LUKAS 4

Ibles Kicuba Yesus ku Padag Guron

(Mat 4:1-11; Mrk 1:12-13)

1Yesus Kijog ju Batag arik Jordan bikuasa ya Kelog Santen. Kelog Santen Kibetek Kek nu padag guron. 2Ku pajeh, Kek bicuba ya Ibles selame 40 arik. Sepanjang mase ajeh Kek langsong pek Kicak ma-ma lei Kijadi cuag ku ipenyudah puase ajeh.

3Ibles kiurok nu Kek, “Amen Hek Kenon Jenang, orloh batu adeh kijadi ruti!”

4Yesus Kiberlag, “Ku kateh Alkitab mong bicot, ‘Manusia pek kisui ya caknak taleh.’ ”

5Lalu Ibles kien Yesus nu tempat de tinggi, ru nukember mat kiperneng nu Yesus dikdij kerajaan ku dunia. 6Ibles kiurok nu Yesus, “Eng doh ngog dikdij kuasa ru ikemuliean adeh nu Hek. Dikdij adeh ya biog nu eng ru eng berhak ngha-og nu bok-bok taleh de nghod. 7Dikdij adeh doh kijadi hak Hek amen Hasembah eng.”

8Tapi Yesus Kiberlag, “Ku kateh Alkitab mong bicot, ‘Sembahloh TUHAN Jenang engkek ru ogloh diri engkek nu Kek taleh!’ ”#Ul 6:13

9Lalu Ibles kien Yesus nu kote Yerusalem ru kidek Kek ku tempat de paleng tinggi ku kemil Deg Jenang ru kiurok nu Kek, “Amen Hek Kenon Jenang, tauloh nu kerop 10kerana ku kateh Alkitab mong bicot, ‘Jenang doh Kior Imalikat-malikat naijaga Hek.#Mzm 91:11 11Enai doh naisamut Hek ya teg enai supaye jog Hek pek kena batu.’ ”#Mzm 91:12

12Yesus Kiberlag, “Ku kateh Alkitab mong bicot, ‘Agokloh cuba TUHAN Jenang engkek.’ ”#Ul 6:16

13Telas Ibles ya selesei kicuba Yesus kiguna bebegei care, kek kidek Yesus ru kipoj peluang kilek.

Yesus Kimula Ikerjak ku Lengrik Galilea

(Mat 4:12-17; Mrk 1:14-15)

14Yesus Kijog nu lengrik Galilea ru kuasa Kelog Santen mong kibeserta Kek. Gah tentang Yesus cep nu dikdij lengrik ajeh. 15Kek Kibeajar ku deg-deg sembahyang ru Kek bipateh ya dikdij mai.

Yesus Pek Biterima ku Pekan Nazaret

(Mat 13:53-58; Mrk 6:1-6)

16Yesus Kijog nij nu pekan Nazaret tempat Kiraknak. Ku arik Sabat Yesus Kimuj nu deg sembahyang begei biasa ru Kijinjeg Kaha-baca Alkitab. 17Yesus biog kitab Nabi Yesaya. Kek Kibuka kitab ajeh, Kibakek ayat adeh ru Kibaca,

18“Kelog TUHAN mong ku eng

kerana ya Kilantek eng supaye ngperlei

Gah Bor nu mai hajap.

Kek Kingeng eng supaye ngpasal hal adeh:

Mai de bicap doh biterlas

ru mai de buta doh kibakek.

Kek Kingeng eng supaye ngterlas mai de bitindas

19ru ngpasal hal adeh:

Imase ya lei untok TUHAN Kipeselamat Isengoi-sengoi.”#Yes 61:1-2

20Telas Kibaca kitab ajeh, Yesus pen Kigulong ru Kiperjog kitab ajeh nu pekerjak deg sembahyang ru Kigei. Dikdij mai ku deg sembahyang ajeh naineng ha Kek. 21Yesus pen mula Kiurok nu enai, “Ku arik adeh, dikdij ceknot ku kateh kitab ajeh ya tejadi ku mase engkecerngai.”

22Dikdij mai naipateh ha Kek ru naikagom ha bengwal bor de hol ju Iempag ajeh. Naiurok, “Hipanei Kek ajeh kenon Yusuf.”

