ROM 12
12
Sinui ha Jenang
1Jadi, sesedara seiman, kerana Jenang ihad Kiyayak ha engkek, eng betol-betol ngsemanj nu engkek supaye engkeog berog engkek ajeh sebegei ennog korban de sui, de has ha Ilei, ru de kipesenang Isengik. Begei ajehloh icare de sepatotnye engkebeibadah nu Ilei. 2Agokloh joi care mai ku dunia adeh tapi biarloh Jenang Kibeh peniker engkek kijadi pai supaye engkebeubah. Amen begei ajeh, engkek doh engkepanei heknod Jenang de bor, de kipesenang Isengik, ru de sempurne.
3Jenang Kiperneng Ibernor sengik nu eng, jadi ngbesat begei adeh nu jap-jap liengkek: Agokloh piker diri engkek ajeh lebeh tinggi daripade de sepatotnye. Tapi engkek hodloh jujor mase engkenilei diri liengkek engkeguna iman de biog ya Jenang nu jap-jap liengkek. 4Berog hik adeh nek nanek taleh tapi mong jeoi ianggote ru jap-jap anggote ajeh mong tugas liknai memaseg. 5Begei ajehloh juga ku berog Kristus. Hik adeh hijengoi tapi hijadi nanek berog kerana hibenanek ru Kristus. Hik mong hubungan ku ratak lihik sebegei anggote-anggote ku nanek berog. 6Ya bernor sengik Jenang, jap-jap lihik biog kurnie de belaen-laen. Amen engkek mong kurnie ha perlei bengsat Jenang, jadi perleiloh kena begei takat belok de engkepecaya nu Jenang. 7Amen engkek mong kurnie ha tulog mai kilek, jadi tulogloh ha mai kilek. Amen engkek mong kurnie ha ajar mai kilek, jadi ajarloh ha mai kilek. 8Amen engkek mong kurnie ha pegalak mai kilek, jadi galakloh ha mai kilek. Amen engkek mong kurnie ha engog, jadi ogloh ru senang sengik. Amen engkek mong kurnie ha memimpen, jadi pimpenloh rajet-rajet. Amen engkek mong kurnie ha perneng neyayak, behloh hal ajeh ru sengik de kerakmik.
9Agokloh bepure-pure engkehok ha mai kilek tapi hodloh betol-betol engkehok ha enai. Getekloh hal de jehat ru caploh nu hal de bor. 10Hodloh ratak engkehakhok ihad mesre sebegei sesedara ku kateh peringak Kristus, ru hodloh engkek canuk de behormat ha mai kilek. 11Agokloh segat tapi hodloh engkek rajet, ru kelog engkek hodloh kibesemangat kaha-beh kerjak Tuhan. 12Hodloh engkekerakmik kerana engkebeharap nu Tuhan, besabarloh ku kateh senusah, ru rajetloh bedoa. 13Kungsiloh ma de mong ku engkek ru sesedara seiman de perlu bitulog, ru ogloh tumpang nu mai de perlu.
14Bedoaloh nu Jenang supaye Kiberkat sengoi-sengoi de beaniaye ha engkek. Semanjloh nu Jenang supaye Kiberkat enai ru agokloh engkesumpah ha enai. 15Kerakmikloh besama ru mai de kerakmik, ru jinjaploh besama ru mai de jinjap. 16Hodloh engkesui benanek sengik ratak liengkek. Agokloh sumbong tapi bekawatloh ru mai de bipandang rendah. Agokloh anggap diri liengkek ajeh panei.
17Agokloh balas jenghat nu mai de naibeh jenghat nu engkek. Behloh hal de bineng bor ya dikdij mai. 18Suiloh damei ru dikdij mai amen buleh engkekawal keadaan ajeh. 19Sesedara, agokloh balas dendam tapi biarloh Jenang Kihukom enai kerana ku kateh Alkitab TUHAN Kiurok begei adeh: “Benalas ajeh hak Eng. Eng doh Nghukom jenghat enai.”#Ul 32:35 20Tapi hodloh engkebeh begei adeh:
“Amen musoh engkek kicuag, ogloh kek caknak.
Amen kek kiselod, ogloh kek ngeknut.
Amen engkebeh begei ajeh, engkek doh engkebeh kek kiselsel.”#Ams 25:21-22
21Agokloh biar diri liengkek bipealah ya jenghat tapi pealahloh jenghat ya bahneh bor.
Currently Selected:
ROM 12: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
