Mayanzame 16

Paul na Silas amakea na Timothée

1Paul amabuéa gô Derbe na gô Lystre. Gône gômabaka môma môvo, ameetsa Jésus môtémee wetso, inedi Timothée. Yeedi te Môjuif ameetsa Jésus môtémee. Tétedi te Môgrec. 2Asi mbumu éaNzambé gô Lystre na gô Iconium amaba na kumane éaTimothée. 3Paul amanyôngéô éba n’edi évambevo na gôékea n’edi. Tambô Ajuif ayekani amadenganô gô tsenge nene. Na Paul ameenda Timothée mbe: Buedi mbe ôgeetu gôésuméda mitéma miAjuif. Ahngô muetso asabômu mbe tétoo te Môgrec. 4Gô misenge mietso mimabakahngô amanigôa ane ameetsa Jésus mitéma miaô mane mamatenda peeye yagô Jérusalem na ane amatômukuni, gô gésangô. Amatôma ahngô mbe: Gobedani mabégôme mane. 5Mbumu yetso yaNzambé gô tungu yetso dimasipa gô mane manzéa éaJésus émeetsangô mitémamie gôékea gô mbene na gô mbene. Otangôe omee waô ômakôndama pitsi yetso.

Paul ameena ndoti gô Troas

6Gédidi SaNzambé gémadékéda Paul n’akedi mbe: Nômbiakea na gô tsenge éAsie gôéékéda Mane Mamavovo Nzambé. Vane amaseta tsengeye yaPhrygie na Galatie. 7Vamaweseahngô na gô Mysie amanyôngéô ékea na gô Bithynie, ivô Gédidi SaJésus gésisingé ahngô gôékea. 8Ahmakitsangana tsenge éaMysie gôébuéa v’ehbôngô éambéne éndé gô Troas. 9Paul ameena ndoti na pitsi. Ameena mômôgôô môsi Macédoine môtie. Amamôbambéa mbe: Viga na gô Macédoine égô. Viga ôviwedéa we. 10N’ongôngô ône tômabuta nzéa gôébuéa gô Macédoine. Tômamenya na gô pie mbe Kumu Nzambé abambéyi we gôétsua Tsangô Eedi Eamôsôba na gôndé asi tsenge nene.

Lydie ameetsa Jésus môtémedi

11Gô Troas tômapeka gô mbôngône émabuéda we na gô néngéne ééndô mbe Samothrace. Ovo enyee ône tômabuéa gô Néapolis. 12Vane tômakea na gô Philippes, môsenge ôtôma tsengene nyetso éaMacédoine. Te môsenge ôdigaa Aromain ayekani. Tômamana gône ôkana apitsi. 13Gô nyee edunda tômatsika mbôkane tômakea na va kôbangô ambéyi. Na tômatsutsua gétunguge gémookô we mbe Ajuif avovo na Nzambé te gône. Tômadenga agetoe amamana ékôkangana wangô. Tômadigaa gôévovo n’ahngô. 14Va gatse aô tômadenga môgeto môvo inedi Lydie. Angô te môsi mbôka ééndô mbe Thyatire. Na angô te môyôkô amikanda miatsoo miosunu ôvôni. Amaneegedaka Kumu Nzambé. Amookô mane mamavovo we eekédie. Gédidi SaNzambé gémamôkukua môtémee gôévotanganô mane mamavovo Paul. 15Môgeto nône ameetsô bateme, angô na asi ebedi muetso. Vane amabambéa we mbe: Okô anye nômenyi na gô pie mbe me neetsi Kumu Jésus môtémami wetso, tambô vigani nôvidigaa gô ebami. Asinyôngéô mbe we tôkina.

