Mayanzame 18

Paul amabuéa gô Corinthe

1Paul amanôtôga gô Athènes gôékea na gô Corinthe. 2Gô Corinthe amadenga Môjuif inedi Aquilas. Amabôtu gô tsenge ééndô mbe Pont. Gô ndéône émadenganô angô na Paul, te ndéône émavigangô gô Italie na môgayedi inedi Priscille. Amaviga nane gôébégô môtômine agô Rome eendô mbe Claude, amapatsa Ajuif muetso. 3Paul amadenga angô andé éyanzevo n’edi. Eyanzee te gôétuba yeba yamikanda yebandé. Paul amadigaa n’ahngô na amagésangana gô éyanzee muetso abaé. 4Pitsi yetso yedunda Paul amatema gô eba agéwanyéô sAjuif gôéékéda. Amanyôngéô ékoa matasa mAjuif na mAgrec mbe asinga Jésus.

5Silas na Timothée amatsiga, aviga gô Macédoine. Paul amabaka ndéô yetso gôéékéda. Amanigôa Ajuif ômbanza aJésus mbe: Angô te Christ, ône avengéôni. 6Ivô Ajuif amakékôa éne émavovo angô na amamôtoko. Vane Paul amaduméda ébisi éamaduanime medi gôéeveda ahngô mbe: Okô anye nôkea gôédimbana te ébégô éanyene g’ôsôbee wanyô. Me tsaba gô éne. Bandôa deo noo, nakea na gôndé ane asaba Ajuif. 7Paul amanôtôga wangô. Amakea na gô wene eba. Tsesu ebee ône te Titius Justus amaneegeda Nzambé. Ebedi ômabambana na ebovo agéwanyéô sAjuif. 8Tsesune ebee agéwanyéô ône te Crispus. Angô n’asi ebedi muetso ameetsa Kumu mitéma miaô mietso gébé na paga. Gô môsenge aCorinthe oma ayekani ameetsa Jésus mitémamie na amabatésu.

9Epo pitsi Paul ameena ndoti. Kumu Jésus amavovo n’edi mbe: Ombieena gomo. Ikéda geenda éwe kuka yetso. Ombieebama. 10Me nandéké n’ewe. Gôsaba môma angagôtsôpani na gôsaba môma angagôtubéda panda. Omee wami gô môsengee ôdôô ootéa éyeka. 11Paul amadigaa gô Corinthe géma gévo na gébéndéké gôéékéda oma Mane Mamavovo Nzambé.

12Gômabaka môtômine môsi Rome, inedi Gallion. Amatôma gô tsenge ééndô mbe Achaïe. Gô ndéô nene Ajuif amavambana gôétsôpa Paul. Amakea n’edi na gô eba amisoso. 13Ahmamôsunda mbe: mômôgôône ôdôô abuta ékoa oma matasame mbe aneegeda Nzambé gô wene mônongo ôsitsikéô we na peeye yasô.

14Paul amabaka mbe abika, ivô te môtômine Gallion amavovo mbe: Wee yami Ajuif. Okô mbe nôvigi na môsi môkôbé vo na ébégô évôni, me mbe nookiô gavovi anye gôébégô éne te éyanzee éami. 15Ivô éne ésundanye éne, te mavoviame, te miname, na te mige mianyô. Ebégôe éne te éanyene. Me nakina étsundéda mônongoe ebégôe éne. 16Amapatsa ahngô mbe: Kusani gô eba amisoso. 17Vane muetso ane amakusani amatsôpa môtômi ebaô agéwanyéô inedi Sosthène, na amamôbômôa v’ombaa eba amisoso. Gallion asibone ta n’eso.

Paul amanika na gô Antioche

18Paul amamana pitsi diyekani gô Corinthe. Vane amaagana n’ana aTétee n’edi agô mbumu éaNzambé. Priscille na Aquilas amapeka na Paul gô mbôngô gôékea muetso na gô Syrie. Madeo asipeka gô mbôngô épôni v’ehbôngô éaCenchrées, Paul amatsubua môtsée môgôngô gôétubéda mbe: Wa na Nzambé tôvangani ébégô évôni. 19Vamatsigahngô gô Ephèse, Paul amaagana na Aquilas na Priscille gôékea na gô eba agéwanyéô sAjuif. Gône amanigôana n’Ajuif. 20Ajuife amamôsikéga mbe: Ombiakea. Oomba te édigaa n’asô éva. Paul asisingé. 21Amavovo mbe: Okô Nzambé anyôngéyiô nangoomba éviga na gôndé anye. Amanôtôga gô Ephèse amapeka gô mbôngô.

22Gô Césarée, Paul amasutuméa gô mbôngô. Amakea na gô Jérusalem gôékômbôa asi mbumu éaNzambé. Vane amakea na gô Antioche. 23Amamana gône ôkana apitsi na amoomba ékea. Amaseta tsengeye yaGalatie na Phrygie. Amasikama gondé aneengie gôéoodeda ahngô gô mabégô MaNzambé mameetsahngô mitémamie.

Apollos amabaka gô Ephèse na gô Corinthe

24Gômabaka Môjuif, inedi Apollos. Amabôtu gô Alexandrie. Amatsiga gô Ephèse. Amamenya évovo na asibômu Matendeo MaNzambé ta na pesu. 25Ameekédu na mbeego nzéane éaKumu Jésus na amabaka n’ekasôga éaGédidi SaNzambé gô mabégôme mane. Amanigôa na ameekéda mabégô maJésus gépenganédé ta n’ebégô évo. Batemene ésibômu angô te éne émeekéda Jean. 26Amabandôa éékéda na môvinéné gô eba agéwanyéô sAjuif. Vamookô Priscille na Aquilas meekédume medi, amavovo n’edi. Amadigaa n’édi gôéomba énigôa angô mavo mabégô masimenye angô magô nzéa éaJésus. 27Vane Apollos amanyôngéô ékea na gô Achaïe. Ana aTétee asi mbumu éaNzambé amasinga angô gôékea na amatendea asi mbumu éaNzambé gô Achaïe gésangô mbe: Keneani môgenda nône. Apollos amatsiga na amabaka n’eyanza évôni va gatse ane ameetsa Jésus mitéma miaô gô mate maNzambé. 28Apollos amanigôana na Ajuif v’ekanga gôétubéda ahngô diési yaô. Mane mamavovo angô mamabaka na ngudi dipôni na mamadita, gôébégô amatanga metso te gô Matendeo MaNzambé. Amatubéda ahngô mbe Jésus te Christ, ône amasevou na Nzambé na ône amavéngéô na Ajuif.

Currently Selected:

Mayanzame 18: TSV

Highlight

Copy