Yitenda ya Wapostoli 21

Paghulusi kuna, kuyenda kuJerusalema

1Eyi tuna kukuyakunuka nawo nothinga, ko kughurumuka kwetu kudiya. Ha tu tjinaghana kwetu ghuhunga no twa kumine kuthirudhi thaKosi. Mudiyuwa dyokuranda ko, gho twa kumine kuRodosi, kutunda po kuParata. 2Oku ya ko twa ka wanine thikepa ethi thina kushana kuyenda kuFenisiye, ho twa ghurumukire kudiya tu ka perame tu yende. 3Sipurusi twa mu monine, ho twa mu kandwerire kuGhucuma tu yende kuSiriye. Ndani muTirusi omu ha ka rongwererire murongerero ghothikepa ko ka kanduka mo kwetu. 4Gho twa ka dhingurire hatawi no twa ka karire nawo mayuwa kwoko nomawadi. Pakuwapathurura Mupepo, ko kuninga kwawo kwaPaghulusi eshi, mbadi gha kona kuyenda kuJerusalema. 5Ene apa gha pwire mayuwa kwoko nomawadi, gho twa rundururire shime ruyendo. Ko kututhindekedha waheya nawanu wawo nawana wo, kate kununda dhombara. Ha tu tongamena kurukenga tu rapere. 6Ndani tuna kukuyakunuka. Munyima ha tu perama kwetu, awo ne ko kupiruka ha huke kudighumbo.

7Kutunda muTirusi, twa rundururire shime ruyendo rwetu romudikuruviya tu yende kuPotolemaghisi. Ho twa rumerithire hatawi no twa karire nawo diyuwa dyofotji. 8Eyi dina kuva ko, ko ka kuma kwetu muSesareya. Ko kuyenda kwetu tu ka dhingure muevangelista Filipusi, yofotji ghopawakwoko, nohawadi no twa turire kukwendi. 9Aye gha karire nawanendi hane hohakamadighana hohadhike, awa ha karire nothitapa thoyipumba.

10Oku shime twa karera mo mayuwa ghomengi kamanana, heya muporofeta ghodina dyoAgabusi ghokuJudeya. 11Heya kukwetu no gha tumburire mukata waPaghulusi, ha ghu kughanga kumoko ghendi no kumapadhi ghendi ghuninga eshi: “Dyo ghana kuninga Mupepo ghoKupongoka eshi: ‘Hajuda dyo mbo ha ka mu ghanga muJerusalema thinda shamukata ghuno, no kumutapa kwawahayidena.’ ”

12Apa twa yi yuvire, ha tu mu kanderera Paghulusi nawanu homudyango di eshi, gha yenda kuJerusalema. 13Ko kuhutha Paghulusi eshi: “Yinye muna kurembwera mutjima wange nomahodhi ghenu? Ene pamurandu ghoDina dyaFumu Jesusi, na kwinduka muJerusalema eshi, kadi kunikwata keho, ene karo ni fe.”

14Eyi twa dhirire kumukona muyihongaghura yetu, ko kudheghetera kwetu ghuninga eshi: “Mu thighe mahimeno ghaFumu ha gha tende.”

15Munyima dhomayuwa ghomapu, ho twa rongerire tu yende kuJerusalema. 16Hamweya hopawatawi ha yendire netu, kutunda kuSesareya. Ha tu twarire kwaManasoni, oyu gha karire mutawi pakutanga. Oku gha tundererire ne kuSipurusi. Kukwendi ko twa ka shanine kutura.

Paghulusi ghana ka dhingura Jakobusi

17Pakukuma kwetu muJerusalema, ha tu tamburire hayendhetu ghushamberera.

18Eyi dina kuranda ko, ko kuyenda kwetu naPaghulusi kwaJakobusi. Hakungi waheya, ha karire popo pofotji. 19Paghulusi gha wa rumerithire, no gha wa thimwetwedhererire yoyiheya yi gha mu tendithire Nyambi muthirughana thendi, mukatji kawahayidena.

20Apa ha yi yuvire yi, ko kukugha kwawo Nyambi, no ha ningire kwaPaghulusi eshi: “Ngo mone we muyendhetu. Apa no padi Hajuda diyovi wa hana tawa. Ene shime ha shakamenena waheya kukwata muragho thiwana. 21Awo ha yuvire eshi, wa hongire Hajuda waheya wa ha karire mwawahayidena eshi, ha shwene muragho waMosesi. Ghuhunga ne ngo wa wa hongire eshi, kadi wa kuken̂a hanawo no kadi wa kutawa kuyithimwetwedha yaWajuda.

