Mayanzame 24

Môsundee ômasunda Ajuif Paul

1Vamoota pitsi ditayi, Ananias pene adeekedi adigondoku amatsiga gô Césarée. Amaviga na dipo peeye yAjuif na môsungéyi Ajuif inedi Tertullus. Amasunda Paul na gôndé Félix, môtômi môvôni atsenge. 2Paul amabambéô. Vane Tertullus amamôsunda mbe:

Ewe Félix, môtômi asô môvôni, gô ngudi yoo we asi tsenge nedué tôdigaa na gétabé. G’ôtômue woo agépenganédé, tsengene éasô ékea ti gô mbene na gô mbene. 3Gô metso mane matôdiiani, menya mbe we asi tsengene tôkuméda éwe ti kuméda pitsi yetso na gô tungu yetso. 4Ivô tsanyôngéô égodingéda éva bobo. Tambô singa we tôvovo n’ewe gô vipesu viandéô. 5?Oeni mômôgôône ôdôô-a? Angô te môma agéyoongi. Aseendô gôéyungéda Ajuif muetso gô tsengeye yetso yava tsina. Angô te pene agéômbé sAjuif gééndô mbe Nazaréen. 6Amanyôngéô ébévéda ebasô aNzambé mbe ôsabadô ômagôgéani. Tômamôtsôpa te wangô. [Tômanyôngéô émôeséda gô mige miasô. 7Ivô Lysias, môtômi amigode amawata we angô n’opisa ôvôni. 8Vane Lysias amatôma atsundédi wedi gôéviga na vandé éwe.] Okô ôtsundédi mômôgôône ôdôô ôngookô ômuene mbe mane mavovo we, tôsapata. 9Ajuif muetso amadenganôni amavovo mbe: Ii te nane. Asapata.

Paul amanigôa éne éedi va mbene aFélix

10Félix, môtômi atsenge amadogima na gôndé Paul mbe: Vovoko. Paul amanigôa mbe: Me nagônigôa môtangôe wami gébé na mikebanganô. Tsabômu mbe éwe ômatôma tsenge nedué mipuma miyekani na môtsundue woo ôsapengana. 11G’evigéa me na gô Jérusalem gôéneegeda Nzambé naka nzima apitsi na pitsi dibaé, ôeni anguene ahngôaa asabômu. 12Me tsitsôpu nandé gôésaganédana na môma gô eba aNzambé. Me tsitsôpu nandé gôéyungéda oma gô yeba yewanyéô vo gô pati gétungu gô môsenge. 13Omee adua asoongôa étubéda éwe gémbégéa vo mbangi étubéda mbe: Mane mavovo we te na gô pie. 14Tambô me Paul namema va mbene éwe ébégô édué. Me nayanzéa Nzambé éneegedu na peeye yasô. Me nakea gô nzéane éamanza, te éne éénda omeaa mbe ésanyepa. Ivô metso mane mamatendu gô miganda miaMoïse na mine miapandôédi amatasa maNzambé, me tsamatsuma paga. Namagobeda te gobeda. 15Ene éténdéda me gôndé Nzambé te éne éténdéda omeaa. Wa n’ahngô muetso tôsabômu mbe Nzambé angakundua oma muetso g’ôwa, n’ane abévani, n’ane amisôba. 16T’ebandô nagényôga gôédigaa kuanakue va mbene aNzambé na va gatse oma kabaga vatsundédu me na muanga amôtémami mbe ôeséda me.

17Gô mivo mipuma me tsibaké gô Jérusalem. Navigi pitsi yedi gôétsua géômbé sami dodeye gôéwedéa angô na gôéneegeda Nzambé na ôgondoku. 18Na te éne émabaka me gôéénda vamadenganô me na adua gô eba aNzambé. Namamana éengéa gô ésôga éégôgédu ôtôe. Gôsibé n’ami oma ayekani. Na gôsibé ta na diyunga. 19Menya mbe avo Ajuif amaviga gô Asie amabaka wangô. Mbe gôndéké ébégô, mbe te ahngô aviga gôésunda me va mbene oo. 20Kôndi nane, omeaa angagônigôa éne émeetsô me ôési na kundu épôni éAjuif vamadigaa me gôétsundédu n’ahngô. 21Me tsabômu ébégô évo émavovo me ésinyôngéô angô. Ebégôe te vamavovo me mbe: ?Tambô anye nôtsundéda me te gôténdéda me gékundugéôge sowa-a?

22Félix asibômu mabégô mameekédu gô nzéa éaJésus-Christ. T’ebandô amavéga môtsundue mbe: Tôngamangôa ébégôe édué te amuene môtômine Lysias amahviga. 23Vane amatôma môgode môvo gôékenea Paul gô eba atsôgôô gémôkaté gésengo. Angô mbe: Osinga wee yedi avigaka gôémôena na gôémôwedéa.

Paul amanigôa Félix na Drusille mabégô maJésus

24Vamoota dipo pitsi, Félix amaviga na môgayedi, inedi Drusille. Angô te Môjuif. Amabambéa Paul mbe anigôa ahngô abae mabégô manzéa éaChrist na geetsô môtémee gô yangô. 25Paul amabandôa évovo. Amanigôa ganyôngéô Jésus mbe môma adigaa n’etsimama. Na gôétôma ôtôe woo gôékina mane mabévani. Amavovo dôta n’ebégôe éamôtsundu ôvigani. Vane Félix ameena gomo na amamôénda mbe: Te vanedô. Kiaka. Okedigaa. Gô épo kuka vangeena me ndéô nangagôbambéa. 26Félix amabambéa Paul kuka yetso gôémogo n’edi na gôévamba n’edi. Félix amabaka n’etasa mbe: Okô navambi na Paul mavooe angeetsa me môvanô mbe namôyuua gô pandaye yedi.

27Mipuma mibaé mimoota te Paul andé gô eba atsôgôô. Amatsikô wangô na Félix, ône amanyôngéô étubéda Ajuif gényônga. Vamoota mipuma mibaé. Porcius Festus amaviagana n’enyangee émabaka na Félix.

Currently Selected:

Mayanzame 24: TSV

Highlight

Copy