23Yesus Kiurok nu enai, “Ya tentu engkek doh engkeurok pepatah adeh nu Eng, ‘Dokte, perborloh diri lihek sendiri!’ Engkek doh engkeurok juga, ‘Behloh ku kampug LiHek adeh juga dikdij hal de ya Habeh ku pekan Kapernaum.’ ” 24Yesus Kiurok nij, “Cerngailoh abor, pek mong nabi biterima ku kampug ilei sendiri.#Yoh 4:44 25Cerngailoh engrok Eng adeh: Ku jaman Nabi Elia, mong jeoi kerdor balu ku lengrik Israel. Ku mase ajeh, tejadi musem hoj iluniu nik tahut setengah lei belaku cengwag de ihad terok ku dikdij lengrik ajeh.#1 Raj 17:1 26Hamapen begei ajeh, Jenang pek Kingeng Nabi Elia nu belok-belok kerdor balu ajeh, tapi Kek Kingeng Nabi Elia nu numom kerdor balu de kigei ku pekan Sarfat ku kawasan kote Sidon.#1 Raj 17:8-16 27Begei ajeh juga, ku jaman Nabi Elisa, mong jeoi mai de benyaknik kuste ku lengrik Israel. Tapi pek mong numom pen de biperbor kecuali Naaman mai Syria ajeh.”

28Dikdij mai ku kateh deg sembahyang ajeh ihad naibelal bile naicerngai tentang hal ajeh. 29Enai naikos ru naisaher Yesus nu luar pekan Nazaret ru naien Yesus nu tumpog lod naiha-julat Kek nu kateh terap. Pekan ajeh bibeh ku tumpog lod. 30Tapi Yesus teros Kicip ku engkap mai jengoi langsong Kiet ju kenjeh.

Sengoi de Bisangrog ya Nyanik

(Mrk 1:21-28)

31Lalu Yesus Kiet nu pekan Kapernaum ku lengrik Galilea. Kek Kibeajar mai ku arik Sabat. 32Dikdij mai de ceringai ha Kek cengang empag enai ha Ineajar kerana Ineajar ajeh bekuasa. 33Ku kateh deg sembahyang mong numom sengoi bisangrog ya nyanik. Kek kiwig ru suara de kuat ru kiurok, 34“Hei Yesus Mai Nazaret! Ma Habeh nu jik? Haha-pebinasa ha jikka? Jik jipanei Hek adeh bok. Hek Mai Suci de bingeng ya Jenang!”

35Tapi Yesus Kitengking ha nyanik ajeh, “Kerakdik! Hol ju sengoi adeh!” Telas ajeh nyanik teros kiberkol sengoi ajeh ku ngar mai jengoi ru teros kihol tapi pek kipecedere berog sengoi ajeh.

36Mai jengoi cengang empag enai ru naibelwal ratak liknai, “Wah, Ibengwal ihad bekuasa! Bile Kiperintah, nyanik-nyanik pen naihol!” 37Gah tentang Yesus gucep nu jap-jap tempat de rek beg pekan Kapernaum.

Yesus Kiperbor Jenak Simon Petrus ru Sengoi Jengoi

(Mat 8:14-17; Mrk 1:29-34)

38Yesus Kihol ju deg sembahyang ru Kiet nu deg Simon. Jenak Simon tengah kinyik bengket de ihad terok, jadi mai jengoi ku pajeh naisemanj tenulog ju Yesus. 39Yesus Kiterbuk nu kek de nyik ajeh ru Kiperintah nyaknik bengket hol ju kek. Lalu inyaknik pen kibor ru ku sarik ajeh kikos, kilayan ha mai jengoi de mong ku pajeh.

40Mase mat arik kiceleh, mai jengoi naien mai de nainyik bebegei jenis nyaknik nu Yesus. Yesus Kidek Iteg ku kemil jap-jap liknai ru Kiperbor enai. 41Nyanik-nyanik naihol ju mai jengoi ru naiwig, “Hekloh Kenon Jenang!” Tapi, ru ihad tegas Yesus Kiget nyanik-nyanik ajeh naibelwal kerana naipanei Kekloh Peselamat de bijanji ya Jenang.

Yesus Kibeajar ku Pekan-pekan Kilek

(Mrk 1:35-39)

42Bile mat arik ya merek kaha-hol, Yesus Kihol ju pekan ajeh ru teros Kiet nu nanek tempat de serakngek. Mai jengoi naikek ha Kek. Bile ya naiburuk Kek, naiterhan Kek supaye pek Kidek enai. 43Tapi Yesus Kiurok nu enai, “Ku pekan-pekan kilek juga hod Ngperlei Gah Bor tentang begeiharok Jenang Kimemerintah sebegei Raja kerana Eng bingeng untok Ngha-beh tugas ajeh.”

44Lalu Kek Kiperlei Gah Bor ku deg-deg sembahyang ku lengrik Yudea.

Currently Selected:

LUKAS 4: AEH

Highlight

Copy