YOHANES 20

Penep de Kusong

(Mat 28:1-8; Mrk 16:1-8; Luk 24:1-12)

1Ku pepegelap arik Minggu, mase iarik lekat guer, Maria mai Magdalena kiet nu penep ru kibakek batu tenutop ya bigulek ju penep ajeh. 2Jadi, kek kijerjar kikek Simon Petrus ru pengikot de bihok ya Yesus lalu kiurok nu ubai, “Mayat Guru ya bikot ju penep ru pek jipanei ku belok Imayat bidek!”

3Jadi, Petrus ru pengikot de kilek ajeh baiet nu penep Yesus. 4Ubai baijar tapi pengikot de kilek ajeh kijar canuk ju Petrus ru kilei awal ku penep. 5Kek kingop kineng nu kateh penep ru kibakek abat benalot mai dat taleh ku pajeh tapi pek kimuj nu kateh penep ajeh. 6Simon Petrus de keknit teros kimuj nu kateh penep ajeh ru kibakek abat benalot 7ru abat tenutop kui Yesus. Abat ajeh bilipat aseg ju abat benalot. 8Telas ajeh pengikot de kilei canuk nek juga kimuj nu kateh penep. Kek kineng dikdij ajeh ru kipecaya Yesus ya Kikos ju Idanan. 9(Ku mase ajeh, ubai pekseg baireti tentang hal adeh: Alkitab kipasal Yesus hod Kikos ju Idanan.) 10Lalu nar mom pengikot Yesus ajeh pen baijog.

Yesus Kiperneng Ilei nu Maria Mai Magdalena

(Mat 28:9-10; Mrk 16:9-11)

11Maria mai Magdalena kijinjeg ru kijap ku ngar penep Yesus. Sambel kijap, kek kingop kineng nu kateh penep ajeh. 12Kek kibakek nar mom malikat de beleknog biyeg. Nanek kigei ku bahagian kui ru nanek nij ku bahagian jog tempat mayat Yesus biperdak canukjeh. 13Malikat-malikat ajeh baitanya nu kek, “Yama hajinjap?”

Maria kiberlag, “Mayat Guru eng ya bikot ru pek ngpanei ku belok bidek!”

14Telas kiurok begei ajeh, Maria kiceleg nu icelod ru kibakek Yesus Kijinjeg ku pajeh. Tapi Maria pek kicam ha Yesus. 15Yesus Kitanya nu kek, “Yama hajinjap? Bok de hakek?”

Maria kisangka mai ajeh pekerjak taman, jadi kiurok, “Tuan, amen jenkot mayat Yesus, pasalloh ku belok jendek mayat ajeh supaye buleh ngnyong.”

16Yesus Kiurok nu kek, “Maria!”

Maria kiceleg nij ru kicam ha Yesus lalu kiurok kateh engrok Ibrani, “Rabbuni!” (imaksod, guru).

17Yesus Kiurok nu kek, “Agok pegag Eng kerana pekseg Ngjog nu Menek. Etloh nu pengikot-pengikot Eng ru pasalloh nu enai begei adeh: ‘Eng Ngha-jog nu Menek hik, nu Jenang hik.’ ”

18Kerana ajeh, Maria kiterbuk nu pengikot-pengikot Yesus ru kipasal ya kibakek Tuhan. Kek kipasal juga dikdij ma de Tuhan Kiurok nu kek.

Yesus Kiperneng Idiri nu Ipengikot-pengikot

(Mat 28:16-20; Mrk 16:14-18; Luk 24:36-49)

19Hal ajeh kitejadi ku arik Minggu, ru ku kelem ajeh pengikot-pengikot Yesus naibekumpol ku nanek deg de naikunci ipintu kerana naisengoh ha pemimpen-pemimpen mai Yahudi. Ku mase ajeh, Yesus Kihol ru Kijinjeg ku semakdek enai ru Kiurok, “Semoge Jenang Kiog neaman nu engkek!” 20Telas Kiurok begei ajeh, Kek Kiperneng Iteg ru Iceres nu enai. Bile naineng ha Tuhan, enai naikerakmik. 21Lalu Yesus Kiurok nij, “Semoge Jenang Kiog neaman nu engkek! Begei Menek Kingeng Eng, begei ajeh juga Eng Ngngeng engkek hunen.” 22Telas Kiurok begei ajeh, Yesus Kiterlas Ilehem nu enai ru Kiurok, “Terimaloh Kelog Santen. 23Amen engkek ampon dosa mai, dosa enai ajeh biampon ya Jenang. Amen pek engkek ampon dosa enai, dosa enai pek biampon ya Jenang.”

Yesus ru Tomas

24Mase Yesus Kihol, Tomas (de bigelar Kerbar) pek mong ku pajeh. Kek ajeh numom ju 12 urag pengikot Yesus. 25Kerana ajeh, pengikot-pengikot kilek naipasal nu kek, “Jik ya jineng Tuhan!”

Tapi Tomas kiberlag, “Amen pek ngneng dil paku ku Iteg ru ngcucok jari eng ku dil Iteg ru Iceres ajeh, eng pek ngpecaya.”

26Seminggu ju kenjeh, pengikot-pengikot Yesus naibekumpol nij ku deg ajeh ru Tomas pen mong ku pajeh. Dikdij pintu naikunci tapi Yesus Kihol ru Kijinjeg ku semakdek enai lalu Kiurok, “Semoge Jenang Kiog neaman nu engkek!” 27Telas ajeh Yesus Kiurok nu Tomas, “Nengloh teg Eng, cucok jari hek ku padeh. Surongloh teg hek ru cucok ceres Eng. Agokloh ragu-ragu nij tapi pecayaloh!”

28Tomas kiurok nu Yesus, “Jen betol-betol Tuhan ru Jenang Eng!”

29Telas ajeh Yesus Kiurok nu kek, “Hapecaya kerana ya haneng Eng. Jenang Kiberkat sengoi de kipecaya hamapen pek kineng Eng!”

Tujuan Kitab Adeh

30Mong jeoi nij tanda ajaib kilek de bibeh ya Yesus ku ngar Ipengikot-pengikot tapi pek bicot ku kateh kitab adeh. 31Tapi kitab adeh bicot supaye engkepecaya tentang hal adeh: Yesus ajeh Kenon Jenang ru Kek ajeh Peselamat de bijanji ya Jenang. Kitab adeh bicot supaye engkepecaya ru engkekep sinui de lei ditehjeh ku kateh Imuh.

Currently Selected:

YOHANES 20: AEH

Highlight

Copy