Mayanzame 15

Kundu émadigaa peeye yambumu éaNzambé gô Jérusalem

1Avo amôgôô amaviga gô Judée na gô Antioche. Ameekéda asi mbumu éaNzambé mbe: Anye amôgôô n’asô nôsangoongôa éengéa gô géobogeo, anye gégeetu gô gésôgage gématsikéô we na Moïse. 2Gô ébégôe éne Paul na Barnabas ahsinyôngéô gamavovo ahngô. Te gamasaganédana ahngô. Muetso amavangana mbe: Anye Paul na Barnabas n’avo dôta asi Antioche, kiakani na gô Jérusalem. Nôkevovo ébégôe éne na peeye yambumu éaNzambé na dôta n’ane amatômukuni.

3Asi mbumu éaNzambé amatôma ahngô môtôôe ône. Amakea akitsangana tsengeye yaPhénicie na Samarie. Gô nzéa ahmanigôa akaô tsangône gakoa ane asaba Ajuif matasa maô gôéétsa Nzambé mitémamie. Tsangô nene émakasôgéda ana a Tétee n’aô muetso agô mbumu éaNzambé. 4Vamatsigahngô gô Jérusalem, asi mbumu éaNzambé na peeye yaô n’ane amatômukuni amakômbôana n’ahngô na gényônga. Ane amatômu gô Antioche ahmanigôa akaô metso mane mamayanza Nzambé n’ahngô. 5Va gatse aô gômabaka Apharisien ameetsa Jésus mitémamie. Amatimôga gôévovo mbe: Gôndé ane ameetsa Jésus mitémamie, ane asaba Ajuif, buedi mbe agobeda migemie n’esôgee éetso ématsikéô wa n’anyô na Moïse. Buedi dôta mbe ageetu, te geetugu.

6Peeye yambumu éaNzambé n’ane amatômukuni amadigaa vavo gôékônza ébégôe éne. 7Vamagogo ahngô étsumana pagaye, Pierre amatema. Angô mbe: Ana aTétee n’ami asi mubmu éaNzambé, nôsabômu mbe g’esevoeo me na Nzambé va gatse anyô vadingi. Amasevoa me gôénigôa Tsangô Eamôsôba éaJésus‐Christ gôndé ane asibôtu go éongo éAjuif. Nzambé amanyôngéô mbe n’ahngô muetso ookô na ahmôétsa mitémamie miaô. 8Nzambé te ône asabômu mitéma mioma. Ameetsa gémbégéa gétubéda mbe: Me nasinga adua, asabéyee Ajuif gamasinga me anye nôndé Ajuif. Gémbégéage te Gédidi sedi gémeengéa gôndé ahngô. 9Nzambé asatatôa Ajuif n’ane asaba Ajuif. Amagôgéda mitéma miaô gômeetsahngô Jésus miangô gébé na paga. 10?Anye nayee nônyôngéô étsimaméda éne émamana Nzambé ényepeda? Nôénda nane te gôkata anye omee ane égumba éditani ésiôngôé étsua peeye yasô n’anyô, na ésoongôa béyé na wa n’anyôene étsua. 11Wa n’anyô tôsabômu mbe tômoobou te gô ngeba dimatôenanô na Kumu Jésus. Na Jésus ameena akasô ngeba te mônongovo.

12Vane muetso ane amakôvukuni amadigaa na suii gôéôkô Barnabas na Paul gamanigôa ahngô mbe: Va gatse ane asaba Ajuif, Nzambé amatubéda émbégéa éyekani éangudi yedi na amayanza mabégô manyônganéôni masoongôa môma ésupua, Te mangô éma. Na amanigôa. 13Vamamanahngô énigôa, Jacques amabika mbe: Ana aTétee n’ami asi mbumu éaNzambé ôôkôni édué. 14Simon Pierre atônigôi mbe bandôa v’ebandô Nzambé amakenea ane asaba Ajuif gôésevoa omedi va gatse aô. 15Kaka Simon amuene amavovo nane. Buéyé n’apandôédi amatasa maNzambé amanigôa te mônongovo, mbe:

16Kumu Nzambé amavovo mbe:

Va mbenene vane, nanganika éviga

Nangoomba ésaa eba aDavid, ône ômapanzégani.

Nangadingôa ébéndékée éeba gôénikéa étemeda

angô.

17Gômbe avo oma angabuta Kumu Jésus gôéwesea na gôndé angô.

Te asi tsengeye yetso

Na muetso ane amasevoa me gô tsengeye yetso yava tsina gôéba omami.

18Oôkôni éne émavovo Kumu Nzambé ône asabômu mabégô mema bandôa va mbeego.

