KISAH 21

Paulus Kiet nu Kote Yerusalem

1Telas jiceraklah ru pemimpen-pemimpen jemaah ju kote Efesus ajeh, jik teros jibelayar nu Pulau Kos. Ku ihuper, jilei ku Pulau Rodes. Ju kenjeh nij jibelayar nu kote Patara. 2Ku pajeh jibakek kapal de kaha-belayar nu kawasan Fenisia. Jihuj nu kapal ajeh lalu jibelayar nij. 3Jibakek Pulau Cyprus ku englag kengwil jik. Kapal ajeh teros kibelayar nu lengrik Syria ru jibehenti ku kote Tirus kerana ku pajeh kapal ajeh kipunggah iarap. 4Ku pajeh jisueg pengikot-pengikot Yesus ru jigei besama ru enai iluniu seminggu. Enai naiget Paulus et nu kote Yerusalem kerana Kelog Santen ya Kipasal nu enai Paulus doh bisiksa ku pajeh. 5Tapi bile ya lei imase, jik pen jipeteros ceknip. Dikdij pengikot Yesus ru kenon-kenah enai naingeng jik lei nu luar kote. Ku beg pantei dikdij lijik jibelutot lalu jibedoa. 6Telas jibesalam ru enai, jihuj nu kapal ru enai pen naijog nu madeg.

7Jipeteros ceknip ru jibelayar ju kote Tirus nu kote Ptolemais. Ku pajeh jiperlei salam nu sesedara seiman. Jigei besama ru enai iluniu nuarik. 8Ku ihuper jibelayar nij lalu jilei ku kote Kaisarea. Ku pajeh jigei ku deg numom penginjil imuh Filipus. Kek numom ju tujoh urag de bipileh ha tenulog rasul-rasul ku kote Yerusalem.#Kis 6:5-6 9Kek mong empat urag kenon menaleh de mong kurnie naiperlei bengsat Jenang. 10Telas ya jigei memerip arik ku pajeh, numom nabi de imuh Agabus kihol ju lengrik Yudea.#Kis 11:28 11Kek kiterbuk nu jik ru kikot cengkot wog Paulus lalu kibeg iteg ru ijog. Kek kiurok, “Adehloh de bipasal ya Kelog Santen: Ilei de punya cengkot wog adeh doh bibeg begei adeh ya pemimpen-pemimpen mai Yahudi ku kote Yerusalem ru enai doh naiserah kek nu mai pek Yahudi.”

12Bile jicerngai ha bengwal ajeh, jik ru pengikot-pengikot Yesus ku kote Kaisarea jisemanj supaye Paulus pek kiet nu kote Yerusalem. 13Tapi Paulus kiberlag, “Yama engkejap begei adeh lei engkebeh sengik eng sedeh? Eng ya ngbesedia pek taleh baha-beg ku Yerusalem, tapi juga ngha-dat ku pajeh ha Tuhan Yesus.”

14Kerana Paulus pek kaha-cerngai ha engrok jik, jik pen pek jibual ma-ma nij. Jiurok, “Biarloh heknod Tuhan de kitejadi.”

15Telas memerip iluniu jigei ku pajeh, jisekyap lalu jiet nu Yerusalem. 16Memerip urag pengikot Yesus ju kote Kaisarea naingeng jik nu deg Manason kerana jik doh jibet ku ideg. Manason ajeh ju Pulau Cyprus ru ya liu kijadi pengikot Yesus.

Paulus Kisueg Yakobus

17Bile jilei nu kote Yerusalem, sesedara seiman ku pajeh naisamut jik ru keremmik. 18Ku ihuper, jik ru Paulus jiet jisueg Yakobus.#21:18 Yakobus: Adeh menang Yesus. Dikdij pemimpen-pemimpen jemaah pen mong ku pajeh. 19Telas Paulus kiog salam nu enai, kek kipasal tentang dikdij hal ju ikerenjak de ya bibeh ya Jenang ku engkap mai pek Yahudi. 20Telas naicerngai ha penasal Paulus, dikdij liknai naipateh ha Jenang. Lalu naiurok, “Sedara Paulus, cerngailoh! Ku padeh mong beribu urag mai Yahudi de ya naipecaya nu Yesus. Enai setie naitaat nu Hukom Taurat. 21Tapi naicerngai gah adeh: Hek haajar mai Yahudi de naigei ku engkap mai pek Yahudi untok pek naijoi Hukom Taurat Musa, pek naisunat kekenon enai, ru pek naijoi ha adat mai Yahudi. 22Ma de hiha-beh hunen? Tentu doh naicerngai ya hahol nu madeh. 23Jadi, behloh ma de jipasal nu hek. Ku padeh mong empat urag de ya naibejanji nu Jenang. 24Enloh enai ru behloh upacare pembersehan besama ru enai. Tanggongloh benayar korban enai supaye buleh nailoj sog enai. Amen habeh begei ajeh, dikdij sengoi doh naipanei gah de naicerngai tentang hek ajeh pek betol kerana hek hataat nu Hukom Taurat. 25Tapi mengenai mai pek Yahudi de naipecaya nu Yesus, jik ya jingeng nanek surat keputusan lijik nu enai. Enai pek buleh naicak caknak de ya bijamu nu behala, behip, sej binatag de dat bicekeg, ru hod naipernyak diri liknai ju bahneh seks de niknej.”#Kis 15:29

