Mayanzame 17

Paul na Silas amabuéa gô Thessalonique

1Paul na Silas amoota Amphipolis na Apollonie, te ootaga. Na ahmabuéa gô Thessalonique. Gône gôndéké eba agéwanyéô sAjuif. 2Gameenda Paul kuka yetso, amakea na gô ebee ône agéwanyéô. Pitsi yedunda ditatô amanigôana n’akedi amadenganôni mane magô Matendeo MaNzambé. 3Amapandôéda akedi na vede mbe, Matendeo MaNzambé matônigôa mbe Christ, ône amasevou na Nzambé angeena maguga na angakunduu g’ôwa gôéba na monyo. Na amoomba mbe: Jésus ône anônigôa me, te angô Christ amasevou na Nzambé. 4Avo va gatse aô amookô na amasinga mbe Jésus te Christ. Amavamba na Paul na Silas. Na dôta Agrec ayekani amaneegeda Nzambé na mbeego, n’avo ageto avôni amamenyanganôni, amasinga te mônongovo na amavamba muetso na Paul na Silas.

5Ajuif ahmeena Paul na Silas ngusu. Amavanéa oma abobo, tôpôpéate na ameenda ahngô mbe: Nangakani na mbôkane. Yungédani yangô. Kôvani akanyô nôba ayekani. Tôpôpéate tône tômakea na gô eba aJason gôébuta Paul na Silas mbe ahtsôpa na ahkea n’ahngô na gôndé atômie atsenge gôétsundédu. 6Ivô ahsiene Paul na Silas. Vane ahmatsôpa amuene Jason kumu eba, n’avo oma ameetsa Jésus mitéma. Na amatsua ahngô na gôndé atômi amôsenge. Amasunda ahngô mbe: Omee adua te ane ahmayungéda tsengeye yetso. Te gavigi ahngô n’eva. 7Jason amakenea ahngô gô ebedi. Ahngô muetso akékôa mitôma miamôtômine môvôni gô Rome. Eenda mbe: We tôndé na môtômi asô inedi Jésus. 8Mavovia mane mamaduméda mitéma mioma muetso asi môsengee na mine miane amatômani. 9Jason n’akedi muetso amatsika atômie ésuka na amanika na gô yeba yaô.

Paul na Silas amabuéa gô Bérée

10Vameeda nyee, asi mbumu éaNzambé amawedéa Paul na Silas gôénôtôga gô môsengee gô tsina evitsi mbe akea na gô Bérée. Vamabuéa ahngô gô Bérée amakea na gô eba agéwanyéô sAjuif. 11Mitéma miasi Bérée misibaké gandé mine miasi Thessalonique. Asi Bérée amanyôngéô éôkô Mane Mamavovo Nzambé, ti nyôngéô. Pitsi yetso amavasa Matendeo MaNzambé gôéwanyeda meekédume maPaul na mane mamatendu na mbeego, ôkô mbe mandé te kuanakue. 12Ayekani va gatse aô ameetsa Jésus mitéma miaô. Na Agrec te mônongovo. Ageto ayekani avôni ekitie, n’amôgôô ayekani ameetsa Jésus mitémamie gébé na’ paga. 13Ivô Ajuif agô Thessalonique amookô tsangône mbe Paul andé gôéékéda Mane Mamavovo Nzambé, eekéda go Bérée gameekédangô gô Thessalonique. Ajuife ane amaanda angô na gô Bérée gôéyungéda oma mitémamie. 14Vane asi mbumu éaNzambé amayavôga ékeda Paul na gô gésa samubu. Silas na Timothée asikéé, ahmasanéa te gô Bérée. 15Ane amakea na Paul ahmamôvegeda na gô Athènes. Anguene amanika na gô Bérée n’ogi ômakudéga Paul mbe: Anye Silas na Timothée, yavôgani éviga. Nôvidenga me te égô.

