Mayanzame 13

Barnabas na Saul ahmasevou gôétsua tsangône

1Va gatse asi mbumu éaNzambé gô Antioche gômabaka apandôédi amatasa maNzambé na eékédie. Ahngô te Barnabas, na Siméon (eendô mbe ône anzue) na Lucius (amaviga gô Cyrène). Na avo dôta te Manaën, (ône amabôngôu gô eba aHérode môtômi atsenge) na Saul. 2Nyovo vamabakahngô amakina môyakô gôévovo na Nzambé na gôéneegeda angô, Gédidi SaNzambé gémavovo n’ahngô mbe: Tatôani gô inami Barnabas na Saul akusa va gatse anyô akea gôéyanza éne émasevoa me ahngô. 3Vane, amôgôôe ane muetso amoomba édigaa gô gékinéô samôyakô gôévovo na Nzambé. Amatsakéga Barnabas na Saul mogome na ahmasingéa ahngô ahkea.

Barnabas na Saul amakea na gô Chypre

4Gédidi SaNzambé gématôma Barnabas na Saul, na ahngô ahmakea na gô Séleucie. Gône ahmapeka gô mbôngô épôni gôébuéa na gô néngé ééndô mbe Chypre. 5Vamatsigahngô gô Salamine ameengéa gô yeba yewanyéô yAjuif na amabandôa éékéda Mane Mamavovo Nzambé. One amakea gôéwedéa ahngô te Jean-Marc.

6Ahmananga na néngéne nyetso ngu na môsenge aPaphos. Gône amadenga nganga éénda mavétô, inedi Bar-Jésus. Angô Môjuif ameenda mbe: Me te môpandôédi amatasa maNzambé. 7Ngangane émakeneoko na môtômine anéngé, inedi Sergius Paulus. Môtômine ône amabaka môma agéneenga gévôni na éodo. N’angô amanyôngéô éôkô Mane Mamavovo Nzambé. Te gamabambéangô Barnabas na Saul gôéviga na gôndé angô. 8Ivô ngangane éamavétô, inedi g’ôgi aGrec te Elymas, amavinga Barnabas na Saul. Na asinyôngéô mbe môtômi atsenge eetsa môtémedi gô meekédume maô. 9Gédidi SaNzambé gémeengéa pepe gôndé Saul, ône amoogu dôta mbe Paul. Amabono Elymas na nzôô. 10Amavovo n’edi mbe: Mômôgôô noo, môtémoo ômayôa na mangônzô na mane mabévani metso. Ewe te muana ayabédé. Ti éwe, te môvingi amane mamisôba. Nzéa éaKumu Jésus éndé na deedéké. ?Ewe nayee ôbénôa yangô na ôminyamba mamongo? Tambô ?ôsanzeegeda ébévee éoo éne-a? 11Ewe ôôkô ébégô édué. Kumu Nzambé agôééméda pogu. Osangadôena gévede sakômbéne ngu na ndéône énganyôngéô amuene Nzambé. Tsina na tsina miso mElymas mameeméga na pogu. Evitsie émapikaméa angô. Amapapatana na gésa na gésa gôébuta môma gôékea émôtévéda. 12Vameena môtômi anéngéne éne ébuéyini, ameetsa Nzambé môtémedi wetso. Asiôngôédô étsuma paga meekédu manigôa mane maKumu Jésus, gôébégô ameena mbe éndéké ti ébégô évoni.

Paul na Barnabas amakea na gô Antiochene éndé gô Pisidie

13Gô mbôka aPaphos, Paul n’akedi amapeka gô mbôngône épôni gôékea na gô Perge gô tsenge éaPamphylie. Jean-Marc amaagana n’ahngô na amanika na gô Jérusalem. 14Barnabas na Paul amanôtôga gô Perge gôékea na gô Antiochene éndé gô Pisidie. Nyee edunda aAjuif, ameengéa na gô ebaô agéwanyéô na amadigaa. 15Ndongi yaNzambé na dôta mabégô mapandôédi amatasa maNzambé mamatangô. Vane, atômi eba agéwanyéô amatôma môma mbe: Kiaka ôkebeenda agendee ane mbe: Anee a Téta, ôkô mbe nôndé n’ebégô gôévovo gôékasôgéda anee aTétee n’anyô, vovokoni. 16Paul amatema. Amadogima mbe: Tôsingi. Na amavovo mbe:

