MARKUS 15

Yesus Bisoal ya Pilatus

(Mat 27:1-2; Luk 23:1-5; Yoh 18:28-38)

1Ku ipepegelap huper, raknak-raknak imam agame Yahudi, raknak-raknak mai Yahudi, guru-guru Hukom Taurat, ru dikdij anggote Mahkamah Agame Yahudi naibekumpol ru naibebincang. Telas ajeh naior Yesus bibeg lalu naien ru naiog Kek nu penguasa lengrik Yudea imuh Pilatus. 2Jadi, Pilatus kitanya nu Yesus, “Hek adeh raja mai Yahudika?”

Yesus Kiberlag, “Kena begei bengwal hek ajeh.”

3Lalu raknak-raknak imam agame Yahudi naiperhol jeoi tenudoh tentang Yesus. 4Kerana ajeh, Pilatus kitanya nij nu Yesus, “Hek ya Hacerngai dikdij tenudoh enai ajeh tentang Hek! Berlagloh bengwal enai ajeh.”

5Tapi Yesus pek Kiberlag ma-ma pen lei Pilatus kihiran.

Yesus Bihukom Dat

(Mat 27:15-26; Luk 23:13-25; Yoh 18:39–19:16)

6Ku jap Arik Raya Paskah, biasajeh penguasa kiterlas numom sengoi de bijel. Kek kiterlas sengoi de bisemanj ya mai jengoi. 7Ku tahut ajeh, mong numom imuh Barabas de bijel besama ru memerip urag pemberontak de kilek. Enai naiperdat mai mase naimemberontak nailawan kerajaan Rom. 8Jadi, mai jengoi naibekumpol ku ngar Pilatus ru naisemanj supaye kiterlas numom mai de bijel begei de biasa kibeh. 9Pilatus kitanya nu enai, “Engkehodka eng ngterlas raja mai Yahudi adeh?” 10Pilatus kitanya begei ajeh kerana kipanei raknak-raknak imam agame Yahudi naiog Yesus nu ilei kerana naicemburu.

11Tapi raknak-raknak imam agame Yahudi naihasot mai jengoi supaye naisemanj Barabas biterlas. 12Pilatus kiurok nij nu enai, “Amen begei ajeh, ma de engkehod ngbeh nu Sengoi de engkeurok Raja mai Yahudi adeh?”

13Enai pen naihai, “Saleb Kek!”

14Pilatus kitanya nij, “Yama? Jenghat ma de ya Kibeh?”

Tapi enai hai ru ihad kuat nij, “Saleb Kek!”

15Pilatus kaha-pesenang sengik mai jengoi ajeh. Kerana ajeh, kek kiterlas Barabas. Telas ajeh kek kiog Yesus nu iaska supaye birempet ru bisaleb.

Aska-aska Nainyeh Yesus

(Mat 27:27-31; Yoh 19:2-3)

16Aska-aska Rom naien Yesus nu kediaman rasmi Pilatus ru naicereg dikdij aska de kilek. 17Naiperlog jubah ungu ku Yesus ru naibeh mahkote ju cag-cag bejerlak lalu naiperlog ku Ikui. 18Telas ajeh naiurok, “Daulat Raja mai Yahudi!” 19Naipet Ikui bekali-kali ya cog ru naitoh Kek. Lalu naisujod ku Ingar. 20Telas nainyeh Kek, naiteg jubah ungu ajeh lalu naiperlog balek penakei Ilei Sendiri. Lalu naien Yesus nu luar naiha-saleb Kek.

Yesus Bisaleb

(Mat 27:32-44; Luk 23:26-43; Yoh 19:17-27)

21Ku kateh ceknip enai ajeh, mong numom keral imuh Simon kilalu ku pajeh. Kek mai kote Kirene. Kek ajeh apak Aleksander ru Rufus. Kek ju kampug ru pai kimuj nu kateh kote Yerusalem. Aska-aska ajeh naipaksa kek kigulap jehuk kalag Yesus.#Rm 16:13 22Lalu naien Yesus nu nanek tempat imuh Golgota, de imaksod Tempat Tarong Kui. 23Naiog nu Yesus teu wain de bicampor ru mur#15:23 Mur: Mur adeh jeoi igenuna temasok kijadi bahan ha bahneh minyak wangi, alat solek ru penglai. Ku bahagian cerite adeh, mur bicampor ru teu wain sebegei penglai terenghan nyik. tapi Kek Kinyek ngekngut. 24Telas ajeh naisaleb Kek. Enai naibahagi Ileknog ru naibecabot undi untok naiha-tentu bahagian leknog belok de jap-jap liknai naikep.#Mzm 22:19

25Enai naisaleb Yesus ajeh ku pukol sembilan pegelap. 26Ku jehuk kalag Yesus, mong papat de bicot tenudoh adeh: “Raja mai Yahudi.” 27Ku tempat ajeh juga bisaleb nar mom mai jehat, numom ku Ikentop ru numom nij ku Ikengwil. [28Hal ajeh tejadi kena begei ma de bicot ku kateh Alkitab: “Kek bianggap sama begei mai jehat.”]#15:28 Ayat adeh pek mong ku kateh memerip salinan Alkitab manah.#Yes 53:12

29Mai jengoi de belalu ku pajeh nairungel kui enai sambel nainyeh Yesus. Naiurok nu Kek, “Eiloh, kem entem Habual Haha-teh Deg Jenang ru Haha-beh nij kateh nik arik!#Mzm 22:8; 109:25; Mrk 14:58; Yoh 2:19 30Amen begei ajeh, hunen celehloh ju jehuk kalag ajeh ru peselamatloh diri LiHek Sendiri!”

