Yitenda ya Wapostoli 20
20
Paghulusi ghana kuyenda kuMasedoniya no kuditunga dyaWahirika
1Apa dya pwire didhongi di, hetha Paghulusi hatawi wahe pofotji no kuwatjokedha. Munyima ha wa rumeritha, no gha yendire kuMasedoniya. 2Muruyendo rwendi apa gha tjinaghanine yiko yiya, gha tjokedhire hatawi roruhe noyiyaghura yendi.
Ko kakuma kwendi muditunga dyaWahirika. 3Omu gha ka karire tughonda tuhatu. Pakufunguruka gha yende kuSiriye, ha yuvu kwendi mamukanyeno ghendi ghokwaWajuda. Popo ko kuthighuka kwendi gha huke dhaMasedoniya.
4Soparte ghomwana Pirusi ghomuBeregha, ha yendi nendi pofotji. Karo naArisitagusi naSekundusi. Mughuwadi wawo Hakatesalonika. NaGayusi mukaDerbe, na Timoteghusi karo kemo naTigikusi naTrofimusi, mughuwadi wawo ne hakamukunda waAsiya. 5Awo ha pitire kughutho no ka tu taterera muToroghasi. 6Munyima dhodifeste dyomaghuroto ghothuthun̂unyi, ha tu thekura kwetu muFilipi, eyi pa na kupita mayuwa kwoko, ko kakuma kwetu kukwawo muToroghasi. Mo twa ka karire mayuwa kwoko nomawadi.
Paghulusi muToroghasi
7Mushundaha, gho twa kukongwedhire pofotji kumakuyarekero ghoghundambo. Paghulusi ko kukuvureka nawatatwi, ngambi kenge gha ningire eshi mudiyuwa dyokuranda ko ne gha yende, gha kuvurekire nawo kate pakatji koghuthiku. 8Mungonda dhokuwiru dhi twa kukongwedherire, mwa karire maramba ghomengi.
9Mungaghu ghodina dyoEghutigusi, pamun̂inya ghothitarero gha hungumanine. Paghulusi ne ngepi di gha dhighamine kughamba. Eghutigusi naye gha kothire thikuma. Munyima ko kuporokera kwendi muturo. Ha shaghumuka kwendi kutunda kungonda dhoghuhatu kuwirui, kate kuwera pamuve. Eyi hana kumudhamuna aye ne ghana fu.
10Paghulusi ha shuruka pamuve, no gha kundhondherire Eghutigusi mumoko ghendi, ho gha ningire eshi: “Mwa tokota. Muyumi!”
11Ha dhini karo Paghulusi kungonda dhokuwiru, ko kuyondora ghuroto gha dye. Ene shime gha ka kuvurekire nawo rure, kate kuva diyuwa munyima gho gha yendire. 12Mungaghu ha mu twarire hanu kudighumbo aye kumuyumi, no ha yarire nomatjimapero.
Matundero ghokuToroghasi gha yende kuMilete
13Atwe twa kwindukire kuyenda kughutho nothikepa kuAssusi. Ko twa ghayarire eshi ko sho tu ka muperekere Paghulusi. Kemo dyo gha raghurire thinda, yoyishi gha himine kuyenda ko nomapadhi. 14Apa gha tu wanine muAssusi, gho twa mu perekire tu yende kuMitilene. 15Kutunda po mudiyuwa dyokuranda ko, ha tu ka vugha shime kate twa ka kumine ghuhunga naGighosi. Dyokuranda ko, ha tu kokera kuSamosi, munyima dhodiyuwa di dya randire ko, ndani muMilete.
16Paghulusi gha himine eshi tu keruke Efesusi. Yoyishi gha karire kapipi, mukuninga eshi ngeshi kukona, ngo gha kukare mudiyuwa dyoPendekoste muJerusalema.