Anye amôgôô, ana aIsraël, n’anye muetso nôneegeda Nzambé na gomo. Oôkôni édué. 17Nzambé Amôbô na Môbô te ône aneegeda omasô n’anyô. Te angô amaneegedu dôta na ana aIsraël muetso. Amasevoa peeye yasô n’anyô. Amabôngôa ahngô gô ndéô émadigaahngô gô tsenge éôgenda gô Egypte. Amatubéda ngudi yedi dipôni gôékuséda ahngô gô Egypte. 18Gô nzima dinayi yamipuma dimakeneangô omee ane gô tsenge émagasani amabibéda mônongoe waô. 19Gô tsenge éaCanaan, Nzambé amabunganéda ditômu tsambué n’omee waô, gôéétsa omedi ana aIsraël tsenge nene gôédigaa. 20Amadigaa wangô ôkana amikama minayi na nzima ditayi yamipuma.

Va mbenene vane amasinga peeye yasô gôétômu n’evovi n’aô ngu na ndéône éaSamuel, môpandôédi amatasa maNzambé. 21Vane amaduka Nzambé mbe: Baka we môtômine wasô. Nzambé ameetsa ahngô Saül muana aKis, môsi ébôta éaBenjamin. Amatôma tsengene nzima yamipuma dinayi. 22Va mbenene vane, Nzambé amakina Saül na ameetsa omee ane David mbe ahngatômu n’edi. Gôébégô éaDavid, Nzambé amavovo mbe: Me neena mbe David ôdôô muana aIsï, andé muanami amôtéma. Angeenda mane manyôngéô me mbe meendô. 23Muana aDavid môvo amabôta Jésus, ône amasevou na Nzambé mbe angô te Mooboyi oma aIsraël gamavangana Nzambé na peeye yasô n’anyô. 24Jésus madeo asiviga, Jean ameekéda oma aIsraël mbe: Koani mitéma mianyô mbe nôngaba wene mônongo. Diiani bateme. 25Vamabaka monyo aJean ôka gôékôdéa amavovo mbe: Anye gôndé me ?Nôtasa nayee? Me kaka ône andé anye gôéenéa. Oôkôni édué. Gô ngimami gôviga muene ootéa me. Angô te môtsé. Gétôkôtôkô ôgoeyee, géôté môtsé. #13:25 G’ôgi aGrec Jean amagunya tsava éapondu.Me te gétôkôtôkô. Ivô tsaba pengo gétôkôtôkô. Nandé te gô tsina asangô.

26Amôgôô, ana aTétee n’ami ana aAbraham, n’anye muetso nôneegeda Nzambé na gomo. Mabégôme mane magéobogeo mamakudégu gôndé wa n’anyô. 27Te asi Jérusalem na peeye yaô ahsibangôé mbe Jésus ôdôô te ône amasevou na Nzambé. Asiôkô mabégô mamatenda apandôédi amatasa maNzambé. Tambô mabégôme mane te mangô matangôni gô pitsi yetso yedunda. Na mabégôme mamadugédu vameeséda ahngô Jésus mbe: Ayôhu te yôhgu. 28Buéyé vasibé Jésus n’oési gôéyôhu, omee ane amatôma Pilate gôémôyôhéda. 29Na vamadugédahngô metso mamatendu gôndé Jésus na mbeego, ahmamôpotoo gô gésumuge. Amamôgunya gô ngii. 30Ivô Nzambé amamôkundua g’ôwa. 31Gô pitsi diyekani Jésus amatsutsuga kuka yetso gôndé ane amanôtôga n’edi gô Galilée gôékea na gô Jérusalem. Deo noo ahngô andé mbangi yedi gôétusa tsangô éedi na gôndé akaô oma aIsraël. 32Na wéene tônôtsuéa tsangô nene éamôsôba éne émameméô peeye yasô n’anyô na Nzambé. 33Nzambé amakundua Jésus g’ôwa gamatendu gô Embô éamôbaé mbe:

Ewe te Muanami.

Deo noo naka tétoo.

34Nzambé amakundua Jésus g’ôwa n’otô edi ôsibooé. Nzambé ameevéda oma nane vamavovo angô mbe:

Me nangagôétsa mate mamatsimamani na mavômani

Te mane mamameméa Me David.

