Yitenda ya Wapostoli 23
23
Paghulusi kughutho gondhango dhaWajuda
1Paghulusi ko kuwakengurura hakandhango waWajuda ghuninga eshi: “Mwayendhange, na dimuka shemwa shemwa eshi, ngepi di na karera Nyambi mumoyo wange ghoghuhe, kate pashadyarero.”
2Ene mupristeri shokuru Ananiyasi gha raghurire kwawahemanine nendi eshi, ha mu pumure kukanwa. 3Ko kukutha Paghulusi kukwendi eshi: “N̂anyi mbo gha kupumure Nyambi, thimbadi thoye thishakenu tho! Ghuna hungumana pano kukunipangura pathinamuragho. Ene mu kurimbeka muragho, ho ghuna raghura eshi ha ni pumure.”
4Hanu wa hemanine pepi naPaghulusi, ha mu tongwerire eshi: “Owe ne kukona kushamuna mupristeri shokuru waNyambi?”
5Ko kuhutha ye eshi: “Mwandenge, mbadi na mu dimuka eshi ye ne mupristeri shokuru. Yoyishi yapwa kutjanga eshi: ‘Mbadi wa kona kushamuna mukamiti ghodiko dyoye.’ ”
6Paghulusi gha yi dimukire eshi hakandhango, dihenda dimwe dyaWasadusayi nodihenda dimweya dya tunda mwaWafarasayi. Ko kwitha kwendi mundhango eshi: “Mwayendhange, ame ne noMufarasayi, gho na tunda mudiko dyaWafarasayi. Eyi yina ni reta kuno kundhango, yoyi yokutaterera eshi mbana vumbuka hafu, keho.”
7Eyi gha manine kuyighamba, ko kwimana n̂anani pakatji kaWafarasayi naWasadusayi nondhango ko kukutaghura. 8Yoyishi Hasadusayi ha hamura eshi, mbadiko muvumbukero nawaengeli temba no mbadiko mipepo. Ene Hafarasayi ha tawa yoyiheya yi. 9Pa karire man̂anani ghomakuru thikuma. Hakamarukwaro hamweya hombongo daWafarasayi, ha yangumukire ha kukutithe n̂anani thikuma no ha ningire eshi: “Yatwe ghokukanga eshi thinu namurume yu. Ngwa mupepo ngambi muengeli yo ghana ghamba nendi.”
10N̂anani dha kurire thikuma, kate gha yapire mukuru wawakayita eshi, ngwa ko kumuhanyawera wo Paghulusi. Yodigho gha tumine hamashurundate wendi ha ka mu shwaghithe mukatji kawo no ha mu huthe kukamba.
11Mughuthiku ghu, ghemanine Fumu kwaPaghulusi gha mu tongwere eshi: “Tjimape! Muno muJerusalema, ghuna ni tongonona. Kemo dyo sho katende karo mo muRoma.”
Yikuyodhingana yokwaPaghulusi
12Mudyiyuwa dyokuranda ko, ko kukuyuva Hajuda yokwaPaghulusi no kukutuyekedha. Awo ha kwedherire eshi, mbadi ha kona kudya no kunwa temba, oku mbadi hana mu pagha Paghulusi. 13Pa karire hanu kupiterera makumi mane awa ha tendire medhero gha. 14Ko kuyenda kwawo kwawapristeri hohakuru no kwawamayami no ha ka ningire eshi: “Atwe ne tuna tendi medhero ghomakuru eshi, mbadiko thi sho tu pake kumiromo dhetu, oku mbadi tuna pagha Paghulusi. 15Amwe keho, mu kuyuve nawakandhango mu tume diywi kwamukuru wawakayita eshi gha kone kumutumena karo Paghulusi kughutho wenu. Amwe ne mu ka yi mu roghithere eshi, tango na tu mwipudhure thiwana n̂ando dhendi. Atwe ne tuna mu tokomena eshi tu mu paghe oku ye mundhira dhokukuma kuno.”
