1 KORINTUS 9

Hak Rasul

1Eng adeh sengoi bebas de pek terikat nu ma-ma pen, ru eng adeh numom rasul. Eng ya ngneng Yesus Tuhan hik ru engkekloh hasel ju kerenjak eng ha Tuhan. 2Hamapen mong mai kilek de pek naiaku eng adeh rasul, tapi engkek mesti engkeaku eng adeh numom rasul kerana engloh de beperlei Gah Bor nu engkek entem ru ya engkepecaya nu Tuhan. Hal ajeh kipebukti eng adeh numom rasul.

3Nu mai de naikritik ha eng, eng ngbual begei adeh: 4Jar Barnabas berhak biog caknak ru ngeknut ya jemaah-jemaah ha kerjak de jarbeh. 5Jar juga berhak jaren kenah lijar de Kristian kateh ceknip ha kerjak lijar begei de bibeh ya rasul-rasul kilek, memenang Tuhan Yesus, ru Petrus. 6Tentu pek adel amen eng ru Barnabas taleh de hod jarkek caknak lijar sendiri. 7Pek mong numom aska pen de kibeperag kitanggong keperluan ilei sendiri. Ru pek mong numom pen de kibeselai anggor pek kicak ipelek anggor. Ru pek mong numom gembale pen de pek kingut susu binatag de kijaga.

8Hal-hal de ngurok ajeh pek ju pengalaman lihik manusia taleh tapi Hukom Taurat pen kipasal hal de sama. 9Ku kateh Hukom Taurat Musa mong bicot, “Agokloh engketutop empag lembu de tengah kijebat gandom#9:9 Lembu de tengah kijebat gandom: Ku jaman ajeh, lembu biguna untok pelerei mat gandom ju ijog. supaye buleh kicakcak sambel kikerakjak.”#Ul 25:4 Jenang pek Kirisau ha lembu taleh 10tapi ha dikdij lihik juga. Hal ajeh mimang bicot ha hik. Mai de becangkol tik ru mai de lahleh pelek sama-sama naibeharap naikep pelek ju ceknet ajeh. 11Jik ya jirui engrok Jenang nu engkek, jadi mimang patot jikep tenanggong ju engkek. 12Amen mai kilek berhak naiterima tenanggong ju engkek, jik lagiloh lebeh berhak daripade enai. Tapi jik pek jiguna hak ajeh. Jitanggong dikdij ya lijik supaye pek mong ma-ma pen hal de kikerlag Gah Bor tentang Kristus biperlei nu jap-jap mai.

13Ya engkepanei tentang hal adeh: Mai de naikerjak ku Deg Jenang naikep caknak ju Deg Jenang ajeh, ru mai de kerakjak ku tempat ennog pesembahan ha Jenang juga biog engleg ju sej korban ajeh. 14Begei ajeh juga, Tuhan Kipetetap mai de naiperlei Gah Bor hod bitanggong ya mai de naiterima Gah Bor ajeh.

15Tapi eng pek ngguna nanek pen ju hak-hak ajeh. Hod engkepaham, eng ngcot surat adeh pek ngha-semanj hak-hak ajeh ha diri lieng sendiri. Lebeh bor ngdat daripade bitanggong ya bok-bok pen. Kerana, eng ngbangge ha diri lieng sendiri de ngbekerjak ha Tuhan pek bitanggong ya bok-bok pen. Amen mai naitanggong eng, eng ya pek buleh ngbangge ha diri lieng nij. Eng ngnyek hal ajeh kitejadi. 16Eng sebegei numom rasul, pek patot ngbangge diri kerana ngperlei Gah Bor. Kerana, Jenangloh de eror eng ngbeh kerjak ajeh. Amen pek ngperlei Gah Bor, ihad celakaloh eng! 17Amen eng ngbeh kerjak ajeh ngjoi heknod lieng sendiri, eng doh biog upah. Tapi eng ngperlei Gah Bor pek ya heknod lieng sendiri. Jenangloh de engog kerjak ajeh nu eng supaye ngbeh. 18Jadi, ma upah eng? Adehloh upah eng: Eng ngperlei Gah Bor ru pecume ru pek ngtuntot hak eng supaye bitanggong kerana ngperlei Gah Bor.

19Hamapen eng sengoi bebas de pek terikat ru bok-bok pen, eng ngpejadi diri lieng hambe nu dikdij mai. Eng ngbeh begei ajeh supaye gujeoi mai naipecaya nu Kristus. 20Bile ngperlei Gah Bor nu mai Yahudi, eng ngpejadi diri lieng begei ha mai Yahudi supaye naipecaya nu Kristus. Bile ngperlei Gah Bor nu mai de naisui naijoi Hukom Taurat, eng juga ngpejadi diri lieng begei ha enai, hamapen ngpanei Hukom Taurat pek kiog sinui de lei ditehjeh, supaye naipecaya nu Yesus. 21Bile ngperlei Gah Bor nu mai pek Yahudi, eng ngpejadi diri lieng begei ha enai supaye naipecaya nu Yesus. Tapi hal ajeh pek bemaksod eng pek ngtaat nu Hukom Jenang. Eng ngjoi ha ernor Kristus. 22Mase eng mong besama ru mai de kurang pecaya nu Yesus, eng ngpejadi diri lieng begei ha enai supaye dapat ngbeh enai gulebeh naipecaya nij nu Yesus. Eng ngpejadi diri lieng sama begei dikdij mai ajeh supaye dapat ngpeselamat memerip ijengoi ju engkap enai ajeh ngguna ma-ma taleh icare. 23Eng ngbeh dikdij hal ajeh ha Gah Bor supaye eng pen ngkep juga berkat ju Gah Bor ajeh besama enai.

24Tentu ya engkepanei tentang hal adeh: Ku kateh petandingan lumbe lari, jeoi mai de jerjar tapi had numom taleh de kimenang ru kikep hadiah. Jadi, kerekwatloh engkejar lei engkekep hadiah ajeh. 25Jap-jap mai de betandeng ku kateh sukan naikerekwat betol-betol naibelateh. Naibeh begei ajeh kerana naiha-berkep hadiah de doh kirepot. Tapi hik hibelumbe hiha-berkep hadiah de tahan lei ditehjeh. 26Kerana ajeh, eng ngjerjar mong tujuan, ru begei numom peninju, eng pek ngtumbok ratah. 27Eng ngkerekwat betol-betol ngbelateh supaye berog eng adeh kijoi sengik eng kerana ngsengoh lieng doh pek ngkep hadiah ju Jenang telas ngperlei Gah Bor nu mai kilek.

Currently Selected:

1 KORINTUS 9: AEH

Highlight

Copy