35T’ebandô amanigôa gô éene émbô mbe:

Osangasinga mbe ôtô amômane woo

amatsimamani ôboo.

36Gô ndéône yedi, David amayanza gésaô gémanyôngéô Nzambé. Na amawa. Amagunya va kôbangô atétee yedi. N’otô edi ômaboo. 37Tambô ôtôe ône ômakunduu na Nzambé g’ôwa ôsibooé. 38-39Amôgôô, ana a Tétee n’ami, vootanganôni édué. Te gô ngudi yaJésus ône amakunduu na Nzambé g’ôwa mbe môma asingéô kokoo gô ébévee éedi. We tônonigôa te nane. Te gô ngudi yedi mbe muetso ane amôétsa mitémamie gébé na paga akusédu g’ôvéga ôtsôpu angô na mabégô maô mabévani. Mige na mitôma mimatsikéô wa n’anyô na Moïse misibé na ngudi gôétôkuséda g’ôvégee ône. 40Tambô wemani kabaga éne émeevéda apandôédi amatasa maNzambé ébuéa gôndé anye. Ameevéda mbe:

41Aanakani anye oma adeti.

Sôbasôbanani éne éyanza me.

Bunganakani ganyôngéô anye.

Ti éne éngayanza me gô ndéône yanyô, buéyé mbe môma anônigôéké éangô nôngaétsuma te paga.

42Paul na Barnabas amakusa gô eba agéwanyéô sAjuif. Amabambéô mbe: G’ôvo nyee edunda, nôomba éviga gôéékéda we ébégôe éne. 43Vamakusa oma gô eba agéwanyéô, Ajuif ayekani n’avo ane ameengédu gô gésôga sAjuif, amaanda Paul na Barnabas. Ahngô abaé amavovo n’omee ane mbe: Sipani gô mabégô mema. Itsani mitéma mianyô mietso gô mane mookô anye metondo éaNzambé.

44G’ôvo nyee edunda, kumu yambôka muetso amakôkangana gôéôkô Mane Mamavovo Kumu Nzambé. Gôsisané ta na môma gô yeba yaô. 45Vameena Ajuif pingô yoma ahviga gôéôkô gameekéda Paul na Barnabas, asinyôngéô. Gô ngusune yaô amakékôa na amabuta éemôa meekédume na ahmayungéda géwanyéôge na matoki. 46Paul na Barnabas amavovo gébé na gomo mbe: Nzambé amanyôngéô mbe anye Ajuif nôpanga éékédu Mane Mamavovo amuene. Ivô anye nôkékôa mangô. N’anye nôeeséda anyene veendanye mbe: We tôsabuta monyo amôbô na môbô. Tambô, menyani mbe we tônôtôgi gôndé anye. Tôkea na gôndé ane asaba Ajuif. 47Oôkôni éne ématômu we na Kumu Nzambé. Angô mbe:

Nagôsevoyi gôéba gévede gétana gô tsengeye yetso.

Gômbe ôngatsua Tsangô éagéobogeo na gôndé oma adigaa gô tunguye yagôdagôda madeo gôsikéô na mbeego.

48Vamookô ane asaba Ajuif ookô ôgie ône amatsôkéa na amakuméda Kumu na Mane Mamavovo angô. Muetso ane amasevou na Nzambé gôédiia monyo ôsakôdéakani amakoa matasa maô gôétsa Nzambé mitémamie.

49Mane Mamavovo Nzambé mamatsanzabana gô tsenge nene nyetso. 50Gômabaka avo ageto avôni ahmamenyanganôni, na dôta avo oma okumaka ane amatôma môsengee, ameetsa Nzambé mitéma miaô. Tambô Ajuif amakea na gôndé ahngô gôéahyungéda mbe akoa matasa maô na akina Mane Mamavovo Nzambé. N’ahngô amamakina na ahmakoga aka adudeo aPaul na Barnabas gôékuana ahngô. Amapatsa angô gô môsengee aô. 51Eékédie abaé ane amaduméda ébisi éamakôdôme maô gôétubéda kumu yambôka mbe: Nôwema. Vane ahmakea na gô Iconium. 52Aneengie aJésus gô Antioche amabaka mitéma miaô mimayôa na Gédidi SaNzambé na ahmatsôkéa na gényônga gévôni.

Currently Selected:

Mayanzame 13: TSV

Highlight

Copy