MARKUS 16

Yesus Kikos ju Idanan

(Mat 28:1-8; Luk 24:1-12; Yoh 20:1-10)

1Ku dui Sabtu bile arik Sabat ya lalu, Maria mai Magdalena, Salome, ru Maria amek Yakobus naiet naibeli neramu naiha-lumur mayat Yesus. 2Ku ipepegelap arik Minggu, telas taleh mat arik kihuj, enai naiet nu penep Yesus. 3-4Ku kateh ceknip enai ajeh, naibelwal ratak liknai, “Bok de buleh betulog hik pegulek batu tenutop penep?” Naiurok begei ajeh kerana batu ajeh ihad entoi. Tapi bile ya nailei ku pajeh, naibakek batu tenutop ajeh ya tegulek nu ibeg. 5Enai pen naimuj nu kateh penep ajeh. Mase naimuj, naibakek mong numom keral nyengnyam de kilog jubah biyeg kigei ku englag kentop enai. Enai ihad naikekjet ru naisengoh.

6Tapi keral nyengnyam ajeh kiurok, “Agok sengoh! Ngpanei engkekek Yesus Sengoi Nazaret de ya bisaleb. Kek pek mong ku padeh. Kek ya Kikos ju Idanan! Nengloh, adehloh itempat Kek bidek. 7Ru hunen etloh ru pasalloh nu Ipengikot-pengikot temasok nu Petrus juga tentang hal adeh: Kek Kiet lebeh canuk daripade enai nu lengrik Galilea. Ku pajeh enai doh naiburuk Kek begei ma de ya Kiurok nu enai.”#Mat 26:32; Mrk 14:28

8Kekerdor ajeh pen naijar naihol ju penep ajeh kerana naikekjet ru naisengoh. Enai pek naipasal hal ajeh nu bok-bok pen kerana naisengoh.

[AYAT 9 LEI 20 KU KEROP ADEH PEK MONG KU KATEH SALINAN-SALINAN ALKITAB TEAWAL]

Yesus Kiperneng Ilei nu Maria Mai Magdalena

(Mat 28:9-10; Yoh 20:11-18)

9Telas Yesus Kikos ju Idanan ku pepegelap arik Minggu, Kek mula-mula Kiperneng Ilei nu Maria mai Magdalena. (Yesus pernah Kiperet tujoh nyanik ju kek.) 10Maria mai Magdalena kiet nu pengikot-pengikot Yesus de tengah naibekabong ru naijinjap. 11Kek kipasal Yesus ya Kisui nij ru kek ya kibakek Yesus. Bile naicerngai tentang hal ajeh, enai pek naipecaya.

Yesus Kiperneng Ilei nu Nar Urag Ipengikot

(Luk 24:13-35)

12Telas ajeh Yesus Kiperneng Ilei nu nar mom Ipengikot tapi Irenes pek begei de baikenal. Hal ajeh belaku mase ubai ku kateh ceknip ubai nu nanek kampug. 13Lalu ubai pen baijog ru baipasal hal ajeh nu pengikot-pengikot de kilek tapi pek naipecaya juga.

Yesus Kiperneng Idiri nu 11 Urag Ipengikot

(Mat 28:16-20; Luk 24:36-49; Yoh 20:19-23)

14Ipenyudah, Yesus Kiperneng Ilei nu 11 urag Ipengikot mase tengah naicakcak. Kek Kitegor enai kerana pek naibeiman ru ihad degel lei pek naipecaya nu penasal mai de ya naineng Kek telas ya Kisui nij. 15Lalu Yesus Kiurok nu enai, “Etloh nu seluroh dunia ru perleiloh Gah Bor nu dikdij sengoi.#Kis 1:8 16Sengoi de naipecaya ru bibaptis doh bipeselamat tapi sengoi de pek naipecaya doh bihukom. 17Nu sengoi de pecaya doh biog tanda-tanda ajaib adeh: Ku kateh muh Eng, enai doh naiperet nyanik-nyanik. Enai doh naibelwal ku kateh bahase-bahase de pek naireti. 18Enai doh naicap tijik ru naingut racot, tapi tijik ru racot ajeh doh pek kibeh enai nyik atao dat. Enai doh naidek teg enai ku mai nyik, ru mai nyik ajeh doh naibor.”

Yesus Biangket nu Serga

(Luk 24:50-53; Kis 1:9-11)

19Telas Tuhan Yesus Kibelwal ru enai, Kek biangket nu serga lalu Kigei ku kedudukan de tehormat ku englag kentop Jenang.#Kis 1:9-11 20Ipengikot-pengikot pen naiet naiperlei Gah Bor nu dikdij tempat. Tuhan Kibeh tanda-tanda ajaib melalui enai untok Kipebukti Gah Bor de naiperlei ajeh benar.

[KU KATEH SALINAN ALKITAB MANAH DE KILEK, AYAT 9 LEI 20 KU KEMIL ATAH BIGANTI YA AYAT 9 LEI 10 KU KEROP ADEH]

9Kekerdor ajeh naiet nu Petrus ru ikekawat lalu naipasal ma de biurok ya keral nyengnyam ajeh nu enai. 10Telas ajeh Yesus Kior Ipengikot-pengikot naiperlei Gah Bor de suci ru kekal ju timur lei barat. Gah Bor ajeh tentang hal begeiharok manusia naikep sinui de lei ditehjeh.

Currently Selected:

MARKUS 16: AEH

Highlight

Copy