YOHANES 19

1Lalu Pilatus kikot Yesus ru kior iaska-aska nairempet Kek. 2Aska-aska ajeh naibeh mahkote ju cag-cag bejerlak ru naiperlog ku kui Yesus. Naiperlog juga jubah ungu ku Iberog. 3Bekali-kali naiperek nu Kek ru naiurok, “Daulat Raja mai Yahudi!” ru naitampar Kek.

4Pilatus kihol nukali nij ru kiurok nu mai Yahudi ku pajeh, “Neng, eng doh ngen Yesus nu luar supaye engkepanei pek ngkep ma-ma pen Isenalah ngha-hukom Kek.” 5Lalu Yesus biperhol lekat Kilog mahkote bejerlak ru jubah ungu. Pilatus kiurok nu enai, “Neng, adehloh Ilei!”

6Bile raknak-raknak imam agame Yahudi ru pengawal-pengawal Deg Jenang naineng Yesus, naihai, “Saleb Kek! Saleb Kek!”

Pilatus kiurok nu enai, “Kotloh Kek! Liengkek sendiri besaleb Kek kerana eng pek ngbakek ma-ma pen Isenalah lei ngha-hukom Kek.”

7Dikdij pemimpen-pemimpen Yahudi ku pajeh naiberlag, “Amen hijoi hukom jik, Kek hod bihukom dat kerana Kiurok Ilei ajeh Kenon Jenang.”

8Bile Pilatus kicerngai engrok enai ajeh, kek kigu-sengoh. 9Lalu baimuj nu kateh ru Pilatus kitanya nu Yesus, “Ju belok Hahol?”

Tapi Yesus pek Kiberlag ma-ma pen. 10Pilatus kiurok nu Kek, “Hanyek pasal ma-maka nu eng? Hek hod Hapanei eng mong kuasa ngha-terlas atao ngha-saleb Hek.”

11Yesus Kiberlag, “Hek pek mong kuasa haha-beh ma-ma pen nu Eng amen Jenang pek Kiog kuasa ajeh nu hek. Kerana ajeh, dosa sengoi de kiserah Eng nu hek lebeh entoi daripade dosa hek.”

12Bile Pilatus kicerngai berenglag Yesus ajeh, kek kikerekwat kaha-terlas Yesus. Tapi pemimpen-pemimpen mai Yahudi ku pajeh naihai, “Bok imai de kiurok ilei raja, kek kilawan raja kerajaan Rom! Jadi, amen haterlas Kek, hek juga halawan raja kerajaan Rom!”

13Bile Pilatus kicerngai engrok ajeh, kek kien Yesus nu luar lalu kigei ku kerusi hakem de mong ku tempat de bisebot Ris Batu. Ku kateh engrok Ibrani, tempat ajeh bisebot Gabata.

14Dikdij hal ajeh belaku ku tengah arik, nuarik sebelom Arik Raya Paskah. Pilatus kiurok nu mai Yahudi ku pajeh, “Adehloh raja engkek!”

15Lalu naihai, “Perdat Kek! Perdat Kek! Saleb Kek!”

Pilatus kitanya, “Engkehod eng saleb raja engkek?”

Raknak-raknak imam agame Yahudi naiberlag, “Had raja kerajaan Rom taleh raja jik!”

16Jadi, Pilatus pen kiog Yesus nu enai supaye bisaleb. Enai pen naikot Kek ru naien Kek ju kenjeh.

Yesus Bisaleb

(Mat 27:32-44; Mrk 15:21-32; Luk 23:26-43)

17Yesus Kigulap Isaleb, bien cip nu tempat de bisebot Tempat Tarong Kui ku luar kote Yerusalem. (Ku kateh engrok Ibrani, tempat ajeh imuh Golgota.) 18Ku pajehloh Kek bisaleb. Mong juga nar mom mai kilek de bisaleb ku pajeh. Numom ku Ikentop, numom nij ku Ikengwil, ru Yesus ku isemakdek. 19Pilatus kior papat bipahat ku jehuk kalag Yesus. Papat ajeh beceknot: “Yesus Mai Nazaret, Raja mai Yahudi.” 20Jeoi mai Yahudi naibaca ceknot ku papat ajeh kerana tempat ajeh rek ju kote Yerusalem ru iceknot ajeh ku kateh engrok Ibrani, Latin, ru Yunani. 21Raknak-raknak imam agame Yahudi naiurok nu Pilatus, “Agokloh cot ‘Raja mai Yahudi’ tapi cotloh ‘Sengoi adeh Kiaku Ilei ajeh Raja mai Yahudi.’ ”

22Tapi Pilatus kiberlag, “Ma de ya ngcot ajeh, ya ngcot!”

