LUKAS 5

Pengikot-pengikot Petame de Bipileh ya Yesus

(Mat 4:18-22; Mrk 1:16-20)

1Ku nanek arik, Yesus tengah Kijinjeg ku beg teu Tasek Genesaret#5:1 Tasek Genesaret: Adeh Tasek Galilea. ru mai jengoi naibekerumun naiha-cerngai engrok Jenang. 2Yesus Kibakek mong nar perahu ku beg pantei ru nelayan-nelayan ya naihol ju perahu ajeh ru tengah naisuj jala. 3Yesus Kitebot perahu hak Simon Petrus ru Kisemanj Simon tulak perahu ajeh nyak gek ju beg pantei. Lalu Yesus Kigei ku perahu ajeh ru Kibeajar mai jengoi.

4Telas Kibeajar, Yesus Kiurok nu Simon, “Kayohloh perahu hek nu teu de jerek ru jalaloh kak ku pajeh.”

5Simon kiberlag, “Tuan, ya nukenglem jibekerjak keras tapi mahentok de jikep. Tapi kerana Jenor, pek maloh, eng doh ngjala nij.” 6Bile naijala, naikep jeoi kak lei ijala ajeh ya mula kibetej. 7Kerana ajeh, naisemanj tulog ju kekawat ku perahu kilek. Rimnar perahu ajeh tebeg ya kak lei mula kikarap.

8Bile Simon Petrus kineng ma de ya belaku ajeh, kek kibelutot ku ngar Yesus ru kiurok, “Tuhan, dekloh ju eng kerana eng mai bedosa.”

9Simon kiurok begei ajeh kerana kek ru ikekawat ihad naikagom ha ijenengoi kak de ya naikep. 10Yakobus ru Yohanes pen baikagom juga. Ubai ajeh kekenon Zebedeus ru ubai ajeh kekawat sekerjak Simon. Yesus Kiurok nu Simon, “Agok sengoh! Ju hunen, hek doh hajadi mai bejala sengoi ru doh hapejadi enai pengikot Eng.”

11Enai saher perahu enai ajeh nu beg pantei ru naiwes dikdij hal, lalu naijoi Yesus.

Yesus Kiperbor Nyaknik Kuste

(Mat 8:1-4; Mrk 1:40-45)

12Ku nanek arik Yesus mong ku nanek pekan. Ku pajeh mong numom keral iberog tebeg ya nyaknik kuste. Bile kibakek Yesus, teros kisujod ku ngar Yesus ru kimerayu, “Jen, amen Jenhod, Jen dapat Jenperbor eng.”

13Yesus Kiulur Iteg lalu Kipep kek ru Kiurok, “Eng Nghod. Aborloh hek!” Ku sarik jijeh juga inyaknik kuste pen bor. 14Lalu Yesus Kior nu kek ajeh, “Agok pasal hal adeh nu bok-bok pen. Etloh nu imam agame Yahudi supaye kisahkan nyaknik hek ya bor. Telas ajeh begei de bior ya Nabi Musa, ogloh korban de kipejadi hek pek haram nij, sebegei bukti nu mai kilek hek ya habor.”#Im 14:1-32

15Tapi gah tentang Yesus gucep nu belok-belok taleh ru jeoi mai naiterbuk nu Kek kerana naiha-cerngai Ineajar ru naihod nyaknik enai biperbor. 16Tapi Yesus kerap Kiet nu tempat de serakngek ru Kibedoa.

Yesus Kiperbor Numom Sengoi Lumpoh

(Mat 9:1-8; Mrk 2:1-12)

17Ku nanek arik mase Yesus Kibeajar, mong juga memerip urag mai Farisi#5:17 Mai Farisi: Adeh kirujok nu kumpulan pemimpen-pemimpen agame Yahudi de naitentang ha neajar Yesus kerana lebeh naiutamekan ha Hukom Taurat ru adat-adat jenang rak enai. ru guru-guru Hukom Taurat naigei ku pajeh. Enai ajeh naihol ju dikdij kampug ku lengrik Galilea, lengrik Yudea, ru juga ju kote Yerusalem. Kuasa TUHAN mong ku Yesus ha perembor mai nyik. 18Ku mase ajeh mong memerip urag keral naien numom keral lumpoh ku kemil ceruk. Enai kerekwat naiha-en kek nu kateh deg ru naiha-dek kek ku ngar Yesus. 19Tapi ihad jeoi mai mong ku pajeh ru pek dapat naien muj. Kerana ajeh, naiperhuj nu kemil pelog. Enai naiterloh pelog ajeh ru naicerleh sengoi lumpoh ajeh ru iceruk betol-betol ku ngar Yesus de ku engkap mai jengoi. 20Bile Yesus Kineng iman enai ihad entoi, Kek Kiurok nu sengoi lumpoh ajeh, “Bei, dosa hek ya biampon.”

