LUKAS 24

Yesus Kikos ju Idanan

(Mat 28:1-10; Mrk 16:1-8; Yoh 20:1-10)

1Ku ipepegelap arik Minggu, mai kekerdor naiet nu penep naien rempah de ya naisedia. 2Bile ya nailei nu majeh, naibakek batu tenutop penep ya tegulek. 3Naimuj nu ikateh tapi pek naiburuk mayat Tuhan Yesus. 4Sementare naikerek tentang hal ajeh, aleh-aleh naineng ku beg enai mong nar mom sengoi. Leknog ubai becahaya. 5Kekerdor ajeh ihad naisengoh lalu naisujod nu matik. Ubai ajeh pen baiurok nu enai, “Yama engkekek mai sui ku engkap mai dat? 6Kek pek mong ku padeh. Kek ya Kikos ju Idanan! Ingatloh ma de ya Kiurok nu engkek entemjeh mase Kek mong besama ru engkek ku lengrik Galilea. 7Kek Kiurok, ‘Eng Kenon Manusia mesti biserah nu teg mai de bedosa. Eng doh bisaleb ru ku inik arik doh Ngkos nij ju danan.’ ”#Mat 17:22-23; Mrk 8:31; Luk 9:22 8Telas ajeh baruloh kekerdor ajeh naiteingat ha engrok Yesus ajeh.

9Telas naijog ju penep, enai naipasal dikdij hal ajeh nu 11 urag rasul Yesus ru pengikot-pengikot de kilek. 10Kekerdor ajeh nek Maria mai Magdalena, Yohana, Maria amek Yakobus, ru kekerdor kilek juga. Enai naipasal hal ajeh nu rasul-rasul. 11Tapi rasul-rasul ajeh naipiker kekerdor ajeh naibegunjak. Jadi, pek naipecaya ha penasal enai ajeh. 12Tapi Petrus kikos ru kijar nu penep. Kek kingop kineng nu kateh penep ru kibakek had abat benalot mai dat taleh de mong ku pajeh. Kek kiet ju kenjeh ru kikerek entah ma de ya belaku.

Kateh Ceknip nu Kampug Emaus

(Mrk 16:12-13)

13Ku arik ajeh juga, nar mom pengikot Yesus baicip nu kampug Emaus. Inyaknak lebeh kurang tujoh batu ju kote Yerusalem. 14Ku kateh ceknip ubai ajeh, baibelwal tentang dikdij hal de ya belaku. 15Mase baibelwal ru baibebincang ratak liubai tentang hal ajeh, Yesus Kiperek ru Kicip besama ru ubai. 16Ubai baibakek Yesus tapi pek baicam ha Kek. 17Yesus Kitanya nu ubai, “Hal ma de jerkebual ku kateh ceknip jerkek adeh?”

Ubai behenti ru renes ubai kijadi sedeh. 18Numom ju ubai ajeh de imuh Kleopas kitanya nu Yesus, “Ku engkap sengoi-sengoi de melawat kote Yerusalem ku arik Raya Paskah, had Hek halei taleh de pek bepanei ma de ya belaku pai-pai adeh.”

19Yesus Kitanya, “Ma de ya belaku?”

Ubai berlag, “Hal-hal tentang Yesus Mai Nazaret ajeh. Kek numom nabi. Ku ngar Jenang ru mai jengoi, Kek bekuasa ku Iengrok ru Ibahneh. 20Tapi raknak-raknak imam agame Yahudi ru pemimpen-pemimpen bangse jik naiserah Kek bihukom dat lalu naisaleb Kek. 21Jik ya jibeharap nu Kek kerana jisangka Kekloh Sengoi de doh Kiterlas bangse Israel ju musoh-musoh jik. Lagi pen arik adeh arik de ketige telas dikdij hal ajeh kibelaku. 22Lagi nij, memerip urag kekerdor ju kumpulan jik naibeh jik kekjet. Ku ipepegelap adeh, enai naiet nu penep 23ru pek naiburuk mayat Yesus. Naiurok naikep nanek nengneng ru ku nengneng ajeh mong malikat-malikat de baipasal Yesus ya Kisui. 24Lalu memerip urag kekawat jik naiet nu penep ru naineng hal-hal de sama begei de bipasal ya kekerdor ajeh tapi pek naiburuk Yesus.”

25Telas ajeh Yesus Kiurok nu ubai, “Jerkek adeh ihad imenudoh ru inelingah jerkeha-pecaya dikdij hal de bipasal ya nabi-nabi! 26Sepatotnye ya jerkepanei tentang hal adeh: Peselamat de bijanji ya Jenang mimang patot Kikena dikdij seniksa ajeh, telas ajeh Kimuj nu Ikemuliean ku serga.” 27Telas ajeh Yesus Kipeterang nu ubai ma de ya bicot tentang Kek ku kateh Alkitab, mula ju Hukom Taurat Musa leiloh nu dikdij kitab nabi-nabi kilek.