Paul amabuéa gô Athènes

16Paul ameenéa Silas na Timothée mbe ahtsiga na gô Athènes. Môtémedi ômeena ti panda gô mbumba diyekani dimadengangô dineegedu gô môsengee ône. 17Gô eba agéwanyéô sAjuif amanigôana n’Ajuif na ane asaba Ajuif amaneegeda Nzambé. Pitsi yetso amanigôana va gétungu seba ekasa n’ane amadenganô wangô. 18Avo eekédi agô géômbé sEpicurien na géômbé sAstoïcien amavovo na Paul. Avo ameenda Paul mbe: ?One eetama ga ngubu gésikamé avovo vita ndé? Avo dôta ameenda mbe: We tôôkiô mbe gôndé nyene Nzambé évigi n’edi. Amavovo nane gôébégô Paul ameekéda mabégô maJésus na gamakunduganô g’ôwa. 19Amakea na Paul na gô gétunge saô gémeendô mbe Aréopage gômadigaa peeye yambôka gôékônza mabégô maô. Ameevôa Paul mbe: Nigôani we mane mamanza meekédewe ?makegea nayee? 20Ewe ôvovo mabégô masiôkanô na mbeego. Tônyôngéô émenya gakegea mangô. 21Gésima sasi môsengee ône, na kumu yambôka n’agenda, gésima saô gémabaka te nane. Amadigaa miôsaa mietso gôénigôana na gôéôkô te mane mamanza na mamanza.

22Paul amatema môtie va gétungu sAréopage na amavovo mbe: Wee yami, asi Athènes. Me neena mbe anye nôndé na pingô yesôga gô minongo mietso mineegedanye. 23Buéyé n’atsatsee vaseti me môsengee wanyô gôébono mane mamapakanye na mogo manyô maneegedanye, neeni gévumbéô sogondoku. Gô sangô gômatendu mbe: Ene édeekedu éva éétsô na gôndé Nzambé ésamenyanganôni. Tambô éndé te nane. Nzambéne éneengedanye gémômenye, me navigi gôénômenyeda éangô. 24Nzambé te ône amakana tsina n’oba na éetso éndé wangô. Angô te kuma atsina n’oba. Asadigaa gô yeba dimasaa oma gôémôneegeda. 25Nzambé asabuta sôma mbe môma angamôétsa sangô gôémôneegeda. Te amuene eetsa môma éôma éetso. Modi ôvéguma wa n’anyô na monyo ôndé na wa n’anyô tôétsô te n’edi. 26Nzambé amapanga évanga môma môvo, na vane amadugéda oma muetso ava tsina. Oma madeo asibôtu Nzambé amatanga pitsiye yaô na amatatôa mikabômie mingadigaahngô. 27Ameenda nane te mbe môma angabuta émenya angô. Na vangapapatana ahngô gôébuta nzéane ébuéda môma na gôndé Kumu Nzambé mavooe angamômenya. Na gô pie Nzambé asaba gôdagôda na wa n’anyô, môma na môma. 28Ematendu mbe:

Gô ngudi yedi tôvéguma na gô ngudi yedi tôpupa.

Na gô ngudi yedi tôndéké deo noo.

Te éne émanigôa atendie wanyô mbe:

Na tôndéké anedi.

29Tambô ôkô mbe tôndéké anedi, tôsoongôa égoneda Nzambé na mbumba yegoni émakônzu na dodo na muanga osunu ôvôni, na mataé. Na éangô émakônzu na mogo moma gô éne émavakangô na matasa medi. 30Nzambé asabonodô ndéône émabaka môma g’ôdungé, angô gébeendu. Deo noo Nzambé abambéa oma muetso asi tsengeye yetso mbe: Koani mitéma mianyô gôéba wene mônongo. 31Endé te nane. Amamana ésevoa nyee ôngatsundéda angô ome muetso na môtsundu agépenganédé. Tôngatsundédu na ône amasevoa amuene gôéba môtsundédi. Ndémbone éamôtsundédine te éne émakunduu angô na Nzambé g’ôwa.

32Vamookô omee ane Paul ateta ébégô éagékundugéô sowa, avo amamôdeta. Avo dôta ameenda mbe: Ongoomba énigôa we ébégôe éne nyene kuka. 33Vane te vamanôtôga Paul vandé ahngô. 34Avo va gatse aô asitsumédô paga na ameetsa Nzambé mitémamie. Amavamba na Paul. Môvo te Denys, pene agô géômbé sane atômani gô gétungu gééndô mbe Aréopage. Môvo dôta môgetone, inedi Damaris, n’avo.

Currently Selected:

Mayanzame 17: TSV

Highlight

Copy