ROM 4

Abraham Kijadi Benar ku Mat Jenang Kerana Iiman

1Amen begei ajeh, maloh de buleh hiurok tentang Abraham jenang rak bangse hik ajeh? Ma pengalaman kek sebegei sengoi de kijadi benar ku mat Jenang? 2Amen Jenang Kiterima Abraham sebegei sengoi de ya kijadi benar ku mat Ilei kerana ya ibahneh, Abraham buleh kibelagak. Tapi kek pek buleh kibelagak ku ngar Jenang 3kerana ku kateh Alkitab mong bicot, “Abram kipecaya nu Jenang. Kerana ajeh, Jenang Kianggap kek sebegei sengoi de benar ku mat Ilei.”#Kej 15:6 4Nu sengoi de kerakjak, igaji ajeh apeka hadiah tapi ajeh mimang hak kek. 5Tapi sengoi de pecaya nu Jenang pek kibegantong nu usehe ilei sendiri. Kek kipecaya nu Jenang de Kiampon idosa. Iiman ajehloh de kibeh Jenang Kianggap kek sebegei sengoi de benar ku mat Ilei. 6Raja Daud pernah kibelwal tentang hal de sama bile kibelwal tentang berkat de biterima ya sengoi de bianggap benar ku mat Jenang, hamapen sengoi ajeh pek kibeh ma-ma untok kikep berkat ajeh. Ku kateh Alkitab, Raja Daud kiurok,

7“Sengoi de biampon senalah enai ya Jenang

ru dosa enai bigit ya Jenang,

enai ajeh sengoi de biberkat!

8Sengoi de idosa pek bikira nij ya TUHAN ajeh sengoi de biberkat.”#Mzm 32:1-2

9Berkat ju Jenang ajeh had ha mai Yahudi talehka? Tok. Berkat begei ajeh ha mai pek Yahudi de pek besunat juga. Jik ya jiurok Jenang Kianggap Abraham ajeh sebegei sengoi de benar ku mat Ilei kerana kipecaya nu Jenang. 10Bile Abraham ajeh bianggap benar ku mat Jenang? Sebelom atao selepas kibesunat? Apeka telas kibesunat tapi sebelom kibesunat! 11Jenang Kianggap Abraham sebegei sengoi de benar mase kek lekat pekseg kibesunat. Sunat ajeh sekadar tanda de kiperneng Abraham ajeh bianggap benar ku mat Jenang. Jadi, begei ajehloh Abraham kijadi jenang rak nu dikdij mai de Jenang Kianggap benar kerana naipecaya nu Ilei hamapen enai ajeh pek naibesunat. 12Abraham juga kijadi jenang rak nu mai de besunat, apeka kerana naijoi ha hukom sunat ajeh taleh, tapi juga kerana naipecaya nu Jenang sama begei iman Abraham sebelom kek bisunat entem.

Mai Naikep Jenanji ju Jenang kerana Naipecaya nu Ilei

13Jenang Kijanji nu Abraham ru ikenon-cenok Kaha-og dunia adeh nu enai. Jenang Kijanji begei ajeh apeka kerana Abraham kitaat nu Hukom Taurat tapi kerana kipecaya nu Jenang lalu kek biterima ya Jenang sebegei sengoi de benar ku mat Ilei. 14Amen jenanji Jenang ajeh had biog nu mai de naitaat ha Hukom Taurat taleh, pek beguna nij mai naipecaya nu Jenang, ru Ijenanji pen pek beguna juga 15kerana Hukom Taurat kipetiba bengal Jenang. Amen pek mong hukom, pek mongloh juga mai de belanggar hukom.

16Jadi, mai naikep jenanji ju Jenang kerana naipecaya nu Ilei. Jenanji ajeh ennog pecume ju Jenang nu dikdij kenon-cenok Abraham. Hik sebegei kenon-cenok Abraham hiyaken hik mimang hikep jenanji ajeh, baik de hitaat nu Hukom Tauratka tok, asal hipecaya nu Jenang sama begei Abraham kipecaya nu Ilei. Kerana, Abrahamloh jenang rak nu dikdij lihik de pecaya nu Jenang. 17Ku kateh Alkitab, Jenang Kiurok nu Abraham, “Eng Ngpejadi hek jenang rak nu jeoi bangse.”#Kej 17:5 Hal ajeh tejadi kerana Abraham kipecaya nu Jenang de Kipersui ha mai dat ru de Kicipte bende de iasaljeh pek mong. 18Hamapen ya pek mong harapan, Abraham tetap kipecaya ru kibeharap nu Jenang. Jadi, Jenang Kipejadi kek jenang rak nu jeoi bangse begei de bicot ku kateh Alkitab, “Hek doh mong kenon-cenok begei jengoi perloi ajeh.”#Kej 15:5 19Ku mase ajeh, Abraham iumur ya kaha-merek 100 tahut. Kek kipanei pek mungken kek dapat kikep kenon kerana iberog ya ihad engrak ru ikenah Sara ajeh manang. 20Hamapen begei ajeh, iiman nu jenanji Jenang ajeh pek gulaj. Kek lekat kipecaya ru iiman nu Jenang ajeh gumaken lebeh kuat nij lei kipateh ha Jenang. 21Abraham betol-betol kipecaya tentang hal adeh: Jenang ajeh mong Ikuasa Kaha-beh dikdij ma de ya Kijanji. 22Ajehloh isebab Jenang Kianggap Abraham sebegei sengoi de benar ku mat Ilei. 23Engrok ‘Kianggap benar ku mat Ilei’ ajeh bicot apeka had ha Abraham taleh 24tapi ha hik juga de bianggap benar ya Jenang kerana hipecaya nu Ilei de Kiberkos Yesus Tuhan hik ju Idanan. 25Yesus ajeh biperdat ha dosa hik ru biberkos nij ju Idanan supaye hik dapat hijadi benar ku mat Jenang.

Currently Selected:

ROM 4: AEH

Highlight

Copy