28Bile ubai ya rek nu kampug de baituju ajeh, baineng Yesus begei Kaha-peteros Iceknip. 29Tapi ubai terhan Kek ru baiurok, “Geiloh besama ru jar ku padeh kerana mat arik ya kiceleh, lagi pen iarik ya gukelem.” Jadi, Yesus pen Kigei besama ru ubai. 30Mase Kigei cerner ku mije Kicakcak besama ru ubai, Kek Kikot ruti, Kiucap syukor lalu Kiceh ruti ajeh ru teros Kiog nu ubai. 31Telas ajeh baruloh baicam Sengoi ajeh Yesus, tapi aleh-aleh Kek nyep ju nengneng ubai. 32Ubai belwal ratak liubai, “Patotloh semangat har kihuj mase Kibelwal ru Kipeterang Alkitab nu har ku kateh ceknip hik ajeh!”

33Ku sarik jijeh juga, ubai pen baikos ru baijog nu kote Yerusalem. Ku pajeh baiburuk 11 urag rasul naibekumpol besama ru pengikot-pengikot de kilek. 34Baiurok, “Mimang betol Tuhan ya Kikos ju Idanan ru ya Kiperneng Idiri nu Simon Petrus!”

35Lalu baicerite dikdij ma de ya belaku ku kateh ceknip ubai ru begeiharok baicam Yesus mase Kiceh ruti.

Yesus Kiperneng Idiri nu Ipengikot-pengikot

(Mat 28:16-20; Mrk 16:14-18; Yoh 20:19-23; Kis 1:6-8)

36Tengah naibelwal tentang hal ajeh, aleh-aleh Yesus Kijinjeg ku semakdek enai ru Kiurok, “Semoge Jenang Kiog neaman nu engkek!”

37Enai naikekjet ru ihad naisengoh kerana naisangka naibakek nyanik. 38Lalu Yesus Kiurok nu enai, “Yama engkesengoh? Yama sengik engkek kiragu-ragu? 39Neng adeh teg ru jog Eng. Adehloh Eng! Peploh ru nengloh kerana nyanik pek mong isej ru ijeag tapi Eng mong!”

40Telas Yesus Kiurok begei ajeh, Kek Kiperneng Iteg ru Ijog nu enai. 41Enai lekat pek naipecaya kerana ihad naikerakmik ru cengang empag enai. Yesus Kiurok nu enai, “Mongka caknak ku padeh?” 42Jadi, naiog nukengrat kak de ya cet nu Kek. 43Yesus pen Kikot ru teros Kicak ku ngar mat enai.

44Telas ajeh Yesus Kiurok nu enai, “Mase Eng besama ru engkek entem, ya Ngurok nu engkek begei adeh: Dikdij hal de ya bicot tentang Eng ku kateh Hukom Taurat Musa, ku kateh kitab nabi-nabi, ru ku kateh kitab Mazmur ajeh mesti tejadi.”

45Lalu Yesus Kibuka peniker enai supaye naireti dikdij hal de ya bicot tentang Kek ku kateh Alkitab. 46Yesus Kiurok nu enai, “Begei de ya bicot, Peselamat de bijanji ya Jenang mesti bipesiksa lei Kidat tapi Kikos ju Idanan ku inik arik. 47Lalu Gah Bor doh biperlei ku kateh muh Kek, mula ju kote Yerusalem leiloh nu dikdij bangse supaye naibetobat ru dosa-dosa enai biampon. 48Engkekloh isaksi ha dikdij hal adeh. 49Eng doh Ngngeng nu engkek Kelog Santen de ya bijanji ya Menek Eng. Tapi hod engkegei ku kateh kote adeh leiloh engkebipelengkap ya kuasa ju Jenang.”

Yesus Biangket nu Serga

(Mrk 16:19-20; Kis 1:9-11)

50Telas ajeh Yesus Kien Ipengikot-pengikot nu kawasan de rek beg kampug Betania. Ku pajeh Kiangket Iteg ru Kiberkat enai. 51Mase Kiberkat enai, Kek Kidek enai ru biangket nu serga. 52Ipengikot-pengikot naisembah Kek, telas ajeh naijog nu kote Yerusalem ru sengik de ihad suka. 53Enai sentiase mong ku laman Deg Jenang ru naipateh ha Jenang.

Currently Selected:

LUKAS 24: AEH

Highlight

Copy