23Telas aska-aska ajeh naisaleb Yesus, naikot Ileknog lalu naibahagi empat ru memaseg liknai naikep nanek. Enai juga naikot Ijubah de bibeh ju nuhenglei abat de pek bicig. Abat ajeh bikaet ya sengrai ju kemil lei nu kerop. 24Aska-aska ajeh naibelwal ratak liknai, “Agok ceg jubah adeh. Bei hicabot undi untok hipileh bok de kekkep jubah adeh.” Hal ajeh belaku supaye ma de bicot ku kateh Alkitab kitejadi,

“Enai bahagi leknog Eng

ru naibecabot undi ha jubah Eng.”

Begei ajehloh de bibeh ya aska-aska ajeh.#Mzm 22:19

25Amek Yesus, numom beradek kerdor amek Yesus, Maria kenah Klopas, ru Maria mai Magdalena naijinjeg rek beg saleb ajeh. 26Yesus Kibakek Iamek ru pengikot de Kihok baijinjeg ku pajeh. Yesus Kiurok nu Iamek, “Jen, ajehloh kenon jen.”

27Telas ajeh Yesus Kiurok nu Ipengikot de Kihok ajeh, “Ajehloh amek hek.” Sejak ju kenjeh, pengikot ajeh kien amek Yesus nu imadeg ru kipejadi amek Yesus iperingak.

Danan Yesus

(Mat 27:45-56; Mrk 15:33-41; Luk 23:44-49)

28Lalu Yesus Kipanei Kek ya Kiseryap dikdij Ikerjak ru Kipanei juga ma de bicot ku kateh Alkitab hod kitejadi. Jadi Kiurok, “Nghaos.”

29Ku pajeh mong nanek mangkok de tebeg ya teu wain de ya keer. Aska-aska ajeh naikot nanek spanj ru naicerlog nu kateh teu wain ajeh lalu naicucok ku mol batag jehuk hisop. Telas ajeh naiulur nu empag Yesus.#Mzm 69:22 30Yesus Kilod teu wain ajeh lalu Kiurok, “Ya dij.”

Telas ajeh Kek Kitundok Ikui lalu Kek pen Kitawes.

Yesus Bicog

31Arik de Yesus Kidat ajeh, nuarik sebelom arik Sabat#19:31 Arik Sabat: Ku mai Yahudi, arik Sabat kimula dari dui Jumaat lei nu dui Sabtu. Nuarik sebelom arik Sabat ajeh arik Jumaat. de istimewe ku Arik Raya Paskah. Pemimpen-pemimpen mai Yahudi nainyek lekat mong mayat ku jehuk kalag ku arik Sabat. Kerana ajeh, naisemanj nu Pilatus supaye jog rimnik sengoi de bisaleb ajeh bibergot supaye deras naidat ru berog-berog enai bicerleh ju jehuk kalag sebelom arik Sabat.#Ul 21:22-23 32Kerana ajehloh, aska-aska naiet ru naibergot canuk jog nar mom sengoi de bisaleb englag Yesus. 33Bile nailei nu Yesus, naineng Kek ya dat. Kerana ajeh, pek naibergot Ijog. 34Tapi numom ju aska ajeh kicog ceres Yesus ru tombak. Hol behip ru teu ju kenjeh.

35(Eng Yohanes de nengneng dikdij hal ajeh ngpasal nu engkek ma de tejadi supaye engkek pen engkepecaya. Eng ngpanei penasal eng ajeh betol.)

36Hal-hal ajeh belaku supaye ma de bicot ku kateh Alkitab kitejadi, “Pek nanek pen ju Ijeag doh bibergot.”#Kel 12:46; Bil 9:12; Mzm 34:21 37Ku kateh Alkitab mong juga bicot, “Enai doh naineng nu Kek de naicog.”#Za 12:10; Why 1:7

Yesus Bicop

(Mat 27:57-61; Mrk 15:42-47; Luk 23:50-56)

38Telas ajeh Yusuf mai Arimatea kisemanj nu Pilatus kaha-kot mayat Yesus. (Yusuf ajeh pengikot Yesus tapi pek kipasal nu bok-bok pen kerana kisengoh ha pemimpen-pemimpen mai Yahudi.) Telas Pilatus kiog, Yusuf pen kiet ru kikot mayat Yesus. 39Mong numom de kijoi Yusuf, imuh Nikodemus de entem pernah kihol nu Yesus mase ikenglem. Nikodemus kien cenampor mur ru lidah buaye ijengoi kira-kira 30 kilo. 40Ubai baikot mayat Yesus lalu baibalot ya abat benalot mai dat ru cenampor ajeh nek. Ubai baisedia mayat Yesus baijoi adat mai Yahudi. 41Ku tempat Yesus bisaleb, mong nanek taman. Ku kateh taman ajeh, mong nanek penep pai de pekseg biguna de bikurek ku kateh lod batu. 42Ubai baidek mayat Yesus ku pajeh kerana arik Sabat ya kaha-mula ru penep ajeh pen rek.

Currently Selected:

YOHANES 19: AEH

Highlight

Copy