Yitenda ya Wapostoli 11

Petrusi ghana kukuhutha thinda kumbunga dhawatawi homuJerusalema

1Hapostoli nawatawi hamweya homuJudeya, ha yuvire eshi hanu wa ha dhira kukara Hajuda, nawo hana kwata n̂ando dhaNyambi. 2Apa gha kumine Petrusi muJerusalema, ko kumurundera hatawi waWajuda eshi: 3“Owe ne wa dhingura hanu wa ha dhira kuken̂a. No kudya ghothinda nawo pofotji.”

4Petrusi ko kuyipathwerera thiwana yoyiheya di ya yenda eshi: 5“Ame na karire muJope mukurapera, apa na vutaghukire ni mone rupara,” dyo gha ningire: “Na monine thinu yira tuku shokuru, yu hana hangadheka kumashonga mane. Oyu ghana kushuruka kudiwiru, gheye kukwange. 6Apa na thi rondononine thiwana, ko kumona mo kwange yiyama yomaghuru mane yopamuve. Yishereka noghurondodhi ghokukokawa noyinyunyi yokutuka. 7Gho na yuvire diywi dina kuninga kukwange eshi: ‘Wiye Petrusi, paghe no dye.’ 8Ene me na huthire eshi: ‘Nokamanana temba Fumu! Shime ni shemwa eshi, kupaka mukanwa kange thinu thokudhira kupongoka, ngambi thokudhira kukushuka.’ 9Paruwadi ha ni yuvu diywi dina kushwagha mudiwiru eshi: ‘Ethi gha kushukitha Nyambi, mbadi wa kona we kuthipiritha ghukushuki.’ 10Ruhatu ya hokokire, munyima ko kuhuka yoyiheya mudiwiru.

11“Ruvedhe roro, ko kunitumena harume hahatu wa ha tundire kuSesareya. Gho ha ka kumine kundhugho dhi twa karire. 12Mupepo wa ni tongwerire eshi, na tamangera mukuyenda nawo pofotji. Ndani na kuyenda nawayendhange kwoko noyofotji, kate tu kengene mundhugho dhaKornelighusi. 13Ko ka tu thimwetwedhera kwendi eshi, ngepi di gha monine muengeli gha nemana mundhugho dhendi ghuninga eshi: ‘Tume munu kuJope, gha ka shimbe Simoni yu ha ta karo eshi Petrusi. 14Ghana kara nothinu thokukutongwera, ethi sho thi kughamwene we, nodidhiko dyoye dyodiheya.’

15“Eyi na tangire kughamba kamanana, ko kutembera Mupepo papawo, thika di gha temberire papetu pakutanga. 16Ho na vurukire kun̂anando dhi gha ningire Fumu eshi: ‘Johannesi ne nomeyu gha yoghangire. Ene mwe, mbo muna yogho naMupepo ghoKupongoka.’ 17Nawo ha tawire mwaFumu Jesus Kristusi thika twe. NaNyambi gha pire kukwawo yitapa pofotji yira yetu. Ame ne yame dye yu sho ni yereke kushinga Nyambi.”

18Pakuyiyuva hakakutawa, ko kushamberera kwawo. Ha kughire Nyambi no ha ningire eshi: “Nyambi ghana twara wa ha dhirire kukara Hajuda kumapirukero, gha wape moyo.”

Mbunga dhomuAntiyokiya

19Pamakutha‐kuthero gha gheman̂anyine munyima dhokufa kwaStefanusi, po ha pwire kuharan̂anya hatawi wahe. Hamweya ha yendire kuFenisiye, no kuSipurusi naAntiyokiya. Ene mbadi ha yuvithire n̂ando kwahawonawo, shimengwa kwaWajuda. 20Mukatji kawatjwayuki, mwa karire hanu mwene awa ha tundire kuSipurusi no kuSirene heye kuAntiyokiya, na ha yuvithe karo kwaWahirika mbudhi dhodhiwa eshi, Jesusi ne Fumu. 21Fumu gha wa ghamwenine, no kemo ha vurire hanu mumatawero kate ha pirukire kwaFumu.

22Mbudhi dhi, dha pupanine kate dha ka kumine kwawambunga homuJerusalema. Awo ne ha tumine Barnabasi kuAntiyokiya. 23Apa gha ka kumine ko, gha ka shambererire pakumona eshi ngepi di gha rughanine Nyambi muthin̂eke thendi, mukatji kawo. No gha wa tjokedhire eshi, ha karere Fumu nomitjima dhawo dhodhihe nomidhimu dhawo. 24Barnabasi, gha karire murume ghomunongo, no gha yarire naMupepo ghoKupongoka no gha karire nomatawero ghokutanara.

Karo gha retire mbunga dhodhingi dhawanu kumatawero ghomwaFumu. 25Munyima Barnabasi, gha yendire kuTarsusi gha ka shane Saghulusi. 26Apa gha ka mu wanine gha ka mu shimbire kuAntiyokiya. Mughuwadi wawo, ha rughanine mumbunga ghure ghomwaka no ha hongire hanu hohengi. MuAntiyokiya, mo ha tire hakakutawa hakriste pakutanga.

27Mumayuwa gha, heyire haporofeta hokuJerusalema muAntiyokiya. 28Yofotji ghopapawo, ghodina dyoAgabusi, wa mu yendithire Mupepo gha ka yaghure eshi, dina kukara diyerenge dyodikuru mukaye kokahe. Eyi ne ya hokokire karo mumayuwa ghafumu shokuru Klaghudighusi. 29Hakakutawa, ha kungungire eshi kehe yu gha tape kanu thika di ghana wana, yi ka ghamwenitheko hatawi hayendhawo homuJudeya. 30Nawo ha yi tendi, no ha tumine manyinga naBarnabasi naSaghulusi kwawakungi homuJerusalema.

Currently Selected:

Yitenda ya Wapostoli 11: MHW1986

Highlight

Copy