Paul na Silas amabaka gô eba atsôgôô gô Philippes

16Nyovo vamakea we na gô gétungu sadisambô, môgeto amadenganô n’asô gô nzéa. Môgeto nône amabaka môyanzine avo oma. Gédidi gébévani gémabaka n’edi gémamôtubéda mabégô mangabuéani. Atômie wedi amadiia ôkitie ôvôni gômasokéaka môgeto nône oma mane masimenyanganôni mamatubédu angô. 17Amaanda wa na Paul va ngima. Amaadôngana mbe: Amôgôô adua te ayanzie aNzambé Amôbô na Môbô, Kumu angudi yetso. Anôékéda mabégô magô nzéane ébuéda môma na gô géobogeo. 18Môgeto nône ameenda nane ti pitsi diyekani. Na Paul amabévéô. Nyovo amagéngôga na amavovo na Gédidi gébévani mbe: Gô ina aJésus-Christ, nagôtôma mbe kusa gôndé môgeto nône. Tsina na tsina gédidige géne gémakusa na gémanôtôga gôndé môgeto nône. 19Vameena atômie amôgeto nône éne émabuéani, asinyôngéô. Asibômu mbe tôsangadôdiia ôkiti gô éyanzee yedi. Ahmatsôpa Paul na Silas na amatsua ahngô na gôndé atômi atsenge gô tungu éekasa émabaka oma ayekani. 20Amanigôa Aromain, akitsi amisoso mbe: Amôgôô adua ayungéda we mbôkane. Na ahngô te Ajuif. 21Ahndé gôéékéda mônongo ôsanyepani gôndé we Aromain. Mitôma mindéké na we misasinga mbe tôdigaa gadigaa Ajuife adua. 22Pingô yoma amadenganôni mitéma miaô mimanikéa ékoga na ahsinyôngéô éne émeenda Paul na Silas. Akitsi amisoso amasaséda ahngô abaé mikandamie. Amabitéda ahngô mibitômie. 23Vamamanahngô éahbitéda pingô yamibitô ameengéda ahngô gô eba atsôgôô. Amavovo na môgode mbe: Okenea ahngô ti v’ekôdéô éakenea. 24Vamookô môgode, môkenene atsôgôô nane, ameengéda Paul na Silas gô tsongo ékeke éava ngenge ebee. Amakuya ahngô makôdôme gô ébéngé.

25Va gatse apitsine, Paul na Silas ahmavovo na Nzambé na ahmatôa mimbô gôémôkuméda. Ana amabaka gô dipo tsongo gô eba atsôgôô amookô. 26Vamabahngô gôékuméda Nzambé, tsinane ématatéa pepe na émapupéda mikakamie na pogogoye yeba atsôgôô. Dikukéyé yetso dimapadéga na dimaba na vôô. Pangaye dimakatô asi gô tsôgôô dimapadéga. 27Môkeneyi amatimôga. Amakuadima. Vameenangô dikukéye na vôô amayuua ébagee gô kôtô mbe aayôha amuene. Amamenya mbe asi gô tsôgôô muetso amani ébusuga. 28Ivô Paul amamôena na amamôdékéda n’ogi agô ngongo mbe: Ombiatuma ômuene. We muetso tôanguaa. 29Môkenene amaduka akedi dambi. Amayavôga eengéa gô tsongo ékeke éava ngenge eba. Amatatéa na gomo. Amamesegea va makôdô maPaul na Silas. 30Amakuséda ahngô gô tsongone émabakahngô. Ameevôa ahngô mbe: Amôgôô n’ami ?Gôédiia géobogeo neenda nayee? 31Ahmamôaabéa mbe: Itsa môtémoo wetso na gôndé Kumu Jésus gémôtsumé paga, na vane ôngoobou éwe na asi eboo muetso. 32Vane Paul na Silas amanigôa môgode n’asi ebedi muetso mabégô maKumu Jésus. 33Na pitsi nene, môgode ône, angô môkeneyi eba atsôgôô amoovôa Paul na Silas pôtaye. Ahmeetsô bateme, angô n’asi ebedi muetso. 34Amakeda Paul na Silas na gô ebedi na ameetsa ahngô môyakô. Môgode ône, na asi ebedi muetso ahmatsôkéa na gényônga gévôni gômeetsahngô Nzambé mitémamie gébé na paga.

35Vamaagiia nyee, Aromain akitsi amisoso amakudégéa ôgi na gôndé môgodene mbe: Kuséda amôgôôe ane. 36Môgode amakea gôénigôa Paul mbe: Ane atômani amakudéga ôgi mbe: Kusédani amôgôôe ane. Tambô anye, kusakani na kiakani na gétabé. 37Ivô Paul amakékôa ôgie ône mbe: Ovénga yewe. Atômie ane amabitéda we va miso moma muetso, we gétsundédu pengo n’evovie. We kaka oma abobo. We tôndé asi Rome gandé anye. Ameengéda we gô eba atsôgôô bobo gébé n’ebégô. ?Deo noo anyôngéô ékuséda we v’esooe-ma? Esangaba nane. Avigéké anguene gôékuséda we. 38Tsangône émanika na gôndé Aromain, akitsi amisoso. Na amakuadima na gomo vamookô ahngô mbe: Paul na Silas te asi Rome gandé we. 39Aromain anguene amakea na gô eba atsôgôô gôévooto Paul na Silas mbe: Kokooni yanye. Ahmakuséda ahngô gô tsôgôô na ameenda ahngô mbe: Nôtôgani gô mbôkasô. 40Vamakusa Paul na Silas gô tsôgôô amakea na gô eba aLydie. Amavovo n’asi mbumu éaNzambé gôéoodeda ahngô mitémamie na ahmakea.

Currently Selected:

Mayanzame 16: TSV

Highlight

Copy