Mayanzame 19
19
Paul amabaka gô Ephèse
1Gô ndéône émadigaa Apollos gô Corinthe, Paul te andé gôékônda mikôdimie gôébuéa gô Ephèse. Amadenga avo aneengie na ameevôa ahngô mbe: 2Gômeetsanye Jésus mitéma mianyô gémôtsumé paga ?Gédidi SaNzambé gémeengéa na gôndé anye-a? Aneengie amavovo n’edi mbe: We madeo tôsiôkô ta na tsangô mbe gôndéké Gédidi SaNzambé. 3Paul ameevôa ahngô mbe: ?Tambô anye, batemene émeetsô anye éandaa? Amanigôa mbe: Batemene émeetsô we te éne éaJean. 4Paul amasupua ahngô mbe: Jean ameetsa bateme gôndé ane amakoa mitéma miaô gôéba na wene mônongo amonyo. Na amanigôa oma aIsraël mbe: Gôngaviga muene gô ngimami, angô te Jésus. Nômbiamôtsuma paga. Itsani angô mitémamie. 5Vamookô asi Ephèse nane, amanyôngéô ébatésu gô ina aKumu Jésus. Na amabatésu. 6Paul amatsakéga ahngô mogo medi. Gédidi SaNzambé gémeengéa gô mitéma miaô na amabandôa évovo yaanga yôgi disiikédu ahngô. Na ahmapandôéda dôta ndongi dimaviga gôndé Nzambé. 7Otangôe ane amadenganôni te nzima n’oma abaé.
8Paul amakea na gô eba agéwanyéô sAjuif. Pitsi yetso gô ngonde ditatô ameekéda na bôkédé. Ameekéda mabégô mokumu aNzambé buta mbe ane ookôni akoe matasa maô. 9Ivô ayekani amabaka na kéndé na amakina éétsa mitémamie gô mane mookiô ahngô. Amadeta mabégô manzéane éaKumu Jésus va mbene oma muetso. Paul amanôtôga vandé ahngô. Amakea n’avo aneengi na gô dikoda dindé gô Tyrannus. Ameekéda wangô pitsi yetso. 10Emabaka nane gô mipuma mibaé. T’ebandô asi tsenge éAsie muetso, n’Ajuif n’ane asaba Ajuif, amookô Mane Mamavovo Kumu Jésus.
Anamôgôô aScéva
11Nzambé amayanza émbégéa éangudi yedi na Paul, gô mabégô mavôni manyônganéôni masoongôa môma ésupua. 12Oma amabanda ôtô aPaul na mibôtô na mikanda miaô. Vane amakea gôébanda abeeyie na miangô na ahmadôngédu mabeeame maô. Edidi ébévani dôta émakusa gôndé oma. 13Gômabaka avo Ajuif amananga gô tungu na tungu gôékuséda abeeyie édidi éaô ébévani. Amanyôngéô éyanza na ina aJésus gôékuséda édidie. Amavovo n’edidi ébévani mbe: Gô ina aKumu Jésus ône eekéda Paul, nagôtôma mbe: Kusaka. 14Ajuif ameenda nane te anamôgôô tsambué. Tétaô te tsesu yadeekedi adigondoku inedi Scéva. 15Vamavovo ahngô nane, gédidi gébévani gémabika mbe: Me tsabômu Jésus. Tsabômu na Paul. ?Géé anye yandaa? 16Vane mômôgôô amabaka na gédidi gébévani amaagunyéga gôndé amôgôôe ane tsambué. Amabômôa ahngô n’obagaa. Ahngô tsambué amabusuga na gô ebaô amamana ébetu, na ésasô mikandamie. 17Asi Ephèse muetso n’Ajuif n’ane asaba Ajuif amookô ébégôe na amatsôpu na gomo. Ameena ina aKumu Jésus éhdita. 18Va gatse ane ameetsa Jésus mitéma miaô na mbeego ayekani amatsika tsoyine yaô na gomoe waô gôénigôa va mbene amuetso mbe: Me dôta môvo nameetsa Jésus môtéma. 19Na ayanzi ayekani amatsua migandamie miaô gôémibéka va miso moma muetso. Gôétanga ôsunu amiganda mimabékukuni, mavooe mikama na mikama miamitônisa. 20Gô mônongoe ône, Mane Mamavovo Kumu Jésus mamatsanzabana n’enyanga évôni. Na ngudi yedi dimeenanô.
Asi Ephèse amakambôga
21Vamoota ébégôe éne, Paul amavanga gôéôta gô Macédoine na Achaïe gôébuéa na gô Jérusalem. Amavanga gô môtémedi mbe: Va mbenene vane, nangakea na gô Rome. 22Amatôma omedi abaé na gô Macédoine, te Timothée na Eraste. Amuene amoomba ésanéa gô Asie.