22“Nye keho sho tu tende? Awo ne hana kuyiyuva shemwa eshi, mo ghudi muno. 23Tende keho thikadi tuna kukutongwera. Pano papetu po ha di harume hane wa hana tendi medhero. 24Yende pofotji nawo, ho mu katende yoghukushuki no ka wa ruwere ha ka kukururitheko huki dhawo. Munyima po sho ha dimukere waheya eshi, noyofotji temba oyu sho gha tende buyu yokukoye eshi kadi yaghushemwa. Ene nowe ghothinda wa kwata muragho. 25Atwe twa dimukuthire hatawi wahe, wa ha karire pakutanga hahayidena kumakuyuvero ghetu eshi, mbadi ha kona kudya nyama ghokuyamba kwawanyambi hombango. No manyinga temba ngambi thiyama thokufa kuhore, no kushwena kudhirera yoyimango.”

26Mudiyuwa dyokurando ko, ha wa shimbi Paghulusi harume wa, no gha ka tendire nawo yoghukushuki. Aye gha yendire mu tembeli gha ka wa dimukithe eshi, diyuwa munye mbo ghapwa makukushukithero gha, no diyuwa munye mbo gha reta keheyu ndupu dhendi.

Kuna kumukwata Paghulusi mutembeli

27Oku ghana kushana kupwa mayuwa kwoko ghomakukushukithero, ko kumumona Paghulusi Hajuda homuthiko thaAsiya mutembeli. Awo ha yudhaghurire mbunga no ha kwatire Paghulusi. 28Ko kuninga kwawo eshi: “Mwaisraghelite, mwiye na mu tu ghamwene! Murume yu gha kosha‐kosha diko dyetu no tembeli no kokuheya ne no. Karo ghana reta Hahirika mutembeli. Ho ghana mangopitha dyango dino dyokupongoka.”

29Eyi ha yi ghamberire yi ne, yoyishi ha monine pakutanga Trofimusi ghoMukaefesusi pofotji naPaghulusi mumbara. No ha ghayarire eshi yo ghana shimbi Paghulusi mutembeli.

30Mbara dhodhiheya dha karire mudidhongera. Hanu wahe ha kongoshire ha gahukere Paghulusi, no kumukoka‐koka mutembeli. Mavero ghomahe ko kughatjapera pawangu kunyima dhawo. 31Hanu ne ha shanine vene eshi ha mu paghe. Popo ko kutuma mushongwe hatumi kwamukuru wawakayita ghoMuroma eshi Jerusalema yomuhe ne mudidhongera ghadi. 32Naye gha tambukire gha shimbe hamashurundate nawakamiti hoyita, ha yende kudidhongera. Apa dha monine mbunga mukuru wawakayita nawamashurundate ghendi, ko kushagheka kwawo kupumura Paghulusi. 33Mukuru wawakayita, ha yendi kwaPaghulusi. Ko ka mukwata no gha raghurire eshi ha mu ghange nomenge mawadi. Munyima ko kuyereka kwendi kushana‐shana eshi, murume munye yu no yinye gha tenda.

34Mbunga ko kukudhongera ghukushomonona, kate gha dhirire kudimuka naye muyiyoghotera eshi, yinye yidi po. 35Payidjatero yodorongo, ko kukara didhongi dishokuru, kate ha mu dhamunine hamashurundate Paghulusi. 36Yoyishi hanu wahe wa kuthire munyima ghukugherera eshi: “Mu finyaghuke nendi!”

Paghulusi ghana kukughamwena thinda

37Oku hana kushana kumwingeneka Paghulusi mumondero ghawamashurundate, ko kuninga kwendi kwamukuru wawamashurundate eshi: “Mukadikuto, kukona kwipura me thinu ndi?”

Po gha ningerire mukuru wawamashurundate eshi: “Wa dimuka Ruhirika ndi? 38Ngeshi kemo, kadi ghoMuegiptena oyu nga kara muyiman̂anya, noyu gheyire nawayapithi mayovi mane mumamboreya ndi?”

39Po gha mu hutherire Paghulusi eshi: “Ame ne noMujuda waTarsusi ghomuSilisiye, mukakakoghatji kombara dhishokuru. Na kukanderera eshi, ngo ni thighe ni ghambe nodiko.”

40Mukuru wawakayita gha mu tawedhire, Paghulusi naye ko kuyenda gha kemane payidjatero, no gha shingire mbunga nonyara dhendi eshi ha porere. Apa ha karire nyiki thikuma, ko kuwayawera kwendi muThiheburayi.

Currently Selected:

Yitenda ya Wapostoli 21: MHW1986

Highlight

Copy