26Kerana ajeh, ku ihuper Paulus ru empat urag sengoi ajeh naiet ru naibeh upacare pembersehan besama. Telas ajeh Paulus kimuj nu laman Deg Jenang ru kipasal nu imam agame Yahudi tentang arik ma upecare enai ajeh doh kiselesei. Paulus kipasal juga enai doh naipesembah korban liknai memaseg ku arik ajeh.

Paulus Bicap ku Laman Deg Jenang

27Bile mase tujoh arik ya merek kaha-dij, memerip urag mai Yahudi ju lengrik Asia naibakek Paulus ku kateh laman Deg Jenang. Naihasot ha mai jengoi lalu naicap Paulus. 28Naicereg ru ihad kuat, “Mai Israel, tulog jik! Adehloh isengoi de kiet nu jap-jap tempat ru kiajar dikdij sengoi supaye nailawan ha bangse Israel, ha Hukom Taurat, ru ha Deg Jenang adeh. Kek juga kien mai Yunani nu kateh laman Deg Jenang! Kek ya kipecemar tempat de suci adeh!” 29(Naiurok begei ajeh kerana ya naibakek Trofimus mai Efesus besama ru Paulus ku kote Yerusalem. Naisangka Paulus ya kien kek nu kateh laman Deg Jenang.)#Kis 20:4

30Seluroh kote ajeh kijadi kacau. Dikdij sengoi naijar nu Paulus, naicap, ru naisaher kek hol ju laman Deg Jenang. Ku sarik jijeh juga, dikdij pintu laman Deg Jenang bitutop. 31Sementare perusoh-perusoh ajeh naikerekwat naiha-perdat Paulus, komanden aska Rom pen bipasal tentang kenacau ku seluroh kote Yerusalem. 32Ku sarik jijeh juga, komanden kien memerip urag pegawei ru iaska-aska lalu naijar nu tempat de kacau ajeh. Bile perusoh-perusoh ajeh naineng ha komanden ru iaska-aska, enai pen naibehenti pet ha Paulus. 33Komanden ajeh kiperek nu Paulus lalu kicap kek ru kior Paulus bibeg ya nar rantei. Komanden ajeh kitanya, “Bok sengoi adeh? Ma de ya kibeh?” 34Mai engleg naihai begei adeh, ru mai engleg nij naihai begei ajeh. Tempat ajeh ihad kacau lei komanden ajeh pek kipanei ma de ya betol-betol kibelaku ku pajeh. Jadi, kek kior iaska-aska naien Paulus nu kateh kubu. 35Bile ya lei nu rangkal, aska-aska ajeh tepaksa naigulap Paulus kerana mai jengoi de merusoh ajeh ihad naiberiknos. 36Perusoh-perusoh ajeh naijoi sambel naihai, “Perdat kek!”

Paulus Biog Belwal

37Bile Paulus baha-en muj nu kubu, kek kiurok nu komanden ajeh, “Bulehka ngbelwal ru hek?”

Komanden ajeh kiurok, “Paknyakneh hek hapanei belwal engrok Yunani! 38Eng ngsangka hek adeh mai Mesir de entem hapemula kenacau ru hapimpen empat ribu urag mai jehat de besenjata ru engkeet nu padag guron.”

39Paulus kiurok, “Tok! Eng mai Yahudi de ngyos ku kote Tarsus ku lengrik Kilikia. Eng sengoi ju kote de penteng ajeh. Ogloh ngbelwal nu mai jengoi adeh.”

40Bile komanden ajeh kiog kek belwal, Paulus kijinjeg ku rangkal lalu kiog neuta ya iteg supaye mai jengoi naikerakdik serakngek. Bile ya sengek, Paulus pen kibelwal nu enai kateh engrok Ibrani.

Currently Selected:

KISAH 21: AEH

Highlight

Copy