1 KORINTUS 6

Peselesai Masalah Ratak Liengkek

1Bile mong numom ju engkek de bebalah ru sedara seiman de kilek, agokloh et nu hakem de pek pecaya nu Kristus. Enloh hal ajeh nu jemaah-jemaah kilek supaye naipeselesei hal ajeh. 2Engkek ya engkepanei hik sengoi-sengoi Jenang doh hipeadel ha dunia adeh! Amen hik doh hipeadel dunia adeh, tentu engkek dapat engkepeadel hal de macot. 3Engkek juga ya engkepanei hik doh hipeadel ha malikat-malikat! Amen begei ajeh, hal-hal sinui tiap arik tentu dapat hipeselesei juga! 4Jadi, bile pekare-pekare biasa ajeh hod mong bipeadel, agokloh en hal ajeh nu sengoi de pek Kristian. 5Ngurok begei ajeh supaye engkeselsel! Sekurang-kurang tentu mong numom ku engkap jemaah de panei peselesei masalah ku ratak liengkek sesedara seiman. 6Tapi numom jemaah kien sedara seiman de kilek nu mahkamah ru kisemanj mai pek Kristian kipeselesei imasalah.

7Kelaku engkek ajeh kiperneng hal adeh: Engkesui pek engkejoi neajar Kristus. Lebeh bor engkebiar sedara seiman engkek de kilek kibeh salah nu engkek atao kibeh engkek rugi. 8Tapi sebenarnye, liengkek sendiri de bahbeh salah ru nekperugi ha mai kilek. Engkebeh hal ajeh nu sedara seiman de kilek.

9Engkek ya engkepanei tentang hal adeh: Mai de pek naibeh heknod Jenang doh pek naimuj nu serga de biperintah ya Jenang sebegei Raja. Agokloh lenglod ha diri liengkek sendiri! Mai de bahbeh kelaku seks de niknej, de sembah ha behala, de bezinah, de bahbeh seks sesama jenis, 10neksiknij, naibekelaku tamak, nekbelnel, nekbepitnah ha mai kilek, ru nekbelennon naiha-berkep duet, dikdij enai doh pek naimuj nu serga de biperintah ya Jenang sebegei Raja. 11Entem, begei ajehloh kelaku memerip urag ju engkap engkek. Tapi engkek ya bipeberseh ju dosa, ya bipejadi sengoi-sengoi Jenang, ru ya bipejadi benar ku mat Jenang kerana engkepecaya nu Tuhan Yesus Kristus, ru juga ya kuasa Kelog ju Jenang hik.

Gunaloh Berog Engkek Supaye Jenang Bipateh

12Mong mai ku engkap engkek de naiurok, “Eng buleh ngbeh ma-ma taleh sengik eng de kaha-beh.” Engrok begei ajeh mimang betol tapi pek dikdij pekare beguna nu engkek. Eng pen buleh ngbeh ma-ma taleh de sengik eng kaha-beh tapi eng ngnyek hal-hal ajeh kipejadi eng hambe nu sengik lieng. 13Icuntoh, mong mai de naiurok, “Caknak bibeh ha ked, ru ked bibeh supaye hicakcak.” Ajeh mimang betol tapi rimnar caknak ru ked ajeh doh bipebinasa ya Jenang. Berog hik bibeh pek ha bahneh seks de niknej tapi bibeh ha Tuhan ru Tuhanloh de Kipelihara berog hik. 14Jenang de ya Kiberkos Tuhan ju danan doh Kiberkos hik juga ya Ikuasa.

15Tentu ya engkepanei berog engkek ajeh anggote berog Kristus. Kerana ajeh, bulehka hikot berog lihik adeh de ya kijadi anggote berog Kristus ru hibesama ru pelacor? Tentu pek buleh! 16Engkek ya engkepanei tentang hal adeh: Bok imai de kibesama ru pelacor, sengoi ajeh ya kibenanek ru pelacor ajeh. Kerana, ku kateh Alkitab mong bicot, “Ubai jadi nanek.”#Kej 2:24 17Tapi bok imai de kibenanek ru Tuhan, ikelog ya kibenanek ru Kelog Tuhan.

18Pernyakloh diri liengkek ju kelaku seks de niknej! Dikdij dosa kilek de bibeh ya manusia pek kena ku berog liknai. Tapi bok imai de kibeh kelaku seks de niknej, kek kibedosa ku berog ilei sendiri! 19Tentu ya engkepanei tentang hal adeh: Berog liengkek ajeh deg ha Kelog Santen de Kigei ku kateh engkek ru de biog ya Jenang nu engkek. Berog engkek ajeh pek hak liengkek sendiri tapi hak Jenang. 20Kerana Jenang ya Kibeli engkek ru iregak ya dij bibayar, jadi gunaloh berog engkek ajeh ha hal de bor supaye Jenang bipateh.

Currently Selected:

1 KORINTUS 6: AEH

Highlight

Copy