1 KORINTUS 8

Hal Cak Sej de Bijamu nu Behala

1Hunen ngha-pasal tentang sej de bijamu nu behala. Mimang betol bengwal mai, “Dikdij lihik mong penanei.” Tapi ngurok nu engkek: Penanei kibeh hijadi sumbong sedangkan haknok kibeh hik hipekuat iman sesedara seiman hik.

2Mai de naisangka liknai ajeh mai de naipanei dikdij hal, sebenarnye enai ajeh pek naipanei ma-ma de patot naipanei. 3Tapi bok imai de kihok ha Jenang, Jenang Kipanei sengoi ajeh mong ipenanei tentang hal de benar.

4Tentang hal cak sej de ya bijamu nu behala, engketanya sej ajeh buleh bicakka tok. Mimang buleh bicak kerana hik ya hipanei tentang hal adeh: Behala ajeh bahneh manusia de bibeh ha nyanik-nyanik ku dunia adeh de pek mong ikuasa. Hik ya hipanei Jenang ajeh nek nanek taleh ru pek mong de kilek. 5Hamapen mai kilek naiurok mong jeoi jenang-jenang ru tuhan-tuhan, pek kira enai ajeh mong ku langitka ku bumi adehka, 6tapi ku hik adeh, Jenang ajeh had nek nanek taleh. Kekloh Menek de Kibeh dikdij ma de mong ru ha Kekloh hik hisui. Ku hik, Tuhan had nek nanek taleh. Kek ajeh Yesus Kristus. Melalui Kek, dikdij ma de mong bicipte. Kerana Kekloh hikep sinui pai.

7Tapi pek dikdij mai Kristian naipanei tentang hal ajeh. Mong engleg sesedara seiman de ya biasa naisembah ha behala sebelom naijadi Kristian. Kerana ajeh, bile hunen naicak sej de ya bijamu nu behala, enai lekat naibepiker sej ajeh caknak de bijamu nu behala de sui. Nairasa bedosa bile naicak sej ajeh kerana pek naipanei ma de betol ru ma de salah. 8Tapi caknak pek kibeh hubungan hik ru Jenang gumaken rapat atao gumaken nyak. Mahentok de hirugi amen pek hicak sej ajeh ru mahentok ineuntong amen hicak sej ajeh.

9Tapi bejaga-jagaloh! Hamapen buleh engkecak sej ajeh, jagaloh kelaku engkek supaye pek engkebeh mai Kristian de pek naipanei ma de betol ru ma de salah naijadi bedosa. 10Amen mai de pek naipanei ajeh naineng ha engkek de panei ha dikdij hal engkecakcak ku deg behala, tentu hal ajeh kibeh enai naiha-cak sej de bijamu nu behala. 11Jadi, penanei engkek ajeh kipebinasa ha sesedara seiman de pek naipanei sej ajeh buleh bicakka tok. Ingatloh, Kristus Kidat ha enai juga, pek ha engkek taleh. 12Bile engkebeh begei ajeh, engkebedosa nu enai ajeh kerana engkebeh enai ragu-ragu ru nairasa diri liknai ajeh naibeh dosa. Bahneh engkek ajeh sama taleh begei engkebedosa nu Kristus. 13Jadi, amen ma taleh de ngcak ajeh kibeh sesedara seiman eng kibedosa, lebeh bor eng pek ngcak sej ajeh nij supaye pek ngbeh naibedosa.

Currently Selected:

1 KORINTUS 8: AEH

Highlight

Copy