Yitenda ya Wapostoli 25
25
Paghulusi kuna kumwitha kwafumu shokuru
1Munyima dhomayuwa mahatu pakukuma muthiko thi, ko kutunda Festusi muSesareya gha yende kuJerusalema. 2Hapristeri hohakuru nawakamiti waWajuda, ha yendire kukwendi ha tongore yinyeghenya yawo yokwaPaghulusi. Ko kumukanderera kwawo thikuma 3eshi gha wa neghedhe yoyiwa pa kashimba Paghulusi kuJerusalema. Eyi ha yi kumbererire kemo ne, yoyishi ha karire mundhira dhokuyenda kukondameno eshi ha ka mu paghe. 4Festusi gha huthire shemwa eshi: “Paghulusi ne muSesareya hana kumukungera, name na kara nodighano dyokuhuka ko popano pawangu. 5Hatutughuru wenu wa ya fumanena, ha kona kuyenda pofotji nange no ha ka mu hete ngeshi kothidi thi gha tenda thothiyi.”
6Gha karire mo diyuwa, ngambi kwoko nomahatu, thikuma ne mayuwa dikumu. Ndani ghana kuhuka kuSesareya. Mudiyuwa dyomunyima dhokakuma kwendi, ko kahungumana kwendi mudipuna dyondhango no gha raghurire eshi, ha ka rete Paghulusi kughutho wendi. 7Apa ghengenine Paghulusi, ko kumudhinga Hajuda wa ha tundire kuJerusalema. No ha mu runderire yinu yoyingi thikuma yoyikukutu, eyi ha dhirire kukona kudimuka hathinda. 8Paghulusi ne pakukughamwena thinda eshi: “Ame ne mbadi na shinya kumuragho waWajuda, ngambi kutembeli endi kwafumu shokuru.”
9Ene Festusi gha himine kuneghedha Hajuda thothiwa no gha ningire kwaPaghulusi eshi: “Ghuna haka eshi na ku ka kupangwere n̂ando dhino kuJerusalema ndi?”
10Ko kuhutha Paghulusi eshi: “Ame mundhango nemana, kughutho ghodipuna dyoghufumu. Mu ni pangwere momuno. KwaWajuda mbadi na tenda ko ghuyi me. Wa yi dimuka ghothinda thiwana. 11Ngeshi ngo nomurandu me, ho na tenda thinu thokunipaghitha, na tawa eshi ni fe vene. Ene ngeshi ngo mbadimo muyinu yi ha ni rundera, ngo mbadiko munu yu gha kona kunitapa mufuma dhawo kukwawo. Ame ne kuna kutaterera kwafumu shokuru.”
12Apa gha manine Festusi kughamba n̂ando dhi nawangambera wendi, ha hutha kwendi eshi: “Owe ne kwafumu shokuru ghuna kutaterera, wa kona kuyenda koko kwafumu shokuru.”
Paghulusi kughutho waAgripa naBerinise
13Munyima dhomayuwa, heya fumu Agripa naBerinise kuSesareya, ha ka mu shamberere Festusi. 14Ko ka kara ko kwawo mayuwa ghomapu. Festusi, gha thimwetwedherire fumu n̂ando dhaPaghulusi eshi: “Po ghadi pano ghumweya, oyu gha thighire Felikisi mudorongo. 15Pamakumeno ghange ghomuJerusalema, ha ni reterire hapristeri hohakuru nawamayami yinyeghenya yawo yokukwendi, no ha nipurire eshi ni wane murandu mumwendi. 16Ame na wa huthire eshi, mbadi wa kara muhingo kwaWaroma eshi kutapa mukamurandu mufuma. Gha kone tango kuwana nako mwene dho kukughamwena kwawaheti wendi, ko yi hana mu rundera. 17Apa hana kumine kuno, mbadi na karire mithi, nodiyuwa dyokuranda ko ha ni yendi ni ka hungumane padipuna dyondhango, no kuraghura eshi ha mu rete kughutho wange. 18Hakakumuheta ha mu dhingire no kumurundera. Ene kadi pathinu thothikuru thika di na yi tatererire. 19Yoyiheya ya tambire vene kuyikukanana yokwawanyambi wawo, no yokwaJesusi yu gha fire, noyu ghana tongoranga Paghulusi eshi muyumi. 20Yoyishi mbadi na dimukire eshi ngepi di ghokupongodhora n̂ando dhi. Ko kwipura kwange Paghulusi eshi ngwa ghana haka kuyenda kuJerusalema, ha ka mu pangwere ko yinu yi. 21Ene Paghulusi, gha tatererire kwafumu shokuru. Gha hakire kukara mudorongo vene no kumupanguru fumu shokuru.”
22Agripa gha ningire kwaFestusi eshi: “Na himi thikuma, ngo ni muyuve nothinda murume yu.”
“Peghundha ndani wa kona kumuyuva,” dyo gha huthire Festusi.
23Mudiyuwa dyokuranda ko, haAgripa naBerinise hengenine mundhugho dhomapangwero oku hana kuyengi thiwana, mu kukuvureka nawakuru wawakayita nawarume hodikuto, wa ha tunga mo mumbara dhi. Pamarawero ghaFestusi ko kwingeneka kwawo Paghulusi. 24Ko kuninga Festusi eshi: “Fumu Agripa namwe mwahe mudi muno. Mu mone, yomurume yu hana hetire kukwange Hajuda homuJerusalema nawano muno. Ha kughererire eshi mbadi gha kona kupara rure. 25Ame ne mbadi na wanine shemwa ethi gha tenda thokumupaghera. Karo yoyishi thinda gha kwedherire kwafumu shokuru, yo na himenine name kumutumba ko. 26Ene mbadi na dimukire eshi nye sho ni mu tjangere fumu shokuru. Yo na mu retera kughutho ghoye, thikuma ne kughutho ghoye we fumu Agripa. Eshi ni kone kutjanga thinu munyima dhokumwipudhura. 27Mu kuyimona me ne yira mbadipo thinu, mu kutuma mukan̂otwa oku mbadi hana thothonona thiwana eyi ghana harura.”
Currently Selected:
Yitenda ya Wapostoli 25: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