23Gô ndéô nene gômatubéga ébégô édagani gôndé ane amakea gô nzéa éaKumu Jésus. 24Gômabaka môguba inedi Démétrius amayanza na muanga gôésaa mbumba yegoni. Gégonige gémasaa angô te samôgetone amaneegeduni eendô mbe Artémis. Gô éyanzee éne, Démétrius n’ayanzi edi amadiia ôkitie ôvôni. 25Démétrius amakôkanganéda ayanzi edi na dôta akaô avo amabaka gô éyanzee éne. Amavovo n’ahngô mbe: Wee yami, asi éyanzevo n’ami. Nôsabômu mbe ôkitie wasô n’anyô ôkusa te gô éne éyanza we édué. 26We tôena na tôôkô mane mavovo mômôgôône eendô mbe Paul. Angô mbe: Mbumba yegoni diyanzô na mogo moma disaba na tsoongo. N’angô andé gôékoa oma ayekani matasame. Kaka gô mbôkane Ephèse étévo, te na gô tsengene nyetso éAsie. 27Tambô gébanage sasô n’anyô gésangadôkuma. Na ésangakôdéa n’ene étévo. Buéyé na ina amôgetone môvôni Artémis, éneegeda we éngadimbana. Na eba ôneegedu angô ôsangadômenyanganô. Artémis te mbumbane éasô n’anyô muetso bandôa gô Ephèse ngu na tsengene nyetso éAsie. Buéyé na tsinane nyetso. ?Tôngasinga inedi n’okumakedi édimbana nane nayee?
28Vamookô agubee mavoviame mane, amakambôga na ahmaadôngana mbe: Ti ône aneegeda we asi Ephèse te Artémis. Gôsaba muene. 29Nzongodiye yaô dimookanô na môsengee wetso. Agubee amatsua ébadie gôégenya na Paul. Amapanga étsôpa akedi abaé, Gaïus na Aristarque, asi Macédoine amakea n’edi mitôô. Géômbé gévôni gémasôkédani gématsua ahngô abaé na gô gétunguge gévôni gôéahtsundéda. 30Vamookô Paul ébégô amanyôngéô ékea amuene gôévovo n’ebitie. Ivô ane ameetsa Jésus mitémamie amamôsikéga. 31Buéyé na avo oma avôni amatôma gô Asie, wee yedi amamôkudéga ôgie mbe: Paul ômbiakea na gô gétungu gékediô akoo. 32Ivô gô gétunguge oma muetso amabaka na môyungéda. Môma na môma amaamugana sagôsagô gémenye éne émakôvanakahngô. 33Avo Ajuif amanigôa Alexandre ébégôe na amamôweseda na gô mbene mbe avovo. Amatomba ôgogo gôédékéda ane amakôvanakani mbe: Kôdani. Amanyôngéô évovo gôésungéa Gaïus na Aristarque, ane amatsôpukuni. 34Vamamenya ébitie mbe ône angavovoni te Môjuif, amootéa éaamugana gôékina angô avovo. Ahmaadôngana muetso ébégô évo, bandôa ndéône étaaga nyee ngu na vatsakama kômbéne. Ahmaadôngana mbe: Ti ône aneegeda we asi Ephèse te Artémis. Gôsaba muene.
35N’egékôdéaka, môtômi amôsenge amatema môtie. Amagogo éahdékéda na vane oma amabandôa étugua yôgiye. Môtômine amavovo mbe: Anye asi Ephèse. Muetso andé gô tsinane asabômu mbe môsengee asô n’anyô te môsenge ôndé eba ôvôni ôngeegedu mbumbane éasô n’anyô ééndô mbe Artémis. Gégoni sedi gémaaga g’ôba géndéké gô môsenge asô n’anyô, Ephèse. 36Gôsaba môma oongôa étônani. T’ebandô nanôongô mbe, bakani na suii. Sumédani mitémamie. Nômbiapupa anye gépangé étasa éne éngeendanye, kabaga nôénda éne ésaba na tsoongo. 37Nôtsuayi amôgôô abaé n’eva gôéahtsundéda. Ahsinôéndé ébégô. Asidete Artémis na ahsibandé eba ôneegedu angô. 38Okô mbe Démétrius n’aguba n’edi anyôngéô ésunda môma te buedi. Ivô gôndéké na pitsiye ditsundédu môma. Na gôndé dôta évovie étsundédani. Môsunda eendôé nane. 39Okô mbe nôgébaka na môsunda gôésunda, tsuani angô. Tôngookô angô gô eba amisoso ôdigaa we évovie. 40Géé gô éne ééndi anye deo noo, nôsanéyiki ti vipesu gôétsuaô na gôndé ane atômani gô Rome. ?One oongôa énigôa ébadie étsuayi anye indaa? Gôsaba môma.
41Vamamana mĂ´tĂ´mine Ă©semba ahngĂ´ nane, amapatsa ahngĂ´ mbe: Nikani na gĂ´ yeba yanyĂ´.
Currently Selected:
Mayanzame 19: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
