Yitenda ya Wapostoli 12

Mapaghero ghaJakobusi no makwatero ghaPetrusi

1Munako dhi, gha kwatire fumu Herodesi hamweya hakakutawa, no gha wa shinyine. 2Aye gha paghire Jakobusi, ghomukurwa Johannesi nothimende.

3Apa gha yi monine eshi, yina wa roghera Hajuda, ko ka runduruka kwendi shime, no gha kwatire Petrusi. Eyi ne ya hokokire mumayuwa, ghodifeste dyomaghuro to ghotu‐thun̂unyi. 4Munyima dhokumukwata, gha mu pakire mudorongo, no gha mu tapire kumambunga mane. Mu kehe mbunga mashurundate mane hokumukunga. Ho gha himine kumutwara kughutho ghodiko, munyima dhodifeste dyoPaska. 5Dyo ha mu kungire Petrusi mudorongo. Ene hambunga dhawatawi, ha kon̂onmekire kumurapera kwaNyambi.

Mashutwero ghaPetrusi mutorongo

6Mughuthiku ghu, kughutho ghokuninga Herodesi eshi gha mu tware kughutho ghodiko, ha rara Petrusi mukatji kawamashurundate hawadi. Gha pwire kughanga nomenge mawadi. No kuthero, kwa karire harukunga dorongo hawadi.

7Kapupi kamanana, ko kwimana muengeli waFumu, no gha sheghenyithire thishe mudikokore dyodorongo. Muengeli gha thonyine Petrusi pamatji, gha mupinduthe no kumutongwera eshi: “Pinduke wangu.” Popo vene ko kuwa yighangitho kumoko ghendi. 8Ha ningi muengeli kukwendi eshi: “Kughange ngwama dhoye, gho shupate makuha ghoye.”

Petrusi gha yi tendire, namuengeli gha ningire shime kukwendi eshi: “Shupate thishupata thoye thopeghuru, ho wiye pofotji nange.”

9Petrusi gha kuthire muengeli, oku yoshidimuka eshi ghana shutuka. Kukwendi ne ya karire yira rupara ghana kumona. 10Ko kupita kwawo mukungi ghokutanga ndani ghoghuwadi. Eyi hana kukuma pathero dhoyikuvo dhokutamba kumbara, ko kukuyandhurukera dhothinda. Apa ha kumine panunda, oku hana kupoghoroka mukara, ko kumuthigha wangu muengeli. 11Ndani ghana kukuma po Petrusi eshi, nye yina mu hokokera no ha ningi eshi: “Na dimuka pan̂anyi‐n̂anyi eshi, Nyambi ghana tumu muengeli wendi, gha ni ghamwene mumoko ghaHerodesi, no kuyoyiheya yi dina nungu diko dyaWajuda eshi ha yi tende.”

12Noyighayara yokenge yo, ha yendi kwendi kundhugho dhaMaria ghonyina Johannesi. Oyu ha tire karo eshiMarkusi, mo dha karire mbunga dhawakakutawa mukurapera. 13Ko kungongona kwendi kuthero. Heya mukadhi‐kareri ghodina dyoRode, gha ka yuve eshi dye yu. 14Pakudimuka diywi dyaPetrusi, ko kushamberera kwendi no mbadi gha konine kuyandhurura thero. Ha dhondoka kwendi momo mundhugho gha ka tongore eshi, Petrusi ya gha nemana kuthero. 15Awo ne ha ningire kukwendi eshi: “Ghuna ghundumuka.”

Eyi gha kon̂omekire thikuma, ko kuninga kwawo eshi: “Shimengwa mudhimu wendi.”

16Ene Petrusi naye shime pakungongona. Pakuyandhurura thero, ha mu mone ha tutukwire thikuma. 17Ko kuwashinga kwendi nonyara eshi ha porere, no gha wa thimwetwedhere eshi, ngepi di ghana mushwaghitha Fumu mudorongo.

“Mu ka yi tongwere Jakobusi nawayendhange hamweya,” dyo gha ningire. Munyima ko kudhiruka kudyango dimweya.

18Apa dya vire diyuwa, ha tokotire thikuma hamashurundate yokwaPetrusi. 19Herodesi gha tumine ha ka mu shane. Ene pamurandu ghokudhira ka mu wana, ko kupangura kwendi hakungi no kuraghura eshi ha wa paghe.

Kutunda po, Herodesi gha tundire muJudeya no gha yendire kuSesareya, ho gha ka karire ko nakoghana.

Yifa yaHerodesi

20Hanu homuTirusi naSidoni, wa wayarerire thikuma ghupata waHerodesi. Yo ha tumenine ko hamweya kukwendi. Apa ha wanine Blastusi ghomukamarombe ghafumu, ha mu kumberire thiraro. Yoyishi ditunga dyawo, mumoko ghafumu yu dya karire kuyipara.

21Eyi dya kumine mo diyuwa, ko kuvata Herodesi yitere yendi yoghufumu no gha hungumanine padipuna, gha wa yawere. 22Ko kuyoghomoka hanu eshi: “Nyambi yu ghana kughamba, kadi munu!”

23Kukara‐kara po, ghana dhi mu wana muengeli waFumu, yoyishi mbadi gha tapire dikuto kwaNyambi. Ko kumuyughumitha mavinyo no gha fire.

24N̂ando dhaNyambi dha tapathanine, no dha withire dyango. 25HaBarnabasi naSaghulusi ha ka hukire, apa ha manine kurikanyitha yiraghura yawo muJerusalema. Ko kashimba kwawo Johannesi, oyu ha tire karo eshi Markusi ha keye nendi.

Currently Selected:

Yitenda ya Wapostoli 12: MHW1986

Highlight

Copy