ROM 13

Hod Taat nu Kerajaan

1Jap-jap mai hod naitaat nu kerajaan kerana kerajaan naikep dikdij kuasa ju Jenang. Sengoi-sengoi de mong ku kateh kerajaan hunen bipetetap ya Jenang. 2Jadi, bok taleh de nailawan ha kerajaan, enai nailawan ha hal de ya bipetetap ya Jenang. Amen naibeh begei ajeh, enai naipetiba nehukom Jenang ku diri liknai sendiri. 3Mai de naibeh bor pek perlu naisengoh ha kerajaan tapi had mai de naibeh jehat taleh de perlu naisengoh. Amen engkehod pek engkerasa sengoh ha kerajaan, behloh bor ru engkek doh bipateh ya mai kerajaan. 4Kerana, enai ajeh hambe Jenang de naikerakjak ha bernor liengkek sendiri. Tapi amen engkebeh jehat, sengohloh kerana enai mong kuasa naiha-hukom ha engkek. Enai ajeh hambe Jenang, alat de biguna ya Jenang untok Kihukom mai de bahbeh jehat. 5Ajehloh isebab engkek hod engketaat nu kerajaan. Apeka taleh kerana engkesengoh bihukom ya Jenang, tapi juga kerana sengik engkek ya kipanei ajehloh hal de patot engkebeh.

6Ajehloh juga isebab engkebayar cukei, kerana mai kerajaan ajeh naibekerjak ha Jenang. 7Bayarloh merip ijengoi de patot engkebayar nu dikdij enai. Amen patot engkebayar cukei, bayarloh nu enai bemacam jenis cukei de mimang patot engkebayar. Amen enai patot bihormat, hormatloh ha enai. Amen enai patot bihargai, hargailoh ha enai.

Hokloh Ratak Manusia Begei Engkehok ha Diri Liengkek Sendiri

8Agokloh berikdes nu bok-bok pen kecuali engkeberikdes haknok nu sesama liengkek. Kerana, amen engkehakhok ratak manusia, engkek ya engketaat nu dikdij Hukom Taurat. 9Mong hukom de kiurok, “Agok bezinah, agok perdat mai, agok siksij, agok tamak.” Dikdij hukom ajeh ru ma taleh hukom de kilek buleh biperingkas naijadi nanek hukom adeh: “Hokloh ratak manusia begei engkehok ha diri liengkek sendiri.”#Kel 20:13-15, 17; Ul 5:17-19, 21; Im 19:18 10Sengoi de kihok ha mai kilek pek kibeh jehat nu enai. Jadi, haknok ajeh kibeh hitaat nu dikdij Hukom Taurat.

11Hik hod hibeh hal ajeh kerana liengkek ya engkepanei tentang hal adeh: Hunenloh imase engkek hod engkekos ju buknet kerana imase untok hik biha-peselamat lebeh merek hunen bebandeng daripade mase mula-mula hipecaya entem. 12Kelem ya kaha-merek dij, pek liu nij doh ya kaha-yah. Jadi, beiloh hiteg hal-hal de hibeh ku arik kelem ru beiloh hilog alat perag de biguna ku arik yah. 13Beiloh hibeh kelaku begei de bibeh ku arik yah. Agokloh hiberunggen ru hibelbel. Agokloh hibeh kelaku seks de niknej ru behej. Ru agokloh belawan ru beiri sengik. 14Tapi perlogloh diri liengkek ya kelaku ru peniker Tuhan Yesus Kristus ru agokloh serngik begeiharok engkeha-perwas heknod berog engkek de niknej.

Currently Selected:

ROM 13: AEH

Highlight

Copy