19Vane Jacques amoomba ésupua mbe: Me natasa mbe gôndé wa n’anyô tôsangoongôa étubéda ane asaba Ajuif panda vakogahngô na gôndé Nzambé. 20Tôtendeni ahngô gésangô mbe: Nômbiaa môyakô ôsigôgéni ômadeekedu gôndé mbumba. Nômbiakea gô minongo mietso miagésasô. Nômbiaa nzina yanyama. Nômbiaa nyama ésivôvé nzinaye. 21Bangôani mbe mige na mitôma mimatsikéô wa n’anyô na Moïse mimeekédu gô mbôkaye yetso na gô yeba yewanyéô yetso. Bandôa na peeye yasô yambeego, mimatangô minyaa mietso miedunda.

Gésangô gématendu gôndé asi mbumu éaNzambé asaba Ajuif

22Vane peeye yambumu éaNzambé na ane amatômukuni n’asi mbumu éaNzambé muetso amavangana mbe: Tôsevoeni oma abaé akea na Paul na Barnabas na gô Antioche. Ahmasevoa Silas na Jude, ône amoogu mbe Barsabbas. Amôgôô abaé ane amabaka n’enyanga gôétôma ana aTétee n’aô asi mbumu éaNzambé. 23Ameetsô gésangô mbe: Keani na sangô. Gématendu mbe:

We tônôkômbôani te peeye yambumu éaNzambé na we tômasevouni na tômatômukuni tôndé ana aTétee n’anyô. Te we tôtendea anye nôsibôtu gô éongo éAjuif nôdigaa gô Antioche na Syrie na Cilicie. 24Tômookô mbe avo oma amatimôga éva gôébuéa na gôndé anye. Gô mavovia maô amayungéda anye na ameetsanye mikebanganô. Menyani mbe kaka we tômatôma ahngô na gôndé anye. 25Géé n’atatsee tôndé muetso étasevo gôénôtôméa oma abaé. Nôngeena ahngô aviga na Paul na Barnabas wee yasô n’anyô. 26Nôsabômu gavétsu ahngô n’owa gôéyanzéa Kumu Jésus‐Christ. 27Tônôtôméa Jude na Silas. Ahnganônigôéa anguene mane matendea we anye éva. 28Tôvangi gôénôtendea ébégô édué. Na vane Gédidi SaNzambé géwanyédi na we moonga gô éangô. Ebégôe te mbe tôsoongôa énôkatéa égumba éditani éapingô yamige. Tônôbangôéda te mivo mivôni mimatsikéô we va mbeego mbe nôkenea te mine. 29Nômbiaa môyakô ômadeekedu na gôndé mbumba. Nômbiaa nzina yanyama. Nômbiaa nyama ésivôvé nzina. Nômbiakea gô minongo mietso miagésasô. Kumbani mabégô mema buta mbe nôkea gô mbene na gô mbene. We tônôéva. We tôkôdéyi te na vane.

30Paul na Barnabas n’omee abaé amatômukuni amakea na gô Antioche. Amakôkanganéda ane ameetsa Jésus mitémamie, na ameetsa ahngô gésangôge. 31Gésangôge gématangô. Sangô gémakasôgéda mitéma miaô na amatsôkéa. 32Jude na Silas anguene te apandôédi amatasa maNzambé. Amasupuéa ana aTétee n’aô asi mbumu éaNzambé mabégô mayekani gôékasôgéda ahngô na gôésipéda ahngô gô nzéa éaNzambé. 33Amamana ôkana apitsi n’akaô gô Antioche. Vane amaagana na ana aTétee n’aô gôénika na gôndé ane amatômakahngô. Asi Antioche ameenda ahngô mbe: Kiakani na gétabé saNzambé. 34[Ivô Silas amanyôngéô éomba édigaa n’ahngô.]

35Paul na Barnabas amasanéa gô Antioche. Ahngô na akaô ayekani ahmanigôa na ahmeekéda mabégô maKumu Jésus.

Paul na Barnabas amaagana

36Vamoota pesu andéô Paul amavovo na Barnabas mbe: Oka, tôkéseta ana aTétee asi mbumu éaNzambé andé gô misengemie mietso mimapanga wa n’oo éékéda mabégô maKumu Jésus. Tôkéena gadigaahngô. 37Barnabas amanyôngéô ékea na Jean, ône amoogu mbe Marc. 38Ivô Paul asinyôngéô ékea na Jean‐Marc. Gôébégô gô môtôô amapanga vamakeahngô muetso, Jean‐Marc amaagana n’ahngô gô gatse anzéa gô Pamphylie gémané n’ahngô môtôôe na gékôdédé éyanzee. 39Paul na Barnabas amasangédana na amaagana. Barnabas amabongo Marc na amapeka gô mbôngô gôékea na gô Chypre. 40Paul dôta amasevoa Silas gôékea n’edi. Ana aTétee n’aô amadeekeda ahngô na gôndé Kumu Nzambé gôésipédu n’edi. 41Ahmakitsangana tsengeye yaSyrie na Cilicie gôéseta asi mbumu éaNzambé na gôéoodeda ahngô gô Mane Mamavovo Nzambé.

Currently Selected:

Mayanzame 15: TSV

Highlight

Copy