Yitenda ya Wapostoli 24

N̂ando dhokwaPaghulusi

1Munyima dhomayuwa kwoko, ko kwiya mupristeri shokuru Ananiyasi nawamayami namukamuragho ghumweya, Teritulusi. Ko kuyenda kwawo kwamuraghuri, ha ka hete yinyeghenya yawo yokwaPaghulusi. 2Pakumwitha Paghulusi ghengene, ko kutanga Teritulusi noyiheta kwaFelikisi eshi: “Mukadikuto, mumoye mo twa para ghuturumutha nothiraro. No pamaghano ghoye, po gha kara marongathaneno mwene mudiko dino. 3Eyi roruhe kuyivurukanga, no twa kara nomatumero ghomakuru.

4“Mbadi na kushana kukutwamitha nyara‐nyara vene. Ene na kukukumbera eshi ghu tu tegherere thiwana nomutjima mwene, kukagogi ketu kokafupi ko n̂ando dhetu.

5“Atwe kuna kumumona murume yu ne muyi, mu kupara pofotji nendi. Aye yo ghana kureta makuyakunukero ghoyighayara mwene yaWajuda mu kaye kokahe? Aye karo yomukamiti ghomapemukero ghaWakanasareti? 6Apa gha yerekire kushwahura tembeli, gho twa mu kwatire. No twa hakire kumupagha pathinamuragho wetu. 7Ene Lisiyasi, ghomukuru wawakayita, yo ghana mu tu kungurire, 8ho gha mu tumine kukoye. Mumwendi thinda pakumwipudhura yoyiheya yi, mo sho dimukere eshi nye tuna mu hetera.”

9Payinu yino, Hajuda wahe ha kutawedhire no ha tanarithire eshi, kemo ya kara.

Paghulusi ghana kukughamwena kughutho waFelikisi

10Pathidimukitho thamuraghuri, ko kutanga kughamba Paghulusi eshi: “Na dimuka eshi, myaka dhodhingi wa kara mupanguri wawanu wano. Yodigho na kara noghutjima, pakukughamwena n̂ando dhange kughutho ghoye.

11“Ghu yi dimuke ghothinda eshi, kadi mayuwa dikumi nomawadi ghana piti po, apa neyire kuJerusalema na ni raperere. 12Ene noyofotji temba yu gha ni wanine mutembeli, ngambi mumasinagoge ngambi kupi endi mumambara, oku na kukukanana naghumweya, ngambi kuyudhaghura mbunga. 13Noyinu yi hana kunirundera ne, mbadi ha kona kuyikuneghedha nane wo.

14“Eyi na kukudimukitha me ne yino: Ame ne na karera Nyambi wawakerekandongo wange pathinandhira dhi ha toya eshi mapemukero. No shime ha ni tawa yoyiheya yi ha tjanga mumuragho noyawaporofeta. 15Gho na paka makurupero ghange paNyambi. No thika wo, na kutaterera me eshi, hanu wahe hahunga nawayi, mbana vumbuka mwawafu. 16Yodigho na kuyitenda name mu kuwatwayeritha roruhe yihima yoyiwa kughutho waNyambi nawamu.

17“Munyima dhomyaka dhodhingi na ka hukire, na ni ghamwene hapange noyitapa mwene no kuyamba kwaNyambi. 18Oku shime na karera mu kuyamba, ko ka ni wana kwawo mutembeli. Ame ku na mana yitenda yoghukushuki, mbunga adho mbadipo nomuthineneko wange temba. 19Pa karire vene Hajuda hohapu homuthiko thaAsiya. Awo ne ngo wo hana kono kukuma kughutho ghoye ha ni hete, ngeshi kothidi thinu kukwawo nange thokunikwatera. 20Ngambi wa thighe wa hanu ha ghambe hathinda, ngwa kothidi thinu thi na shinyine, apa nemanine kughutho ghondhango ha ni pangure. 21Eyi na wa tongwerire me ne yino: ‘Dyarero nemana kughutho wenu mundhango, yoyishi na tawa kumuvumbukero wawafu.’ ”

22Popo, Felikisi yu gha dimukire thiwana yoyiheya yokuhata kuNdhira, ko kuyandhera theko. Ho gha ningire eshi: “Apa mbo gheya Lisiyasi mukuru wawakayita, po mbo na ni pangura n̂ando dhenu.”

23Ko kurawera kwendi mukamiti wawamaporitha eshi, gha kare Paghulusi shime kukwendi. Ene kadi wa kumukunga nonyinya no kuthigha hapendi ha mu rekure.

Kuna kumukunga Paghulusi

24Munyima dhomayuwa ghomapu, Felikisi namunu wendi Drusila ghoMujuda hetha kwawo Paghulusi, na ha yuve kukwendi shime yokumatawero ghomwaKristusi. 25Paghulusi ghaghambire nawo yokughuhungami no yokukukutekera ghothinda no yondhango dhokughutho. Eyi ne ya mu yapithire Felikisi no gha ningire eshi: “Keho yina rikanya! Huke vene, ngeshi na kuwane ruvedhe, ngo mbo na kwitha karo.”

26Ko kukurupera kwendi nako dhodhihe eshi, ngwa n̂anyi gha mu kumbere Paghulusi manyinga ghoghuhende ghokumushuturitha. Yo gha ka mwitherangire rwingi na gha ghambaghure nendi.

27Munyima dhomyaka dhiwadi, ko kumuranda Felikisi Porlighusi Festusi mudyango dyendi. Ene yoyishi Felikisi gha himine kuneghedha Hajuda eshi, ngepi di wa kara ghundambo, yo gha mu thigherire shime Paghulusi mudorongo.

Currently Selected:

Yitenda ya Wapostoli 24: MHW1986

Highlight

Copy