani amamônigôa ébégôe éaPaul. Angô mbe: Me éva nandé na mômôgôô amatsikéô me na Félix gô eba atsôgôô. 15Vamabaka me gô Jérusalem, tsesuye yadeekedi adigondoku na peeye yAjuif amamôtsuéa môsunda mbe ayôhu te yôhgu. 16Namanigôa Ajuife ane mbe we asi Rome tôsaba na gésima seeséda môma gô matsuavi matévo, amuene ône atsuaviôni gébé vangô mbe angasiia. 17Vane Ajuif amaviga n’ami n’egô. Me tsidinga gékônzé ébégôe éne. N’ongôngôe ône namadigaa gô eba amisoso. Namabambéa mômôngôe nône mbe avigé. 18Asundi edi amadenganô ivô mane mamamôsundahngô masibéva gatasiki me mbe mangabéva. 19Ene émabaka va gatse aô te mabégô mesôga éaô. Amasaganéda te gôndé mômane eendô mbe Jésus, ône amawani. Ivô Paul eenda mbe Jésus ône andé na monyo. 20Me natsapéô ti v’ekôdéô éatsapéô. Tsamenya étsundéda ône mônongo ebégô. T’ebandô nameenda Paul mbe: Ongakea na gô Jérusalem. Ebégoe éoo éngavovu te gône. 21Ivô Paul amanyôngéô ékedu na gôndé pene éagô Rome. Paul anyôngéô ékeneo gô eba atsôgôô ngu na vangavovu ébégôe éedi na pene gô Rome. Namatôma migodemie te nane. Angakenea Paul gô tsôgôôngu na vangavangô môtôô na gô Rome. 22Agrippa amavovo na Festus mbe: Me nanyôngéô éôkô éne énigôa mômôgôô nône. Festus amaabéa angô mbe: Ii, ôngamôôkô te mene.

23Ovo enyaa ône, Agrippa na Bérénice amaviga n’okumaka wetso na géômbé saô sayanzie. Ameengéa na gô tsongo épôni éndé go eba amôtômine. Atômi amigode na oma avôni agô Césarée amabaka te wangô. Festus amatôma migode mbe: Wanyédéni Paul. 24Vane Festus amanigôa ane amadenganôni mbe: Ewe Agrippa môtômi môvôni, n’anye muetso nôndé éva. Nôeni mômôgôône ôdôô te ône amatsua Ajuif môsunda na gôndé me. Te ône ahmaamugana ahngô mbe ayôhu te yôhgu. Kaka égô gô Césarée gôtévo, te na gô Jérusalem. 25Géé gôndé me, tsookô ébégôe éngeesédu angô gôéyôhu. Ivô amuene ameenda mbe: Nanyôngéô mbe ébégô édué évovu va mbene apene éndé gô Rome. Tambô me nangamôkudéga te na gône. 26Me tsamenya éne éngatendéa me pene éagô Rome gô gésangô. T’ebandô nabuédi angô deo noo va mbene anye na va mbene éwe Agrippa, môtômi môvôni. Mavooe vangamôtsundéda anye nangadiia ébégô gôétenda gô gésangô. 27Me namenya mbe môsi tsôgôô akudégu na gôndé pene te n’ebégôe émeenda angô. Géé gôémôkudéga bobo gébé n’ebégô, ésaba na tsoongo. Tôbuténi ébégôe kabaga nasembu na pene.

Currently Selected:

Mayanzame 25: TSV

Highlight

Copy