Paghulusi ghana kuragha hakungi homuEfesusi
17Kutunda kuMilete ha tumu mbudhi Paghulusi kuEfesusi eshi, ha kethe hakungi hombunga dhawakriste. 18Apa ha kumine kukwendi gha wa tongwerire eshi: “Muna yi dimuka sha, eshi, kutunderera mudiyuwa dyokutanga apa na kumine mumukunda waAsiya ne, po na tanga kukara nenu. 19Ngepi ne keho di na karerire Fumu mu kukufupipitha no muyitokota, pamurandu ghomakuthakuthero agha na wanine pamakanyeno ghaWajuda. 20Mwa yi dimuka eshi mbadi na mudhindire eyi ha mu fundhawera, apa na ghambangire nenu muthitunumeho no pa na mu hongire mumayugho ghenu. 21Ame na kon̂omekire thikuma kutongwera Hajuda naWahirika eshi, ha piruke kwaNyambi no kutawa mwaHekudyetu Jesusi.
22“Pan̂anyi‐n̂anyi, ku Jerusalema na kuyenda pamatumangedhero ghaMupepo. Eyi mbo yi ka ni hokokera ko, kadi ya kudimuka me. 23Na dimuka eshi Mupepo ghoKupongoka, gha ni tongwera ghushemwa eshi mu kehe mbara, ya ni taterera n̂otwa norupetho. 24Ene ngambi kenge wa kara moyo wange eshi thinu thothikuru, mbadi na kuyikudhekera ngeshi ku na rikanyitha ghuhura ghomoyowange, no kumanitha thirughana ethi na wanine kwaFumu Jesusi: Eyi ne kuyuvitha n̂eke dhombudhi dhodhiwa dhaNyambi.
25“Ame na yendaghurire mukatji kenu mwahe, no na mu yuvithire ghufumu waNyambi. Apa no na dimuka eshi, mbadi mbo mu ni mona karo. 26Yo na kuyimumanitherera pashadyarero eshi, kadi murandu wange ngeshi kuyongara kehe yu ghopapenu. 27Yoyi mbadiko thi na mu dhindire, thodighano dyaNyambi dyoruvigha rwendi roruhe. 28Mu kukoneke mwathinda, nomutanga oghu gha paka Mupepo ghoKupongoka mumaghamweno ghenu. Thika di ha koneka hakungi mutanga, kemo sho mu koneke namwe mbunga dhaNyambi edhi gha wanine kukwendi pamanyinga ghaMwanendi thinda. 29Na dimuka eshi munyima dhokuyenda me, mbo gha neya mambungu ghokuruka mukatji kenu. Awo ne mbadi mbo ha thigha mutanga. 30Shemwa, nomukatji kenu mbo mu nemana harume awa mba ghamba man̂ando ghombango eshi, ha kone kupemukitha hatawi kukwawo. 31Yodigho mu koneke ne. No mu vuruke eshi kehe yu ghopapenu, myaka dhihatu na mu tumangedha ghuthiku nomutenya nomahodhi. 32Ene na kumutjimapitha kwaNyambi no kun̂eke dhon̂ando dhendi. Aye gha kara nongcamu dhokumununeka no kumuyeranitha mumakandadhekero agha gha turekerire hatawi yira yiyora.
33“Ame ne mbadi na rumbera manyinga ghaghumweya noyitere temba. 34Mwa yidimuka mwathinda eshi, ethi na kughamwenithire nothinda nawa na karire nawo ne, thothi na rughanine nonyara dhange dhishawadi. 35Pathitamendhi thange thothihe, na mu neghedhire eshi tu rughane thikuma, tu kone kughamwena hahepwe. Mu vuruke man̂ando ghaFumu Jesusi. Thinda gha ningire eshi: ‘Mukutapa ghana kutenda munu fiyaghudhi, kupiterera mukutambura.’ ”
36Apa gha manithire Paghulusi kughamba yi, ko kutongamena nawo no ha raperire. 37Waheya ha dirire thikuma no ha mundhondherire ha mu cumite. 38Ene ha tokotire thikuma, yoyi gha ninge eshi, mbadi mbo ha mu mona karo.
Munyima ha yendire pofotji nendi kuthikepa.
Currently Selected:
Yitenda ya Wapostoli 20: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