31Raknak-raknak imam agame Yahudi ru guru-guru Hukom Taurat juga nainyeh ha Kek. Naiurok ratak liknai, “Kek Kipeselamat ha mai kilek tapi pek dapat Kipeselamat ha Diri Ilei Sendiri! 32Kek Kiurok Ilei ajeh Peselamat de bijanji ya Jenang ru Raja Israel. Amen Kiceleh ju jehuk kalag ajeh hunen, baruloh buleh hipecaya nu Kek!”

Nar urag mai jehat de bisaleb besama-sama ru Kek pen baihina ha Yesus.

Danan Yesus

(Mat 27:45-56; Luk 23:44-49; Yoh 19:28-30)

33Ku tengah arik, iarik kisengur ku seluroh lengrik lei nu pukol tige dui. 34Ku pukol tige dui, Yesus Kicereg ya suara de kuat, “Eloi, Eloi, lama sabakhtani?” de imaksod, “Jenang Eng, Jenang Eng, yama Jenwes Eng?”#Mzm 22:2

35Memerip urag sengoi de mong ku pajeh naicerngai ha cengreg Yesus ajeh lalu naiurok, “Cerngailoh, Kek Kicereg Nabi Elia!” 36Numom ju enai ajeh deras-deras kijar kikot spanj lalu Kicerlog nu kateh teu wain de ya keer. Telas ajeh kek kicucok spanj ajeh ku mol jehuk lalu kiulur nu empag Yesus. Kek kiurok, “Poj nok, bei hineng entah Nabi Elia kihol kaha-cerleh Kek ju jehuk kalag.”

37Telas ajeh Yesus Kicereg kuat nij. Lalu Kek pen Kitawes.

38Ku mase ajeh, tirei ku kateh Deg Jenang kitateg ju ikemil lei nu ikerop lei kijadi nar henglei.#Kel 26:31-33 39Raknak aska de kijinjeg ku ngar jehuk kalag ajeh kineng begeiharok Yesus Kidat.#15:39 Yesus Kidat: Ku kateh memerip salinan Alkitab manah, bicot begei adeh: Yesus Kikarau lalu Kidat. Kerana ajeh, kek kiurok, “Sengoi adeh mimang betol-betol Kenon Jenang!”

40Mong juga memerip urag kerdor naineng dikdij ajeh ju kennyak. Ku engkap kekerdor de nengneng ajeh mong Salome, Maria mai Magdalena, ru Maria (amek ubai Yakobus de nyengnyam ru Yoses). 41Enailoh kekerdor de naijoi ru naitulog Yesus mase Kek ku lengrik Galilea. Ku pajeh juga mong jeoi kerdor kilek de ya naihol nu kote Yerusalem besama ru Yesus.#Luk 8:2-3

Yesus Bicop

(Mat 27:57-61; Luk 23:50-56; Yoh 19:38-42)

42Hal ajeh tejadi ku arik Jumaat ru iarik ya kaha-dui. Ku arik ajeh mai Yahudi mesti naisekyap untok naisamut arik Sabat.#15:42 Arik Sabat: Arik Sabat kimula dari dui Jumaat lei nu dui Sabtu. 43Kerana ajeh, Yusuf mai Arimatea kiet nu Pilatus ru kisemanj mayat Yesus kerana kaha-cop. Kek ajeh numom ju anggote-anggote Mahkamah Agame Yahudi de ihad bihormat. Kek kigu-poj imase Jenang Kimemerintah sebegei Raja. 44Pilatus kihiran bile kicerngai Yesus ya dat, jadi kicereg raknak aska ru kitanya, “Betolka Yesus ya dat?” 45Telas kicerngai engrok ju raknak aska ajeh, Pilatus kiog Yusuf supaye kien mayat Yesus. 46Yusuf pen kibeli abat benalot mai dat. Telas kek kicerleh mayat Yesus ju jehuk kalag, kek kibalot berog Yesus ya abat ajeh. Telas ajeh kek kidek mayat Yesus ku kateh penep de bikurek ku lod batu. Telas ajeh kek kigulek batu entoi kaha-tutop pintu penep ajeh. 47Maria mai Magdalena ru Maria amek Yoses baiperatik ku belok Yusuf kidek mayat Yesus.

Currently Selected:

MARKUS 15: AEH

Highlight

Copy