21Tapi mai Farisi ru guru-guru Hukom Taurat de mong ku pajeh mula naiserakngik, “Bokka Sengoi adeh? Kihina ha Jenang! Pek mong numom pen de buleh kiampon dosa. Had Jenang taleh de buleh!”

22Yesus Kipanei ma de naiserngik lalu Kiurok, “Yama engkeserngik begei ajeh ku kateh sengik engkek? 23Eng buleh Ngurok nu sengoi adeh, ‘Dosa hek ya biampon.’ Eng juga buleh Ngurok nu kek begei adeh, ‘Kosloh ru ciploh.’ Kek belok nanek antare nar bengwal ajeh de engkerasa senang Ngurok? 24Tapi Nghod engkepanei hal adeh: Eng Kenon Manusia bekuasa Ngampon dosa ku bumi adeh.” Lalu Yesus pen Kiurok nu sengoi de lumpoh, “Kosloh, kot ceruk hek ru jogloh!”

25Ku sarik jijeh juga sengoi de lumpoh ajeh pen kikos ku ngar mai jengoi, kikot iceruk, ru kijog nu imadeg sambel kipateh ha Jenang. 26Cengang empag enai lalu naipateh ha Jenang. Ru perasaan de sengoh naiurok, “Jik ya jineng pekare de entoi ku yah adeh!”

Yesus Kicereg Lewi

(Mat 9:9-13; Mrk 2:13-17)

27Telas ju kenjeh Yesus Kihol ru Kibakek numom pengutep cukei imuh Lewi de tengah kigigei ku tempat kenutep cukei. Yesus Kiurok nu kek, “Beiloh joi Eng.” 28Lewi pen teros kikos, kiwes dikdij hal, ru kijoi Yesus.

29Lalu Lewi kibeh caknak entoi ku ideg ha Yesus. Ku pajeh mong jeoi pengutep cukei ru mai kilek de tengah naicakcak sama. 30Mai Farisi ru guru-guru Hukom Taurat ju kumpulan mai Farisi ajeh naileunj nu pengikot-pengikot Yesus. Naiurok, “Yama engkecak ru engkengut besama ru pengutep cukei ru mai bedosa?”

31Yesus Kiberlag, “Sengoi sihat pek kiperlu ha dokte, had mai de nyik taleh. 32Eng Nghol pek Ngha-cereg ha sengoi de naianggap diri liknai ajeh mai de benar tapi Ngha-cereg ha sengoi de naiaku diri liknai ajeh mai bedosa. Ngcereg sengoi de begei ajeh supaye naibetobat.”

Tenanya tentang Hal Puase

(Mat 9:14-17; Mrk 2:18-22)

33Mai Farisi ru guru-guru Hukom Taurat ajeh naiurok nu Yesus, “Pengikot-pengikot Yohanes Pembaptis bekali-kali naibepuase ru naibedoa. Begei ajeh juga pengikot-pengikot mai Farisi. Tapi pengikot-pengikot Hek selalo naicakcak ru naingekngut!”

34Yesus Kiberlag ya perumpamaan adeh: “Bulehka engkeor tengloh naibepuase ku arik jekneg selagi penganten keral lekat mong besama ru enai? Tentuloh tok! 35Tapi doh lei imase penganten keral ajeh birampas ju enai. Ku mase ajehloh doh naibepuase.”

36Yesus Kicerite perumpamaan adeh nu enai: “Pek mong mai de kikot nucerber abat ju leknog pai lalu kitampal ku leknog manah. Amen kibeh begei ajeh, kek doh kiperusak leknog pai ajeh. Lagipen, tenampal ju abat pai ajeh pek kena ku leknog de manah. 37Begei ajeh juga, teu wain pai pek buleh bikoh nu kateh bekas getek manah. Amen hibeh begei ajeh, bekas getek ajeh doh kitateg lei teu wain pai ajeh kisaruk ru bekas getek ajeh kirusak. 38Teu wain pai hodloh bikoh nu kateh bekas getek de pai! 39Sengoi de ya kingut teu wain manah pek akan kihod teu wain pai kerana kirasa, ‘Teu wain manah lebeh bor.’ ”

Currently Selected:

LUKAS 5: AEH

Highlight

Copy