16Ene mwepa Paghulusi gha yuvire kuyikuyonga yawo, no gha yendire kukamba gha ka yi mu tongwere Paghulusi. 17Hetha Paghulusi mukamiti wawamaporitha ghumweya no kumutongwera eshi: “Shimbe mungaghu no na kukanderera, mu tware kwamukuru wawakayita. Yoyishi nombudhi dhokukwendi ghadi nadho.”
18Ko kumushimba kwendi kwamukuru wawakayita ghuninga eshi: “Mukan̂otwa Paghulusi, yo ghana nitha no kunikumbera eshi, ni rete mungaghu no kukoye. Ghana kara nothinu thoku tongwera.”
19Mukuru wawakayita ha mu kwata panyara no kumupindurukitha gha mwipure eshi: “Yinye yi guna haka kunithimwetwedhera?”
20Aye ha hutha eshi: “Hajuda hana kuyuvu pofotji ha kukumbere Paghulusi, wa kumutume peghundha karo kundhango, ngambi kemo eshi ha pongodhore n̂ando dhendi thiwana. 21Owe ne mbadi wa kona kuwatawa. Yoyishi kupiterera makumi mane awa hana mu kuyodhingana. Hana mana kwedha eshi mbadi ha kona kudya no kunwa temba, oku mbadi hana mu pagha. Keho hana mana kukuroghitha, no kuna kutaterera yikumbe ra yawo yi kare po.”
22Mukuru wawakayita ha mu tongwera eshi: “Perere‐poye ghu yi tongore kwaghumweya eshi, yowe ghuna yi ni thimwetwedhera.”
Ko kumuthigha gha ka yende.
Kuna kumutuma Paghulusi kwaFelikisi
23Mukuru wawakayita, ko kwitha hakamiti wawamaporitha hawadi no kuwarawera eshi: “Mu rogha‐roghithe mashurundate matheremawadi. Makumi kwoko nomawadi, harudhina mbi, mathere mawadi hakamaghonga. Ha yende muviri dhoghukwoko noghune parunguro kuSesareya. 24Mu yi tende thiwana pa kare yidhina, gha kukone Paghulusi ka kuma kwaFelikisi ghomuraghuri mudiri‐duri.”
25Ko kutjanga kwendi mbapira noyighamba yino:
26“Klaghudighusi Lisiyasi,
Kwamukadi kuto muraghuri Felikisi:
Dirumeritho.
27Hajuda ha kwatire murume no, no ha manithire eshi ha mu paghe, munyima ko kwingena mo kwetu nawashurundate wange tu mu ghamwene. Yoyi ha ni dimukithire eshi ye ne mukakakoghatji kaWaroma. 28Karo yoyishi na shanine kudimuka eyi hana kumurundera, ho na mu twarire kundhango dhawo. 29Mu kuyimona, ha mu heterire kun̂anani dhomuragho wawo. Ene mbadiko thi gha tendire thokumupaghera ngambi thokumupaka mutorongo. 30Munyima ko kuyiniyuvitha eshi, hana mu kuyongo ha mu ndere, gho na mu tumu wangu kukoye. Kwawaheti wendi na ningi eshi ha tware yinyeghenyawo kukoye.”
31Hamashurundate ha tendire yi ha wa rawerire no ha twarire Paghulusi ghuthiku ghoghuhe, kate muAntipatirisi. 32Mudiyuwa dyokuranda ko, ko ka mu thigha kwawo Paghulusi nawakakudhina ha ka yende shime nendi, hakapamuve ne ko kathighuka kukamba dhawo. 33Hayidhini ha ka kumine muSesareya, gho ha tapire mbapira kwamuraghuri no kumukundeka Paghulusi. 34Naye gha toyire mbapira no kwipura Paghulusi eshi mu thiko munye gha tunda. Apa gha yuvire eshi kuSilisiye gha tunda, 35ko kuninga kwendi eshi: “Mbo na kupangura apa mbo heya haheti ghoye.”
Kutunda po ko kuraghura kwendi eshi, ha mu kungere mumarombe ghaHerodesi.
Currently Selected:
Yitenda ya Wapostoli 23: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
