KISAH 22

Paulus Kibelwal nu Mai Yahudi ku Kote Yerusalem

1Paulus kiurok, “Sesedara, cerngailoh! Eng ngha-bernang diri lieng.” 2Bile naicerngai Paulus kibelwal kateh engrok Ibrani, enai pen naikerakdik ihad sengek. Paulus kipeteros nij ibengwal,

3“Eng mai Yahudi, biperyos ku kote Tarsus ku lengrik Kilikia, bibela ku kote Yerusalem ru ngjadi mureb Gamaliel.#22:3 Gamaliel: Gamaliel ajeh guru Hukom Taurat de ihad bihormat ya dikdij mai Yahudi. Eng biajar ihad cermat tentang hukom agame jenang rak hik ru ngpehambe diri eng nu Jenang begei ha engkek juga.#Kis 5:34-39 4Eng ya nganiaye ha pengikot-pengikot Yesus lei enai biperdat. Ngcap keral ru kerdor lalu ngpermuj enai nu kateh jel. 5Imam Agong agame Yahudi ru dikdij anggote Mahkamah Agame Yahudi buleh naiog kesaksian tentang eng. Eng ya ngterima surat ju enai supaye ngperlei surat ajeh nu mai kote Damsyik de naisukong ha enai. Surat ajeh kiog eng kuasa ngha-cap pengikot-pengikot Yesus ru ngen enai nu kote Yerusalem supaye bijel ru bihukom.”#Kis 8:3; 26:9-11

Paulus Kicerite ha Ipengalaman

(Kis 9:1-19; 26:12-18)

6“Mase eng ku kateh ceknip ru ya ngha-merek nu kote Damsyik, rilah ku tengah arik, aleh-aleh mong cahaya ju langit kisog ku sekelileg eng. 7Ngjer nu matik lalu ngcerngai suara kibelwal nu eng, ‘Saulus, Saulus! Yama haaniaye Eng?’ 8Lalu ngtanya, ‘Enjen bok?’ Kiberlag, ‘Eng Yesus Mai Nazaret de haaniaye ajeh.’ 9Dikdij sengoi de besama ru eng naibakek ha cahaya ajeh tapi pek naipaham ha suara de kibelwal nu eng. 10Ngtanya nij, ‘Ma de Jenhod ngbeh?’ Tuhan Kiberlag, ‘Kosloh ru mujloh nu kote Damsyik. Ku pajeh doh hek bipasal dikdij tugas ha hek de ya bipetetap ya Jenang.’ 11Eng ngbuta kerana ya cahaya lau ajeh. Kekawat de naicekcip besama ru eng naicap teg eng ru naipeg eng muj nu kote Damsyik.

12Ku pajeh mong numom imuh Ananias. Kek ajeh sengoi de alim ru ihad kitaat nu Hukom Taurat. Kek ihad bihormat ya dikdij mai Yahudi de naigei ku kote Damsyik. 13Kek kihol ru kijinjeg ku beg eng lalu kiurok, ‘Sedara eng Saulus, hek dapat hanengneng nij!’ Ku sarik jijeh juga eng dapat ngneng kek. 14Kek kiurok, ‘Jenang de bisembah ya jenang rak hik ya Kipileh hek supaye hapanei Iheknod ru supaye habakek ru hacerngai ha suara Yesus. 15Hek doh habesaksi nu dikdij sengoi tentang ma de ya haneng ru hacerngai. 16Hunen, agok poj liu nij. Kosloh ru ogloh diri lihek supaye bibaptis. Ceregloh nu Tuhan supaye dosa hek biampon.’ ”

Tuhan Kior Paulus Kiperlei Gah Bor nu Mai Pek Yahudi

17“Bile nglos nij nu kote Yerusalem ru tengah ngbedoa ku laman Deg Jenang, ngkep nanek nengneng. 18Kateh nengneng ajeh Tuhan Kiurok nu eng, ‘Deras dek ju kote Yerusalem kerana sengoi ku padeh pek naiha-terima ma de habesaksi tentang Eng.’ 19Ngberlag, ‘Tuhan, liknai ya naipanei tentang hal adeh: Eng pernah ngmuj nu deg-deg sembahyang ngha-cap sengoi de pecaya nu Jen ru ngpermuj enai nu kateh jel supaye bisiksa. 20Bile Stefanus saksi Jen ajeh bipej ya batu lei kidat, eng mong ku pajeh ru ngsetuju ha perendat ajeh. Eng ngjaga leknog dikdij mai de perdat ha kek.’#Kis 7:58 21Tapi Tuhan Kiurok nij, ‘Etloh. Eng doh Ngngeng hek nu tempat de nyak, nu mai pek Yahudi.’ ”

22Mai jengoi lekat naicerngai ha engrok Paulus. Tapi bile naicerngai ha engrok de teaher ajeh, enai pen mula naihai ihad kuat, “Perdat kek! Kek pek layak kisui ku kemil bumi adeh!” 23Naihai sambel naipej jubah ru habok nu suig. 24Komanden pasukan Rom kiperintah iaska-aska naien Paulus nu kateh kubu. Kek kior supaye nairempet ru naisoal Paulus kerana kaha-panei yama mai Yahudi naihai ha kek begei ajeh. 25Tapi mase Paulus bibeg baha-rempet, Paulus kiurok nu raknak aska de kijinjeg ku pajeh, “Hek pek buleh harempet mai Rom sebelom kek bipeadel!”

26Bile raknak aska ajeh kicerngai bengwal ajeh, kek kiet nu komanden ru kiurok, “Ma de jenha-beh? Kek ajeh mai Rom!”

27Komanden ajeh kiet nu Paulus ru kitanya, “Pasalloh, betolka hek adeh mai Rom?”

Paulus kiberlag, “Hooh.” 28Komanden ajeh kiurok nij, “Eng ngbayar jeoi duet ngha-jadi mai Rom.”

Paulus kiberlag, “Tapi eng biperyos sebegei mai Rom.” 29Ku sarik jijeh juga, aska-aska de naiha-soal ha Paulus naijeklet. Komanden ajeh kisengoh bile kipanei Paulus ajeh mai Rom kerana kek ya kirantei ha Paulus.

Paulus ku Ngar Anggote Mahkamah Agame Yahudi

30Komanden ajeh kaha-panei isebab mai Yahudi naitudoh ha Paulus. Jadi, ku ihuper komanden ajeh kiterlas Paulus lalu kikumpol raknak-raknak imam agame Yahudi ru dikdij anggote Mahkamah Agame Yahudi. Telas ajeh Paulus bien nu ngar enai.

Currently Selected:

KISAH 22: AEH

Highlight

Copy